San Juan 5 - Zoque Copainalá New Testament

Te' wocšijpʌ Betesda tanque'aŋi

¹ Cʌtʌjcu'ca yʌ'šejta'mbʌ tiyʌ, ijtu inʌc sʌŋ judio'sta'mñe'. Y qui'mu Jesús Jerusale'ŋojmo.

² Y Jerusale'ŋojmo ijtu inʌc tanque tomemʌy ñchowambe'sta'm tyʌjcʌquiuy, judio-otowe'ojmo ñʌjayajpapʌ inʌc Betesda, quiʌne'ŋupʌ mosa'pyʌ setze's.

³ Y yʌ' setzecʌsita'm yecnayaju inʌc sone ca'eta'mbʌ, to'tita'mbʌ, mʌ'ŋga'ŋyajpawʌ y tʌtzta'mbʌ. Nʌ inʌc jyo'quiaju mumu yʌ'ta'mbʌ's wa'y myi'csu te' nʌ'.

⁴ Porque nu'cpa'c aŋsʌŋ wanacpa inʌc ángeles y yajmi'cspa inʌc te' nʌ' te' tanque'ojmo. Iwʌ wina tʌjcʌpya nʌ'c myi'csu te' nʌ', tzocpa inʌc wempe jutzpʌ ca'cuy.

⁵ Y tey inʌc ijtu tumʌ pʌn ips-co-yʌt-co-tuca'y ame'a ca'epa'tupʌ.

⁶ Quienu Jesujsis yʌ'wʌ ʌŋumʌy, y ñʌctʌ'yu que sone ame'ande' te'šej itpa, y ñʌjayu: ¿Sunba ñchojcu?

⁷ 'Yaŋdzoŋu te' ca'epʌ's: Señor, ja'ndiyʌ iwʌ'sʌj cuŋdʌjcʌpya yʌ' tanque'ojmo nʌ'c myi'csu yʌ' nʌ'. Nʌ'cše'ŋo'yʌj maŋu, wina tʌjcʌpya eyapʌ.

⁸ Jesujsis ñʌjayu: Tzu'cumʌ, pʌcʌ mis ŋgape-ʌŋguy y tu'ŋa.

⁹ Pijche'ctij tzojcu te' pʌn. Pyʌjcu te' quiape-ʌŋguy y maŋu. Pero sabado-jamate' inʌc.

¹⁰ Te'cotoya ñʌjayaju te' tzojcupʌ pʌn te' judio'sta'm: Sabado-jamayʌ' išo'oyj y yajwinducpa aŋgui'mgu'yis wa'mis nʌmaŋu ŋgape-ʌŋguy.

¹¹ 'Yaŋdzoŋyaju ñe'cʌ's: Pero nʌjayu'ʌj te' yajtzojcupʌ'sʌj: Pʌcʌ te' mis ŋgape-ʌŋguy, y tu'ŋa.

¹² Pijche'ca quiʌ'aŋwa'quiaju: ¿Iwa'nde' te' ñʌjayupʌ'smij: Pʌcʌ mis ŋgape-ʌŋguy, y tu'ŋa?

¹³ Pero te' tzojcupʌ pʌ'nis ja'n inʌc myusi iwʌ'ste' yajtzojcu, porque te' Jesús tzu'cumu tey te' jene itʌnʌmʌmʌy.

¹⁴ Jʌsa'ca pya'tu Jesujsis te' templo'ojmo, y ñʌjayu: Yʌtij ñchocwa'mij, u'ya cowapa'tque'temaj umis maŋu maŋgopa'tʌyu más jene jenepʌ ca'cuy.

¹⁵ Maŋu te' pʌn. Maŋu chamjayaju judiota'm que te' pʌn yajtzojcupʌ's, Jesuste' inʌc.

¹⁶ Yʌ'šejta'mbʌ tiyʌcotoya ñitzʌquiaju wa'y yacsnutzʌquiaju Jesús te' judio'sta'm. Šunba inʌc yajca'yaju porque chʌcpa inʌc yʌ'šejta'mbʌ tiyʌ sabado-jamo'oyj.

¹⁷ 'Yaŋdzoŋyaju Jesujsis: Ʌs Ndata Dios nʌtij yojsu, y yosque'tpa'ʌj ʌj.

¹⁸ Te'wʌcotoya más chʌcme'chaju judio'sta'm wa'y yajca'yaju Jesús. Ja'n na' porque myaŋgocʌtʌjcu sábado, sino porque nʌmgue'tu inʌc que Dios te' ñe' Tyataj. Y nʌmyajpa inʌc judiota'm que Diosšej nʌ chʌjcu wyin.

Te' Diojsis 'Yune's 'yaŋgui'mʌtʌjcuy

¹⁹ Pijche'ca 'yaŋdzoŋyaju Jesujsis y ñʌjayaju: Wiyuŋše'ʌsmij nwiyuŋdzamjaytyamba: Ʌjte' te' 'Yune y ja'ʌs musi ndzʌjcu yajtiyʌ ne' su'noquiupyit, sino que ŋguengʌspʌcpa'ʌs Ndatajcʌsi. Porque tiyʌ chʌcpa ʌs Ndata's, te'še'ʌs ndzʌjque'tpa ʌs.

²⁰ Porque ʌj, Tata Diojsisʌjyʌ' 'Yune, y ñe'cʌ's sunba'ʌj, y yajquenba'ʌj tiyʌta'm chʌcpa. Y maŋbama'ʌj yajquenu wa'yʌs ndzʌjcu más maya'aŋda'mbʌ isaŋwʌ'ajcuy, cosaque'cše'ŋoyj maŋbamij myaya'tamu.

²¹ Jujcha'nde' ʌs Ndata's muspa yajwinsa'u ca'yajupʌ, y chi'yajpa quenguy, te'šejtijque' ʌs, te' 'Yune's, muspa'ʌs ndzi'u quenguy iwʌta'm ʌs sunba.

²² Ʌs Ndata's ja'n quiʌme'tze ya'iwʌ. Pero como ʌjte' te' 'Yune, tzi'u'ʌj aŋgui'mʌtʌjcuy wa'yʌs ŋgʌme'tzpʌ'u mumu pʌn.

²³ Yʌ'šej chʌjcu wa'yʌj cʌna'tzʌyaju ʌj jujcha' quiʌna'tzʌyajpa ñe'cʌ ʌs Ndata Dios. Iwʌ'sʌj ja'n cʌna'tzʌy ʌj, te' 'Yune, ja'n quiʌna'tzʌyjay ʌs Ndataj cʌ'wejupʌ'sʌj.

²⁴ Wiyuŋše'ʌsmij nwiyuŋdzamjaytyamba: Iwʌ's quiʌmato'ŋʌpya ʌs ndzamyajupʌ tiyʌ, y wyʌ'aŋjamba te' cʌ'wejupʌ'sʌj, pya'twa'a ja'n yayepʌ iscuy-quenguy. Y te'wʌ's ja'n maŋu quio'aŋgʌyu quiowa. Ñempe ca'uwʌše'a inʌc quiowa'ojmo pya'twa'nde' iscuy-quenguy.

²⁵ Wiyuŋše'ʌsmij nwiyuŋdzamjaytyamba: Maŋba minu te' aŋsʌŋ, y tzo'tzuwa'nde' wa'y quiʌmato'ŋʌyjayaju ʌs otowe te' ca'uwʌšej ijtyajupʌ's quiowa'ojmo, porque ʌjte' te' Diojsis 'Yune. Y iwʌ'sʌj cʌmato'ŋʌyajpa ʌj, maŋba pya'tyaju iscuy-quenguy.

²⁶ Tʌ Ndata Diojsojmoc womba te' iscuy-quenguy, y te'še'ʌj tzi'que'tu ʌj, te' 'Yune, wa'y ʌ'ojmoc wyomu te' iscuy-quenguy.

²⁷ Ñe'cʌ'stijte' tzi'que'tu aŋgui'mʌtʌjcuy y mʌja'ŋajcuy wa'yʌj ŋgʌme'tzoyu, porque ʌjte' te' Pʌ'nis 'Yune.

²⁸ Uy nʌmaya'tame yʌ'šejta'mbʌ tiyʌ. Porque maŋba minu te' aŋsʌŋ maŋba'ca quiʌmato'ŋʌyjayaju ʌs otowe mumu tza'tʌjcojmo ijtyajupʌ ca'uwʌ's.

²⁹ Y maŋba pyujtyaju teymʌc. Y te' chʌquiajupʌ's oyeta'mbʌ tiyʌ maŋba wyinsa'yaju wa'y chi'yatʌju cota'nupʌ quenguy. Y te' chʌquiajupʌ's yatzita'mbʌ tiyʌ maŋba wyinsa'yaju wa'y quio'aŋgʌyaju quiowa.

Yajquejupʌpit Jesujsis 'yaŋgui'mʌtʌjcuy

³⁰ Ʌs ja'ʌs musi ndzʌjcu yajtiyʌ ne'cʌtij. Tzamjapyaše'ʌj Ndata's ŋgʌme'chajpa'ʌs pʌnda'm. Y ʌs, wiyuŋbʌ tiyʌpi'tʌs ŋgʌme'chajpa, porque ja'ʌs me'tze ne' su'noquiuy, sino que wa'yʌs ndzʌjcu šunbašej ʌs Ndata Diojsis, porque ñe'cʌ'sʌjyʌ' cʌ'weju.

³¹ Juca ne'cʌ naytyumʌ'ʌs ŋgotestigosajpa nwin ja'nmis wiyuŋbʌ tiyʌšej ŋgomʌ'ytyame.

³² Ijtu iwʌ'sʌj cotestigosajpa ʌj, y muspa'ʌs que ñe'cʌ'sʌj cotestigosajpašej wiyuŋbʌ tiyʌte'.

³³ Ngʌ'wejtamumis pʌnda'm wa'y maŋu quiʌ'aŋwa'quiaju Juan Bautista, y ñe'cʌ wyiyuŋdzamjayaju.

³⁴ Pero ja'ndiyʌ pyena wa'yʌj pʌ'nis cotestigosajyaju, sino que ndzamba'ʌs yʌ'šejta'mbʌ tiyʌ wa'mij ŋguiotzoctamu.

³⁵ Nembapʌ y sʌ'ŋbapʌ sʌ'ŋgʌšejpʌte' inʌc Juan. Y mista'm uša'ŋ horatijmis nʌ'omdamu wa'y šʌ'ŋgʌtzʌcjaytyamu mista'm ndzocoy.

³⁶ Pero wiyuŋšej muspamisʌj ispʌctamu te' ʌs ndzʌquiajpapʌ tzʌquicʌsi. Te'šejta'mbʌ tiyʌ'sʌj más cota'nu'c cotestigosajyajpa que ja'n Jua'ŋis. Ʌs Ndata'sʌj cʌ'weju wa'yʌj nyojsu. Y te' tzʌqui ʌs ndzʌquiajpapʌ, te'šejta'mbʌ tiyʌ'sʌj cotestigosajpa que ñe'cʌ'sʌj cʌ'weju.

³⁷ Tʌ Ndata Diojsisʌjte' cʌ'weju, y te'šejtijque' ñe'cʌ'sʌj cotestigosaju. Yajujche'cmajmis jamyatoŋjaytyamʌ 'yotowe, ni jaŋguiendamʌmajmis.

³⁸ Ni jañʌ'itjaytyamʌmis ñe' chame mista'm ndzoco'yojmo, porque ja'nmisʌj nwʌ'aŋjamdame ʌj, y ñe'cʌ'sʌjte' cʌ'weju.

³⁹ Ndacsoctu'ndambamis te' Totojayeta'm porque nwʌ'aŋjamdambamis que te'wʌcʌsi mba'ttambamis te' ja'n yayepʌ quenguy. Te'wʌ'sʌjte' cotestigosajyajpa ʌj,

⁴⁰ pero ja'nmisʌj suni nwʌ'aŋjamdamu ʌj wa'yʌsmij ndzi'tamu ja'n yayepʌ quenguy.

⁴¹ Ja'ʌs njo'que wa'yʌj pʌ'nis wʌcotzamyaju.

⁴² Ʌs ispʌctamba'ʌsmij, que ja'nmis sundame Dios mista'm ndzoco'yojmo.

⁴³ Ʌj minu'ʌj ʌs Ndata Diojsis ñʌquiʌsi y ja'nmisʌj mbʌjcʌchoŋdame. Juca minba pʌn ñe' wyin chambapʌ's, te'wʌ jʌ'ʌ, mbʌjcʌchoŋdambamis.

⁴⁴ ¿Jutzamisʌj maŋba nwʌ'aŋjamdamu juca nʌ'omdambamis wa'mij yʌ'wʌ te'wʌ's myʌja'ŋgotzamdamu ne'cʌ? Y ja'nmis njo'ctame wa'mij myʌja'ŋgotzamdamu te' tumʌpʌ Diojsis.

⁴⁵ Uy quipstame que ʌsmij maŋba nicotza'mʌytyamu Ndata Diojsis wyi'naŋdʌjqui. Ijtu iwʌ'smij ñicotza'mʌytyamba. Nite'tzʌytyambamis Moisés, y ñe'cʌ'smijte' maŋba ñicotza'mʌytyamu.

⁴⁶ Juca inʌc mis nwʌ'aŋjamdamba Moisés, nwʌ'aŋjamdaŋgue'tpamisʌj inʌc ʌj, porque ʌjte' ja'yʌyu ñe'cʌ's.

⁴⁷ Pero como ja'nmis nwʌ'aŋjamdame tiyʌta'm jya'yʌyu ñe'cʌ's, ¿jutzamis maŋba nwʌ'aŋjamdamu tiyʌ'ʌsmij ndzamjaytyamba?