San Juan 4 - Zoque Copainalá New Testament

Jesús te' Samaria-yomoji'n

¹ Jesujsis ñʌctʌ'yu que te' fariseo'sta'm myatoŋyaju que ñe'cʌ Jesujsis más inʌc wʌwʌ nʌ chʌjcu y yajnʌ'yʌyaju cʌ'aŋmayeta'm que ja'nde' Jua'ŋis.

² Ñempe Jesús ja'n inʌc yajnʌ'yʌ'oy, te' yajnʌ'yʌ'oyajpapʌ inʌc te' quiʌ'aŋmayeta'mde'.

³ Ñʌctʌ'yu jeque, yʌ'šej Jesujsis, y tzu'cumu tey Judea-najsojmoc y maŋwʌtzʌjque'tutij Galilea'ojmo.

⁴ Y ijtupʌte' inʌc pyena wa'y quiʌtʌjcu Samaria-najsojmo.

⁵ Nu'cu Sicar-cumgu'yojmo, te' Samaria-najsis quiowindzʌmbapʌ, tome quienbamʌy Jacojpis inʌc ñasjuyi chacjayupʌ 'yune José.

⁶ Tey inʌc ijtu Jacojpis pyozo. Y como ñitu'yu Jesús te' tu'ŋajcu'yis, maŋu pyocsu te' pozo'aŋi Paŋguc-jamaše'ŋoyjtye' inʌc.

⁷ Y minu tumʌ Samaria'ojmopʌ yomo, minu ñʌ'pʌjcu tey. Jesujsis ñʌjayu: Yajwa'cʌ'ʌj nʌ'.

⁸ Maŋu'cše'ŋoyjtyʌj cumgu'yojmo ŋgʌ'aŋmaye-tʌwʌji'ŋ wa'ytyʌs njuyu cu'tcuy.

⁹ Y te' Samaria'ojmopʌ yomo's ñʌjayu: Mij njyudio-pʌn mijyʌ', y ʌj Samaria-yomo'ʌjyʌ'. ¿Tiyajca'mʌjte' nwa'cjapya nʌ'? Porque te' judio-pʌnda'm naqui'nisʌtʌjyajpa Samaria-pʌnji'ŋ.

¹⁰ 'Yaŋdzoŋu Jesujsis: Ja'nmis ispʌcjay te' Diojsis yajya'moquiuy. Ja'nmis ispʌqui iwʌ'smijte' nʌ wya'cjayu nʌ'. Juca inʌc misʌj ispʌcpa mis inʌc nwa'cpa ʌjcʌsi, y ʌsmij inʌc ndzi'pa nʌ' šajpapʌ's quenguy.

¹¹ Ñʌjayu te' yomo's: Señor, ja'nmis tiyʌpit nʌputi, y yʌ' pozo jʌŋupʌyʌ'. ¿Juta' jeque nʌ'ijtu nʌ' šajpapʌ's quenguy?

¹² ¿Masja jeque myujsopya mij que ja'n tʌs ndata'a'ŋucu Jacob, tzi'upʌ'stʌj yʌ' pozo? Yʌy ujcu ñe'cʌ, 'yuneta'm y wyacasta'm.

¹³ 'Yaŋdzoŋu Jesujsis: Mumu iwʌ'sta'mis tyo'ŋyajpa yʌ' nʌ' maŋba yoctʌtzwʌtzʌquiaju,

¹⁴ pero iwʌ's tyo'ŋba te' nʌ' ʌs ndzi'papʌ ja'na yoctʌtzque'temaj. Te' ʌs ndzi'papʌ nʌ' maŋba wyomjojcʌtʌjcu ñe'co'mo jujcha' wombamʌy nʌ', y maŋba wyipqui'mjojcʌtʌjcu choco'yojmo wa'y pya'tu ja'n yayepʌ quenguy ñe'cʌ's.

¹⁵ Te' yomo's ñʌjayu: Señor, tzi'ʌ'ʌj te'šejpʌ nʌ', u'yamʌj nyoctʌtzque'tumaj, ni u'yamʌs minumaj nʌputque'tu yʌy.

¹⁶ Jesujsis ñʌjayu: Mawʌ, ma weya njayaj, y mindamʌ yʌy.

¹⁷ Aŋdzoŋu te' yomo: Ja'ndiyʌ ʌs njayaj. Ñʌjayu Jesujsis: Nwyiyuŋdzamumij nʌmu'cmij: Ja'ndiyʌ ʌs njayaj,

¹⁸ porque mosa'y ñacamij ŋguio'tʌjcaju, y yʌtijmij ijtupʌ pʌnji'ŋ ja'nde' mis njayaj. Ndzamušejmis wiyuŋbʌ tiyʌte'.

¹⁹ Ñʌjayu te' yomo's: Señor, nʌctʌ'wya'mʌs que mij ñcha'maŋwa'oyemijyʌ'.

²⁰ Tʌs ndata'a'ŋucuta'm cʌna'tzʌ'oyaju yʌ' pu'mnacʌsi, y mij judiota'm ñʌmdambamij que Jerusale'ŋojmo pyʌcpa wa'y maŋu quiʌna'tzʌ'oyaju pʌnda'm.

²¹ Ñʌjayu Jesujsis: Wʌ'aŋjamʌ tiyʌ'ʌsmij ndzamjapya. Maŋba ñu'cu te' aŋsʌŋ cuando ja'namij mindame yʌ' pu'mnacʌsi ni ja'namij myaŋdame Jerusale'ŋojmo wa'mis ŋgʌna'tzʌytyamu tʌ Ndata Dios.

²² Mista'm ja'nmis ispʌctame iwʌ miste' nʌ ŋgʌna'tzʌytyamu. Tʌs muspatʌs iwʌ tʌste' nʌ ŋgʌna'tzʌyu, porque te' yajcotzojcopyawʌ, judio'ojmocte' pʌ'naju.

²³ Minba te' aŋsʌŋ y tzo'tzuwa'a wa'y quiʌna'tzʌyjayaju tʌ Ndata Dios, te' wiyuŋšejta'mbʌ cʌna'tzʌ'oye's, espiritupit y wiyuŋdzocopyʌ cʌna'tzʌ'oquiupyit cʌna'tzʌ'oyajpa. Diojsis šunba te'šejta'mbʌ cʌna'tzʌ'oye.

²⁴ Te' Dios, Espiritute'. Y iwʌ's quiʌna'tzʌpya, pyʌcpa wa'y quiʌna'tzʌyaju espiritupit y wiyuŋdzocopyʌ cʌna'tzʌ'oquiupyit.

²⁵ Ñʌjayu te' yomo's: Muspa'ʌs que maŋba minu te' Mesías, te' ñʌjayajpapʌ Cristo. Minba'ca ñe'cʌ, maŋbatʌj tza'maŋwajpʌ'jayu mumutiyʌ.

²⁶ Ñʌjayu Jesujsis: Ʌjte', yʌ'yʌj nʌ ndzamdzamnayupʌ miji'ŋ.

²⁷ Pijche'ctʌj minu tʌj te' quiʌ'aŋmaye, y nʌmaya'utʌs nʌ chamdzamnayu'ŋmʌjcʌ yomoji'ŋ. Pero nijutiwʌ's jañʌja: ¿Tiya' nʌ ŋgʌ'aŋwa'cu, ni tiya' nʌ nʌtzamu?

²⁸ Pijche'ca chajcu te' yomo's te' myajcuy, y maŋu te' cumgu'yojmo. Maŋu chamjayaju te' quiumguy-tyʌwʌ.

²⁹ Ñʌjayaju: Mindamʌ. Minʌ quendamʌ yʌ' pʌn cʌ'ñʌchambʌ'jawya'mʌj tiyʌta'mamʌs ndzʌjcu. ¿Ja'nsʌ'ŋde' yʌ'wʌ te' Cristo?

³⁰ Pijche'ctij tzu'cumyaju te' cumgu'yojmoc. Y tu'ŋojmomaj ijtyaju'c,

³¹ te'pa'ŋoyj, tʌs te' Jesujsis quiʌ'aŋmaye'sta'm nʌtʌs inʌc ndzi'u pena wa'y quiu'tu, y nʌjayutʌs: Maestro, cu'tʌ.

³² Pero ñe'cʌ'stʌj nʌjayu: Ʌs ijtu ʌs ŋgu'tcuy ŋgu'tpapʌ'ʌs, pero ja'nmis mustamepʌ mis.

³³ Pijche'c naquiʌ'aŋwa'cʌtʌjutʌ ne'co'mo: ¿Ñʌminjayusʌ'ŋ cu'tcuy iwʌjutiwʌ's?

³⁴ Nʌjayutʌj Jesujsis: Ʌs, cu'tcuyše'ʌs nʌ'ijtu wa'yʌs ndzʌcjayu ʌs Ndata Diojsis šu'noquiuy. Porque ñe'cʌ'sʌjyʌ' cʌ'weju, y sunba'ʌs nyajtucjayu ñe' yoscuy.

³⁵ ¿Y ja'njate' nʌ ñʌmdamu mijta'm: Faltamaj macšcu'y poyaj wa'y ñu'cu te' aŋsʌŋ wa'y yajtu'mʌyaju te' cosecha? Pero ʌsmij nʌjaytyamba: Itzaŋwajtamʌ nwitʌm y quendamʌ te' yosanʌmbamʌy jutza' cʌŋyaju te' tʌmda'm, wa'y yajtu'mʌyaju. (Te' tʌmda'm, pʌ'nʌste' nʌ ndzamyaju.)

³⁶ Iwʌ's wyoctu'mʌpya te' tʌm, maŋba quioyojyaju. Y jujche'ŋ ñe'cʌ's wyoctu'mʌyajpapʌ y wʌ'aŋjamyajpa'ʌj maŋba pya'tyaju ja'n yayepʌ quenguy, wa'y tumʌ'ajcu'yoyj 'yomdzocopyaquiaju te' ñipyajpapʌ's y wyoctu'mʌyajpapʌ's.

³⁷ Yʌytyʌ nʌctʌ'pya que wiyuŋbʌte' te' tzame: Eyapʌ'ste' ñijpa y eyapʌ's minba wyoctu'mʌyu.

³⁸ Ʌs ŋgʌ'wejtamu'ʌsmij wa'mis maŋu nwoctu'mʌytyamu te' tʌm, janyostamʌmʌmyij. Eyata'mbʌ te' yojšaju y mij ñdyʌjcʌytyamu wa'mis nwoctu'mʌytyamu tʌm eyata'mbʌ yojšajumʌy.

³⁹ Wʌwʌ pʌ'nis te' Samaria-cumgu'yoyj wyʌ'aŋjamyaju Jesús te' yomo's chamjayajupʌ tiyʌpit. Te' yomo's chamu'c Jesús nʌmupʌte': Cʌ'ñchambʌ'jawya'mʌj tiyʌta'mamʌs ndzʌjcu.

⁴⁰ Quiʌnu'cʌyaju tey Jesús te' Samaria'ojmocta'mbʌ's y 'yojquita'yaju wa'y chʌ'yu ñe'cʌji'ŋda'm te' cumgu'yoyj. Y tzʌ'yu jeque metza jama.

⁴¹ Pijche'ca sone eyata'mbʌ pʌ'nis wyʌ'aŋjamyaju Jesús te' ñe' chamepit.

⁴² Y ñʌjayaju te' yomo: yʌtij nwʌ'aŋjambatʌs ja'n na' mis ndzamupʌ tiyʌpit, sino que ne'cʌtʌs matoŋwa'a ŋgowipit. Te'cotoya muspa'ndʌs que yʌ'wʌte' te' Cristo, te' yajcotzocpapʌ's najsacopajcʌsita'mbʌ.

Jesujsis yajtzocjayu co'aŋgui'moye's 'yune

⁴³ Y cʌtʌjcu'ca metzapʌ jama tzu'cumu tey Jesús y maŋu Galilea-najsojmo.

⁴⁴ Porque ñe'cʌ Jesús nʌmu que ja'n pyʌjcʌchoŋyay tza'maŋwa'opyapʌ ñe' ñajsojmo.

⁴⁵ Nu'cu'ca Galilea'ojmo pyʌjcʌchoŋyaju Galilea'ojmota'mbʌ's, porque quieñaju tiyʌta'm chʌjcu Jerusale'ŋojmo te' sʌŋ-jamo'oyj, porque ñe'cʌta'm tijyajque'tu te' sʌ'ŋoyj.

⁴⁶ Minwʌtzʌjque'tutij Jesús Galilea'ojmopʌ Cana-cumgu'yojmo te' chʌjcumʌy vino nʌ'pit. Y ijtu inʌc Capernaum-gumgu'yojmo tumʌ co'aŋgui'moye re'yisñe', ca'epʌ's inʌc 'yune.

⁴⁷ Yʌ'wʌ's myatoŋu nʌ chamyaju que tzu'cumu Jesús Judea-najsojmoc y nu'cu Galilea-najsojmo. Quiʌ'maŋu y tyarea-wa'cʌ'yjayu wa'y wyanajcu y wa'y maŋu yajtzocjayu 'yune, porque nʌwa' inʌc quia'u.

⁴⁸ Pijche'ca ñʌjayu Jesujsis: Juca ja'nmis ŋguendame señal y isaŋwʌ'ajcuy, ja'nmij nwyʌ'aŋja'moytyame.

⁴⁹ Te' re'yis quio'aŋgui'moye's ñʌjayu: Nʌcje'csʌyja Señor, antes que ca'pa ʌs une.

⁵⁰ Jesujsis ñʌjayu: Mawʌytya'a, yʌtij tzocpa mis une. Y te' pʌ'nis wyʌ'aŋjamu chamjayušej Jesujsis, y tzu'cumu.

⁵¹ Y nʌwa' wyanajcu'c tyʌjcaŋʌ, minu choŋyaju quioyospawʌ's, y ñʌjayaju: Mis une tzocwa'a.

⁵² Pijche'ca ñe'cʌ's quiʌ'aŋwa'quiaju tiyʌ hora tzojcu, y ñʌjayaju: Tʌ'ʌc, la unaše'ŋoyj chajcu pijcʌ's.

⁵³ Pijche'ctij ñʌctʌ'yu te' co'aŋgui'moye's que te'še'ŋ horate' nʌmu te' Jesús: Mis une tzocpa. Y wʌ'aŋja'moyu ñe'cʌ, y mumu ñe' tyʌjcoyjtya'mbʌ.

⁵⁴ Tzu'cumu Jesús Judea-najsojmoc y nu'cu te' Galilea-najsojmo. Pijche'cte' chʌjcu yʌ' metzo'mopʌ isaŋwʌ'ajcuy.