San Juan 14 - Zoque Copainalá New Testament

Jesuste' te' nʌtu'ŋajpapʌ'stʌ wa'ytyʌ nu'cu Diosaŋʌ

¹ Uy yajopi'ttame mista'm ndzocoy. Nwʌ'aŋjamdambamis Dios, wʌ'aŋjamdaŋgue'ta'a ʌj.

² Ʌs Ndata's itcu'yojmo wʌwʌ ijtyaju tʌc. Juca inʌc ja'n tye'šej ndzamjaytyamwa'mʌsmij inʌc Maŋba'ʌsmij jeque nimejcʌyjaytyamu lugar.

³ Y juca maŋba ʌj, y nimejcʌyjaytyamba'ʌsmij lugar, mingue'tpati'ʌj. Y ʌstijmij minba mbʌctaŋgue'tu wa'y jutʌ'ʌj ijtu ʌj teymʌ mij maŋba ittaŋgue'tu.

⁴ Mustambamis jutʌ'ʌj maŋba ʌj, y mustaŋgue'tumis te' tuŋ.

⁵ Ñʌjayu Tomajsis: Señor, ja'ndʌs musi jutʌmijte' myaŋba, ¿jutza'ndʌs maŋba mujsu te' tuŋ?

⁶ Ñʌjayu Jesujsis: Ʌjte' te' ocnʌctu'ŋʌ'opyapʌ, ʌjpit myujšajpa wiyuŋbʌ tiyʌ, y ʌste' sajpa ja'n yayepʌ quenguy. Ya'iwʌ ja'n musi myaŋu ʌs Ndata Diosaŋʌ juca ja'n ʌjpit.

⁷ Juca inʌc misʌj ispʌctamba ʌj, te'šejtijmis inʌc ispʌcjaytyaŋgue'tpa ʌs Ndataj. Y desde yʌtij ispʌctambamis y ŋguendamwa'mis.

⁸ Ñʌjayu Felipe's: Señor, yajquenatʌj te' mis Ndata Dios y tzocopyacpatʌj.

⁹ Y ñʌjayu Jesujsis: Sone aŋsʌ'ŋa'mʌj ijtu miji'ŋda'm y ¿ja'nmaja'ʌj ispʌqui mis Felipe? Iwʌ'sʌj quenwa'a ʌj, quienjawya'mʌs Ndataj. ¿Tiyajca'nde' ñʌmbamij: Yajquenatʌj mis Ndata Dios?

¹⁰ ¿Y ja'nja nwʌ'aŋjamdame que ʌj, ʌs Ndata's choco'yojmo'ʌj ijtu, y ʌs Ndataj ijtu ʌsne' ndzoco'yojmo? Y tiyʌta'mʌsmij ndzamjaytyamba ja'nde' ʌsne' ŋgo'quips ndzame, sino que ʌs Ndata'sñe', te' ʌs ndzoco'yojmo ijtupʌ, jujche'ŋ wʌta'mbʌ tiyʌ ñe'cʌ'ste' chʌcpa.

¹¹ Wʌ'aŋjamdamʌ'ʌj que ʌj Ndata's choco'yojmo'ʌj ijtu, y ʌsne' ndzoco'yojmo ijtu ʌs Ndataj. Juca ja'nmis suni nwʌ'aŋjamjaytyamu ʌs ndzame, wʌ'aŋjamdamʌ'ʌj nʌ'ʌs ndzʌquiajupʌ tiyʌpit.

¹² Wiyuŋše'ʌsmij nwiyuŋdzamjaytyamba: Iwʌ'sʌj wʌ'aŋjamba ʌj, jujche'ŋ tzʌqui ʌs ndzʌcpapʌ maŋba chʌjque'tu ñe'cʌ's. Y más mʌja'ŋda'mbʌ tiyʌ maŋba chʌjcu, porque ʌj maŋba'ʌj Ndata'ŋʌ.

¹³ Y tiyʌta'm mis nwa'cjaytyamba ʌs Ndataj ʌs nʌquiʌsi, te'wʌ ʌs maŋba ndzʌjcu. Te'še'ʌs maŋba ndzʌjcu wa'y quieju ʌs Ndata Diojsis myʌja'ŋajcuy ʌj, te' 'Yunepit.

¹⁴ Juca nwa'ctambamis tiyʌ'iwʌ ʌs nʌquiʌsi, te'wʌ ʌs maŋba ndzʌjcu.

Chamdzi'oquia'u Jesujsis te' Espíritu Santo

¹⁵ Juca sundambamisʌj, cojamjaytyamʌ ʌs aŋgui'mguy.

¹⁶ Y ʌs maŋba'ʌs nwa'cjayu Ndata Dios, y maŋbamij ŋguiʌ'wejaytyamu eyapʌ Cotzo'ŋopyapʌ. Ñe'cʌ maŋba chʌ'yu miji'ŋda'm mumu jamacotoya.

¹⁷ Te'wʌte' te' Espíritu Santo, wiyuŋdzambapʌ. Iwʌ'sʌj ja'n wʌ'aŋjame ʌj ja'n maŋu pyʌjcʌchoŋu te' Espíritu porque ja'n quiene ni ja'n ispʌqui. Pero mis ispʌctambamis porque miji'ŋda'm ijtu, y itwa'a mista'm ndzoco'yojmo.

¹⁸ Ja'ʌsmij yaŋbacšej maŋu ndzactamu. Maŋba'ʌsmij ŋgʌ'mindaŋgue'tu.

¹⁹ Uša'ŋ horacʌsi ja'nʌj wʌ'aŋjamyapyʌ's ja'namʌj queñajque'temaj, pero mis maŋbamisʌj ŋguenwʌtzʌctamu. Porque ijtu ʌs ŋguenguy ʌsne', te'šejtijque' mista'mne' maŋba itque'tu mista'm ŋguenguy.

²⁰ Ʌ' jamo'oyj maŋbamis nʌctʌ'ytyamu que ʌj, ʌs Ndata's choco'yojmo'ʌj ijtu, y mijta'm ʌsne' ndzoco'yojmo, y ʌj mista'm ndzoco'yojmo.

²¹ Iwʌ's ñʌctʌ'yjapya ʌs aŋgui'mguytya'm y quiojamba, te'wʌ'sʌjte' sunba. Y iwʌ'sʌj sunba ʌj, maŋba šunu ʌs Ndata's, y ʌs maŋba'ʌs sunu, y maŋba'ʌs nyajquenu nwin.

²² Te' Judas, pero ja'n Judas Iscariote, nʌmu yʌ'šej: Señor, ¿jutza'ndʌjte' maŋba nya'ispʌjcu nwin tʌj, y ja'nmis maŋu nya'ispʌquiajque'tu nwin te' ja'n wyʌ'aŋja'moyapyʌ?

²³ Aŋdzoŋu Jesús: Iwʌ'sʌj sunba, quiojamjapya ʌs ndzame. Y ʌs Ndata's maŋba šunu, y ŋgʌ'minbatʌs ñe'cʌ y minbatʌj ijtu ñe' choco'yojmo.

²⁴ Iwʌ'sʌj ja'n suni, ja'n quiojamjay ʌs ndzameta'm. Y te' tzame matoŋdamupa'mis ja'nde' ʌsne' ŋgo'quips ndzame, sino que ʌs Ndata'sñe' te' cʌ'wejupʌ'sʌj.

²⁵ Yʌ'šejta'mbʌ tiyʌ'ʌsmij ndzamjaytyamu yʌmya'ʌj ijtu'cše'ŋoyj miji'ŋda'm.

²⁶ Pero ʌs Ndata's maŋba quiʌ'weju ʌs nʌquiʌsi te' Cotzo'ŋopyapʌ, y yʌ'wʌte' te' Espíritu Santo. Ñe'cʌ'smij maŋba 'yaŋmaytyamu mumutiyʌcʌsi, y nyajamwʌtzʌctamu tiyʌta'mʌsmij ndzamjaytyamupʌ.

²⁷ Sunba'ʌs wa'mij sʌ'mnayu'c ittamu, ʌj sʌ'mnayu'c itpašej te'še'ʌs sunba wa'mij sʌ'mnayu'c ittamu. Te' ja'n wyʌ'aŋja'moyapyʌ's ñʌjaytyambamij wa'y ittamu mista'm sʌ'mnaquiuy, pero ʌs ja'ʌs te' najsacopac sʌ'mnaquiuy ndzame. Uy yajopi'ttame mista'm ndzocoy, ni uy na'tztame.

²⁸ Matoŋdamwa'mis jutzʌsmij ndzamjaytyamu: Maŋba'ʌj Ndata Diosaŋʌ, y mingue'tpati'ʌj mi'ojmota'm. Juca wiyuŋšej misʌj sundamba nʌ'omdambamis inʌc, porque nʌtzamdamwa'mʌsmij que maŋba'ʌj Ndata'ŋʌ. Porque ʌs Ndataj más mʌja'ŋ que ja'n ʌj.

²⁹ Nʌytya'mʌsmij ndzamjaytyamu yʌtij antes que tucpa wa'mis nwʌ'aŋjamdamu tiyʌta'mʌsmij ndzamjaytyamu te' maŋu'ca'mʌj.

³⁰ Ja'na'mʌj jene maŋu ndzamdzamnayu miji'ŋda'm porque jʌ'nʌ'a maŋba minu yʌ' najsacopajqui's yatzi-cowi'na. Pero te'wʌ's ja'nʌj aŋgui'mi ʌj.

³¹ Pero ʌs ndzʌcpa'ʌs aŋgui'muše'ʌj Ndata's wa'y myujšaju te' ja'n wyʌ'aŋja'moyapyʌ's que ʌs sunba'ʌs Ndata Dios. Tzu'cumdamʌ, y ma'nta'm.