San Juan 19 - Zoque Copainalá New Testament

¹ Pijche'ca Pilato's yajnacstochʌcʌtʌju te' Jesús.

² Y pye'tyaju apitpʌ corona te' soldado'sta'm y yajyamyaju quiopajcʌsi. Y ya'aŋyo'tʌyaju yʌc-tzapaspʌ pama.

³ Y ñʌjayajpa inʌc: Viva yʌ' judio'sta'm Rey. Y chaŋdochʌquiajpa inʌc.

⁴ Pijche'ca putwʌtzʌjque'tu Pilato, y minu ñʌjayaju: Yʌ'yʌsmij nʌ nʌminjaytyamu fuera'ojmoc wa'mis nʌctʌ'ytyamu que nijutzpʌ quiowa ja'ʌs mba'tjay.

⁵ Y pujtu Jesús yamu'cande' apitpʌ corona y te' yʌc-tzapaspʌ pama. Y ñʌjayaju Pilato's: Quendamʌ yʌy ijtu te' pʌn.

⁶ Y quieñaju'ctij sacerdote-cowi'na'sta'm y soldado'sta'm, weju'c nʌmyaju: Ma'mʌ cruzcʌsi, ma'mʌ cruzcʌsi. Ñʌjayaju Pilato's: Nuctamʌ ne'cʌ, y ma ma'mdamʌ cruzcʌsi, porque ʌs ja'ʌs mba'tjay nijutzpʌ quiowa.

⁷ 'Yaŋdzoŋyaju judio'sta'm: Tʌsne' ijtu tʌs aŋgui'mguy. Y tʌs aŋgui'mgu'yis chamba que pyʌcpa wa'y quia'u, porque Diojsis 'Yunešej chʌjcu wyin.

⁸ Y myatoŋu'ca Pilato's jutz nʌmyaju na'tzaŋgʌtʌjcu.

⁹ Y tʌjcʌwyʌtzʌjcu te' cʌme'tzoquiuy-pyalacio'ojmo, y ñʌjayu te' Jesús: ¿Y mij, njyutʌpa'yʌ'? Pero Jesujsis nijutz ja'yaŋdzowa.

¹⁰ Pijche'ca ñʌjayu Pilato's: ¿Y ja'nja aŋdzowe ʌj? ¿Ja'nja musi que ijtu ʌs aŋgui'mʌtʌjcuy wa'yʌsmij nyajma'mʌtʌju cruzcʌsi, y ijtu ʌs aŋgui'mʌtʌjcuy wa'yʌsmij ndzʌcʌpʌ'u?

¹¹ Aŋdzoŋu Jesús: Nijutzpʌ aŋgui'mʌtʌjcuy mis inʌc jañʌ'itʌ ʌjcʌsi, juca inʌcmij jañchi'ʌ tzajpojmopʌ Diojsis. Te'cotoya te' tzi'oquia'upʌ'sʌj mijcʌsi más ijtu quiowa que ja'n mij.

¹² Desde pijche'cše'ŋoyj chʌcme'tzpa inʌc Pilato's wa'y chʌcʌpʌ'u. Pero judiota'm weju'c inʌc nʌmyajpa: Juca ndzʌcʌpʌ'pamis yʌ'wʌ ndochʌcpamis César. Iwʌ's reyšej chʌcpa wyin ñʌquijpa César.

¹³ Pilato's myatoŋu yʌ'šejta'mbʌ tiyʌ. Pijche'c ñʌca'ŋbutwʌtzʌjcu Jesús, y maŋu pyocsu cʌme'tzoquiuy-pyocscu'yojmo ñʌjayajpapʌ inʌc mosaico ojcapse-lugar, y judio-otowe'ojmoc ñʌjayajpapʌ inʌc Gabata.

¹⁴ Y nʌ inʌc ñimejcʌyaju judio'sta'm tiyʌ'iwʌ te' pascua-sʌŋgotoya, y paŋguc-jamaše'ŋoyjtye' inʌc. Pijche'ca ñʌjayaju te' judiota'm Pilato's: Quendamʌ yʌy ijtu mista'm Rey.

¹⁵ Pero ñe'cʌ'sta'm weju'c ñʌjayaju: Yajʌcʌ'ʌ tey, yajʌcʌ'ʌ tey, ma'mʌ cruzcʌsi. Ñʌjayaju Pilato's: ¿Maŋbaja'ʌs ma'mʌyjayu cruzcʌsi mista'm Rey? Aŋdzoŋyaju sacerdote-cowi'nata'm: Ja'ndiyʌ eyapʌ tʌs rey juca ja'n César.

¹⁶ Pijche'ca chi'oquia'u ñe'cʌcʌsita'm wa'y mya'mʌyaju cruzcʌsi. Y ñuquiaju Jesús, y ñʌmaŋyaju.

Mya'mʌyaju cruzcʌsi te' Jesús

¹⁷ Y ñe'cʌ yajtzʌmyaju te' cruz wa'y ñʌmaŋu te' ñʌjayajpamʌy: Ca'uwʌ coy'awa pac, pero judio-otowe'ojmoc ñʌjayajpapʌ Gólgota.

¹⁸ Tey mya'mʌyaju Jesús cruzcʌsi, y mya'mʌyajque'tu metza'ŋbʌn eyata'mbʌ cruzcʌsi, y Jesús cucmʌ.

¹⁹ Y Pilato's yajma'mʌtʌju tabla cruzcʌsi ja'yʌyupʌcʌsi inʌc yʌ'šej nʌmbamʌy: NAZAREJTOJMOPɅ JESUS, TE' JUDIO'STA'M REY.

²⁰ Y sone judio'sta'm tyu'ñaju te' ja'yʌyupʌ tiyʌ porque te' tijumʌy mya'mʌyaju Jesús cruzcʌsi tome inʌc quienba te' Jerusalén. Y ja'yʌyu inʌc judio-otowe'ojmoc, griego'ojmoc y lati'ŋojmoc.

²¹ Judio'sta'm šacerdote-cowi'na's maŋu ñʌjayaju te' Pilato: Uy ja'yʌy wa'y ñʌmu: JUDIO'STA'M REY, sino que cota' que ñe'cʌte' nʌmu: Ʌjyʌ' judio'sta'm Rey.

²² Aŋdzoŋu Pilato: Nyajayʌtʌjupʌ tiya'mʌs, te'še'ande' tzʌ'pya.

²³ Y te' soldado'sta'm mya'mʌyaju Jesús cruzcʌsi. Pijche'ca wyoctu'mʌyjayaju pyama te' soldado'sta'm y myacscu'y wye'ñaju ñe'co'mota'm. Y tzʌ'quie'tu tajcupʌ ñiyam nijutimʌy inʌc jaña'cʌpʌ.

²⁴ Y nʌmyaju ñe'co'mo te' soldadota'm: Uytyʌ ndzitztamu sino que ma'ndʌ sijtamu yʌ' ñiyam wa'ytyʌ ŋguenu iwʌ's ñe'ajpa. Y te'šej chʌquiaju'c tujcu te' chambašej Totojaye's: Wye'nbʌ'jayaju ʌs mbama ñe'co'mota'm, Y quiosijayaju ʌs niyam. Y te'šej chʌquiaju te' soldado'sta'm.

²⁵ Y tey inʌc ijtyaju Jesujsis cruzaŋi te' ñanaj, y te' ñana's quiose María te' Cleofajsis yomo, y María Magdala-cumgu'yojmowʌ.

²⁶ Quienu'ctij Jesujsis te' ñanaj y ʌj te' šunbapʌ quiʌ'aŋmaye, porque te'yʌj inʌc ijtu, ñʌjayu te' ñanaj: Nanay, yʌ'wʌ tzʌ'pya mis unešej.

²⁷ Jʌsa'ca nʌjaquie'tu'ʌj, ʌj te' quiʌ'aŋmaye: Pʌjcʌchoŋja ʌs nanaj mis nanašej. Desde pijche'cʌs mbʌjcʌchoŋu ndʌjcaŋʌ nanašej.

Ca'u Jesús

²⁸ Pijche'ca Jesujsis ñʌctʌ'yu que chʌcta'nbʌ'wa'a ñe' yoscuy najsacopajcʌsi, y wa'y tyujcu te' chambašej te' Totojaye's, pijche'ca nʌmu: Yoctʌtzpa'ʌj.

²⁹ Tey inʌc ijtu tzima ijtuwo'mo vinagre. Pijche'ca te' pʌ'nista'm yajmujyaju tzowa te' vinagrecʌ'mʌ, y ši'nʌyaju capecʌsi wa'y yajmu'quiaju.

³⁰ Y myu'cu'ctij Jesujsis te' vinagre, nʌmu: Ndzʌcta'nbʌ'wa'mʌs nyoscuy. Pijche'c yajmujquejcu quiopac y chi'oquia'u 'yespiritu Dioscʌsi, y ca'u.

Wyojchaju Jesús che'ŋna'oyj lanzapit

³¹ Pijche'c nʌ inʌc ñimejcʌyaju tiyʌ'iwʌ judio'sta'm te' pascua-sʌŋgotoya. Ja'n inʌc šuñay wa'y chʌ'yaju te' cuerpota'm cruzcʌsi sabado-jamo'oyj porque mʌja'ŋbʌ jamate' inʌc te' sábado. Te'cotoya wya'cjayaju Pilato wa'y maŋu pyu'ŋguitjayatʌju ñeŋepac, y wa'y yajʌcʌ'yatʌju cruzcʌsi te' cuerpota'm.

³² Miñaju jeque te' soldadota'm, minu pyu'ŋguitjayaju ñeŋepacta'm te' nu'myajpapʌ'sñe'. Wina tumʌpʌ'sñe' y jʌsa'ca te' eyapʌ'sñe', te' tey inʌc ma'mʌyajupʌ Jesusji'ŋ.

³³ Pero miñaju ijtumʌy Jesús, y quieñaju que ca'uwa'a, y japyu'ŋguitjaya ñeŋepac.

³⁴ Pero tumʌ te' soldado's wyojtzu Jesús che'ŋna'ojmoc lanzapit y jʌnʌj pujtu nʌ'pingʌnʌ'.

³⁵ Tiyʌ'ʌs nʌ ndzamu ne' nwitʌmbi'tʌste' ŋguenupʌ. Y tiyʌ'ʌs ndzamba wiyuŋbʌ tiyʌte'. Y muspa'ʌs que tiyʌ'ʌs nʌ ndzamu wiyuŋbʌ tiyʌte' wa'mij nwyʌ'aŋja'moytyaŋgue'tu mijta'm.

³⁶ Porque yʌ'šejta'mbʌ tiyʌ tuquiaju wa'ytye' quiota'nbʌ'u te' Totojaye's chambašej: Ja'n maŋu pyu'ŋguitjayaju ñe' pyac.

³⁷ Y nʌmgue'tpa emʌ te' Totojaye: Maŋba ñique'nʌyaju te' wyojchajupʌ.

Ñipyaju Jesús

³⁸ Arimatea'ojmopʌ José, quiʌ'aŋmayete' inʌc Jesujsisñe', pero nu'mdijpʌ porque ña'tzpa inʌc te' judiota'm. Y cʌtʌjcu'ca mumu te'šejta'mbʌ tiyʌ, yʌ'wʌ's maŋu ñʌjayu Pilato: Yajwa'cʌ'ʌj te' Jesujsis cuerpo wa'yʌs maŋu nyajwanajcu. Y Pilato's ñʌjayu: Ma yajwanacʌ. Pijche'ca minu te' José y yajwanajcu te' Jesujsis cuerpo.

³⁹ Y mingue'tu Nicodemo, te' tumnaca quiʌ'tijupʌ's Jesús tzu'cʌsi. Ñʌminu wʌtzʌjcupʌ mirra-omoma y aloespʌ mojsi's libraše'ŋoyj.

⁴⁰ Yajwanacjayaju jeque te' Jesujsis cuerpo, y myoñaju sabana'ojmo. Y ñʌcmo'nʌyaju te' sabana'ojmo omomyajpapʌ tiyʌ. Yʌ'šej inʌc cho'yʌyajpa quia'uwʌ judio'sta'm wa'y ñijpoyaju.

⁴¹ Y tome te' mya'mʌyajumʌy cruzcʌsi Jesús, ijtu inʌc nipi nipi. Y te' nipi nipi'ojmo ijtu inʌc jomepʌ ca'uwʌ tza'tʌc. Te'wo'mo ya'iwʌmajte' jaquiojtyamʌmya.

⁴² Teytya'a quiotjayaju Jesujsis cuerpo te' ca'uwʌ tza'tʌjcoyj, porque tome inʌc, y porque nʌ inʌc ñimejcʌyaju judio'sta'm tiyʌ'iwʌ te' sabado-jamacotoya.