San Juan 15 - Zoque Copainalá New Testament

Te' uva-a'ŋucu y te' 'yaŋmaŋda'm

¹ Tzʌctamʌ cuenta que ʌjte' te' wiyuŋšejpʌ uva-a'ŋucu y ʌs Ndata Diojsis te' quiʌyujpapʌ.

² Mumu aŋmaŋ ja'n tyʌ'mapyʌ ʌjpit maŋba tyʌcpʌ'u ʌs Ndata Diojsis. Y mumu jujche'ŋ tʌ'majpapʌ maŋba yajcʌwaju y quiosucsu wa'y más tyʌ'maju.

³ Pero mijta'm ŋguiʌwajtamwa'mij te' ʌsmij ndzamjaytyamupʌ tzamepit.

⁴ Itjojcʌtʌctamʌ ʌji'ŋ y ʌj maŋba'ʌj itjojcʌtʌjcu mista'm ndzoco'yojmo. Jujcha'nde' te' aŋmaŋda'm ja'n musi tyʌ'maju ñaytyumʌ juca wecspʌ'wa'a 'ya'ŋucucʌsi. Te'šejtijque' mijta'm ja'nmij musi ñdyʌ'majtamu juca ja'nmij itjojcʌtʌctame ʌji'ŋ.

⁵ Ʌjte' te' uva-a'ŋucu, y mijta'mde' te' aŋmaŋda'm. Iwʌ itjojcʌtʌcpa ʌs ndzoco'yojmo, y ʌj ñe' choco'yojmo, yʌ'wʌ jene maŋba tyʌ'maju. Pero iwʌ'sʌj ca'ŋdzacpa yajtiyʌ ja'n ñʌwʌ'ay.

⁶ Iwʌ ja'n itjojcʌtʌqui ʌs ndzoco'yojmo, maŋba pyiŋbutpʌ'yatʌju jujcha' ja'n 'yoyepʌ aŋmaŋ y maŋba tyʌjtzu. Y maŋba quiojtyatʌju jucʌtʌjcojmo wa'y pyoŋbʌ'yaju.

⁷ Juca ʌs ndzoco'yojmo mij itjojcʌtʌctamba, y juca ʌs ndzame itjojcʌtʌcpa mista'm ndzoco'yojmo, wa'ctamʌ tiyʌta'm mis sundamba y maŋba'ʌsmij ndzi'tamu.

⁸ Juca jene ndzʌctambamis tʌm, te'wʌcʌsimis nyajquejaytyamba ʌs Ndata's myʌja'ŋajcuy. Y te'šej mis nyajquejtamba que ʌsmijyʌ' ŋgʌ'aŋmayeta'm.

⁹ Jujcha' ʌs Ndata'sʌj sunba, te'šej ʌsmij sundaŋgue'tpa. Sunjojcʌtʌctamʌ'ʌj ʌsmij sunjojcʌtʌctambašej.

¹⁰ Juca ŋgojamjaytyambamis ʌs aŋgui'mguytya'm, maŋbamisʌj sunjojcʌtʌctamu ʌsmij sunjojcʌtʌctambašej. Ʌs ŋgojamjayu'ʌs Ndata's 'yaŋgui'mguytya'm, y sunjojcʌtʌcpa'ʌs Ndataj ñe'cʌ'sʌj sunjojcʌtʌcpašej.

¹¹ Yʌ'šejta'mbʌ tiyʌ'ʌsmij ndzamjaytyamu wa'y ʌs oma's jyo'ʌyjayu mista'm ndzocoy, y wa'mij 'yomdzocopyactamu.

¹² Yʌ'še'ʌsmij aŋgui'mdamba: Našunʌtʌjtamʌ ne'co'mo, jujcha'ʌsmij ʌs sundamu.

¹³ Juca ŋgoca'yajpatʌ amigota'm te'šejtʌ nyajquejpa que wiyuŋšejtʌ su'nopya.

¹⁴ Mijta'm ʌsmijyʌ' amigota'm juca ndzʌctambamis tiyʌta'mʌsmij aŋgui'mdamba.

¹⁵ Ja'na'ʌsmij coyosašej maŋu ŋgomʌ'ytyamu porque te' coyosa's ja'n myusi tiyʌte' chʌcpa quiomi's. Pero nʌjaytyamwa'mʌsmij que ʌsmijyʌ' amigota'm porque nyajmustamwa'mʌsmij tiyʌta'mʌj yajmatoŋu Ndata's.

¹⁶ Ja'nmisʌjte' mis ŋgopiŋdamu'ʌj sino que ʌsmijte' ŋgopiŋdamu mijta'm. Y ŋgottamu'ʌsmij wa'mis maŋu ndzʌcjaytyamu ʌs Ndata's yoscuy, y uy chaquiaju te' wʌ'aŋja'moquiuy jujche'ŋ wyʌ'aŋjamyajpapʌ's. Te'šejpʌ yoscuy ʌste' sunba. Y tiyʌta'm mis nwa'cjaytyamba ʌs Ndataj ʌs nʌquiʌsi, ñe'cʌ'smij maŋba ñchi'tamu.

¹⁷ Našunʌtʌjtamʌ ne'co'mo. Yʌ'še'ʌsmij aŋgui'mdamba.

Maŋbamij ŋgui'nisʌtʌjtamu jana wʌ'aŋja'moye'sta'm

¹⁸ Juca ŋgui'nisʌtʌjtambamij te' ja'n wyʌ'aŋja'moyapyʌ's, mustamʌ que ʌj te' wina qui'nišajwa'a que ja'n mijta'm.

¹⁹ Juca inʌc mij ja'n nwyʌ'aŋja'moytyame, te' ja'n wyʌ'aŋja'moyapyʌ's šunʌtʌjtambamij inʌc. Pero como nwyʌ'aŋja'moytyambamij, y ʌsmijyʌ' ŋgopiŋbuttamu te' ja'n wyʌ'aŋja'moyapyo'moc, te'cotoyamijte' ŋgui'nisʌtʌjtamba te' ja'n wyʌ'aŋja'moyapyʌ's.

²⁰ Jamwʌtzʌctamʌ tiyʌta'ma'mʌsmij nʌ ndzamjaytyamu ʌs: Ja'n maŋu más myʌja'ŋgomʌ'yaju te' coyospapʌ que ja'nde' quiomi. Yacsnutzʌquiajuše'ʌj, te'šej mij maŋba nyacsnutzʌcʌtʌjtaŋgue'tu. Juca quiojamjayaju ʌs ndzame, te'šej maŋba quiojamjayajque'tu mista'mne'.

²¹ Pero mumu yʌ'šejta'mbʌ tiyʌ maŋbamij ñchʌcjatʌjtamu porque ŋgowʌ'aŋjamjaytyambamis ʌs nʌy, porque ñe'cʌ'sta'm ja'n ispʌquiay te' cʌ'wejupʌ'sʌj.

²² Juca inʌjcʌj jaminʌ y yajtiyʌ'ʌs inʌc jañchamjaya ñe'cʌta'm, ja'ndiyʌta'm inʌc quiowa. Pero yʌtij ja'ndiya' tiyʌ wa'y cha'maŋjayaju wa'y jana ijtyaju quiowa.

²³ Iwʌ'sʌj qui'nispa ʌj, qui'nisjaquie'tpa ʌs Ndataj.

²⁴ Juca inʌjcʌs jañchʌcʌ maya'aŋda'mbʌ isaŋwʌ'ajcuy ñe'co'mota'm ya'iwʌ'smaj jachʌctʌ'ʌpʌ, ja'ndiyʌta'm inʌc quiowa. Pero te'šejta'mbʌ tiyʌpit queñajwa'mʌj ʌj y quienjayajque'tu ʌs Ndataj y qui'nišajpatʌj mejtzji'ŋ.

²⁵ Pero yʌ'šej chʌquiaju'ŋmʌjcʌ tujcu te' chambašej ñe'ta'm 'yaŋgui'mgu'yojmo, te' nʌmbamʌy: Comeque'cti'ʌj qui'nišaju.

²⁶ Pero maŋba'ʌsmij ŋgʌ'wejaytyamu te' Cotzo'ŋopyapʌ. Te'wʌ maŋba chu'cumu ijtumʌy ʌs Ndata Dios. Te'wʌte' te' wiyuŋdzambapʌ Espíritu maŋba quiʌ'wejupʌ ʌs Ndata's. Te'wʌ'sʌj maŋba cotestigosaju ʌj.

²⁷ Y mista'm maŋbamisʌj ŋgotestigosajtaŋgue'tu, porque ʌji'ŋmij ittamu desde que nʌcʌtzo'tzu'ʌs nyoscuy.