San Juan 3 - Zoque Copainalá New Testament

Jesús Nicodemoji'ŋ

¹ Ijtu inʌc tumʌ fariseo-pʌn ñʌjayajpapʌ Nicodemo. Yʌ'wʌ judio-cowi'nate' inʌc.

² Yʌ'wʌ's minu 'yoto'ŋʌyu Jesús tzu'cʌsi, y ñʌjayu: Maestro, muspatʌs que Diojsismijyʌ' ŋguiʌ'weju wa'mij 'yaŋma'yoyu, porque ya'iwʌ's ja'n musi chʌjcu isaŋwʌ'ajcuy mis ndzʌcpašej juca ja'n quiotzowe Diojsis.

³ Y ñʌjayu Jesujsis: Wiyuŋše'ʌsmij nwiyuŋdzamjapya, iwʌ ja'n pyʌ'najwʌtzʌqui ja'n musi quie'nʌyu jutz aŋgui'mba Dios.

⁴ Quiʌ'aŋwa'cu Nicodemo's: ¿Jutza' muspa pyʌ'najwʌtzʌjcu te' pʌn, tzamupʌ'nʌ'ca? ¿Muspasʌ'ŋ tyʌjcʌwyʌtzʌjcu ñana's chejcojmo wa'y pyʌ'najwʌtzʌjcu?

⁵ Aŋdzoŋu Jesús: Wiyuŋše'ʌsmij nwiyuŋdzamjapya, iwʌ ja'n pyʌ'nay nʌ'pit y Espiritupit ja'n musi tyʌjcʌyu wa'y 'yaŋgui'mu Diojsis.

⁶ Sispit pʌ'najupʌ, siste'. Y Espiritupit pʌ'najupʌ, espiritute'.

⁷ Uy nʌmaya'e nʌjayu'ŋmʌjcʌ'ʌsmij, ijtupʌte' pyena wa'mij mbyʌ'najwʌtzʌctamu.

⁸ Te' sawa yʌmʌc teymʌc popya, y matoŋjapyamis jyu'ucʌ, pero ja'nmis musi jutʌcte' minba ni jutʌ maŋba. Te'šejte' mumu jujche'ŋ pʌ'najupʌ Espíritu Santopit.

⁹ Quiʌ'aŋwa'cu Nicodemo's: ¿Jutza'sʌ'ŋde' muspa tyujcu te'šej?

¹⁰ Jesujsis 'yaŋdzoŋu: Mis aŋmayajpamis Israel-pʌn, ¿y ja'nmaj musi yʌ'šejta'mbʌ tiyʌ?

¹¹ Wiyuŋše'ʌsmij nwiyuŋdzamjapya, tiyʌ tʌs muspa te'wʌ tʌs ndzamba. Y tiyʌ tʌs ŋguenu te'wʌ tʌs ŋgotestigosajpa. Y ja'nmis mbʌjcʌchoŋjaytyame tʌs ŋgotestigosajpapʌ tiyʌ.

¹² Ndzamjaytyamu'ʌsmij najsacopajcʌsita'mbʌ tiyʌ y ja'nmis nwʌ'aŋjamdame. ¿Jutzamis maŋba nwʌ'aŋjamdamu juca ndzamjaytyamba'ʌsmij tzajpojmo ijtyajupʌ tiyʌ?

¹³ Ya'iwʌpʌ pʌnmaj jatyijtʌ'ʌ tzajpojmo wa'y myujsu jutzpʌte' ʌmʌ. Na' ʌstij muspa porque teymʌjcʌ'ʌjyʌ' wanajcu. Ʌjte' te' Pʌ'nis 'Yune, y ʌs itcuy tzajpojmote'.

¹⁴ Jujcha' Moisejsis yajqui'mu te' tzandzʌqui cuquiʌsi ja'itʌnʌmʌmʌy, te'šejte' pyʌcpa ʌj, te' Pʌ'nis 'Yune, wa'yʌj yajqui'myaju cruzcʌsi,

¹⁵ wa'y iwʌ'sta'misʌj wʌ'aŋjamyajpa ʌj, uy tyocoyaju sino que wa'y pya'tyaju ja'n yayepʌ quenguy.

Jene šunu Diojsis te' najsacopajcʌsita'mbʌ

¹⁶ Como jene šunu Diojsis te' najsacopajcʌsita'mbʌ, tzi'oquia'u'ʌj, ʌj te' tyʌŋdumʌpʌ 'Yune. Y mumu iwʌ'sʌj wʌ'aŋjamba ʌj, ja'n maŋu tyocoyu, sino que maŋba pya'tu ja'n yayepʌ quenguy.

¹⁷ Porque ʌjte' te' Diojsis 'Yune, y ñe'cʌ'sʌj cʌ'weju najsacopajcʌsi ja'n wa'yʌs nyajco'aŋgʌyaju quiowa najsacopajcʌsita'mbʌ sino que wa'y quiotzoquiaju ʌjpit.

¹⁸ Iwʌ'sʌj wʌ'aŋjamba ʌj ja'n yajtiyʌ quio'aŋgʌy. Pero iwʌ'sʌj ja'n wʌ'aŋjame maŋba quio'aŋgʌyu, porque jawyʌ'aŋjamʌ ʌj te' Diojsis 'Yune.

¹⁹ Minu'ʌj najsacopajcʌsi, y ʌjte' te' sʌ'ŋgʌ', pero más šuñaju pi'tza'ŋajcʌ' te' pʌ'nista'm que ja'nde' ʌj te' sʌ'ŋgʌ'. Te'šej šuñaju porque yacha'cuy inʌc chʌquiajpa. Te'wʌ maŋba yajco'aŋgʌyaju Diojsis.

²⁰ Porque iwʌ's chʌcpa ja'n 'yoyeta'mbʌ tiyʌ, ja'n šuni te' sʌ'ŋgʌ' ni ja'n quia'ŋdʌjcʌy sʌ'ŋgʌ'ojmo uy quiʌme'tzjayu chʌqui sʌ'ŋgʌ's.

²¹ Pero iwʌ's chʌcpa wiyuŋda'mbʌ tiyʌ ca'ŋdʌjcʌpya sʌ'ŋgʌ'ojmo wa'y myusjayaju chʌqui pʌ'nista'm que Diojsiste' nʌ quiotzoŋu.

Chamwʌtzʌjque'tu Jesús te' Juan Bautista's

²² Cʌtʌjcu'ca yʌ'šejta'mbʌ tiyʌ, minutʌj Jesusji'ŋ Judea-najsojmo tʌs ŋgʌ'aŋmaye-tʌwʌji'ŋda'm. Teytyʌj tzʌ'yu ñe'cʌji'ŋ y nʌ inʌc yajnʌ'yʌ'oyu.

²³ Y yajnʌ'yʌ'oquie'tpa inʌc Juan Eno'ŋojmo tome quienbamʌy te' Salim-gumguy, porque jene ijtu inʌc nʌ' tey. Y mi'naŋgʌtʌquiaju wa'y ñʌ'yʌyaju tey,

²⁴ porque jašomya'cmajte' te' Juan.

²⁵ Te' Diojsis wyi'naŋdʌjquipʌ cowajcuquiotoya quipotoŋgʌ'yaju judiota'm Jua'ŋis quiʌ'aŋmayeji'ŋda'm.

²⁶ Miñaju Jua'ŋaŋi ñe' quiʌ'aŋmaye. Ñʌjayaju: Maestro, te' miji'ŋ inʌc ijtupʌ Jordan-ocwinduc, te' nʌmis inʌc ndzamupʌ, yʌtij nʌ yajnʌ'yʌ'oyu y wʌwʌ pʌ'nis nʌ quiʌ'maŋu ñe'cʌ.

²⁷ 'Yaŋdzoŋyaju Jua'ŋis: Ni'iwʌ pʌ'nis ja'n musi ijtu 'yaŋgui'mʌtʌjcuy juca ja'n chi'i Diojsis.

²⁸ Muspamisʌj ŋgotestigosajtamu que nʌmu'ʌj: Ja'nde' ʌj te' Cristo, sino que cʌ'weju'ʌj Diojsis wa'yʌs nwi'najayu ñe'cʌ.

²⁹ Te' co'tʌjcajupʌ pʌ'nis pyʌjcʌchoŋba te' yomo. Y te' co'tʌc-pʌ'nis ijtu šunbapʌ tyʌwʌ ñe' che'ŋna'oyj tenayupʌ, y quiʌmato'ŋʌpya. Y myatoŋjapya'c chame te' co'tʌc-pʌ'nisñe' jene ñʌ'omba. Te'še'ʌs nʌ'omba ʌs matoŋba'cʌs nʌ quiʌ'maŋyaju Jesús.

³⁰ Pyʌcpa wa'y myujšaju mumu pʌ'nis que ñe'cʌte' te' mʌja'ŋbʌ y que ʌjte' te' cʌmaŋbʌ.

Tzajpojmoc minbapʌ

³¹ Te' wanajcupʌ tzajpojmoc maste' mʌja'ŋbʌ que ja'n ni'iwʌ pʌn. Te' najsacopac-pʌ'nis najsacopajcʌsipʌ tiyʌ chamba. Te' wanajcupʌ tzajpojmoc más mʌja'ŋ que ja'n ni'iwʌ.

³² Y tiyʌ quienu y myatoŋu te'wʌ chamba, y ya'iwʌ's ja'n suni wyʌ'aŋjamjayaju tiyʌta'm chamba.

³³ Pero iwʌ's wyʌ'aŋjamba tiyʌta'm chamba, yʌ'wʌ's chamgopuŋba que Dios wiyuŋdzamba.

³⁴ Iwʌ pʌn Diojsis quiʌ'weju, Diojsis chame chamjapya. Diojsis ja'n quiotzu'tzajay ñe'cʌ te' Espíritu Santo, sino que chi'pa jana yaye.

³⁵ Jene šunu Diojsis te' 'Yune. Te'cotoya quiojtu mumutiyʌ ñe' quiʌ'ojmo.

³⁶ Iwʌ's wyʌ'aŋjamjapya te' 'Yune pya'twa'a ja'n yayepʌ quenguy. Pero iwʌ's ja'n myato'ŋoyjay te' 'Yune, ja'n pya'te te' ja'n yayepʌ quenguy, sino que ñe'cʌ's ijtu quiowa mumu jamacotoya, porque chʌjqui'šca'u Dios.