San Juan 12 - Zoque Copainalá New Testament

Tumʌ yomo's jyajsu Jesús

¹ Y tujta'y jamacʌsimaj tzo'tzpa'c te' pascua-sʌŋ Jerusale'ŋojmo, minu Jesús Betania'ojmo. Nu'cu ijtumʌy Lázaro, te' ca'upʌ inʌc y yajwinsa'u ca'yajupʌ'ojmoc.

² Y chʌcjayaju tey ujcaŋbajcuy Jesús. Y Marta's minu quiojtu mesa'ojmo. Y Lázaro tey inʌc pocsu mesa'ŋi Jesusji'ŋ eyata'mbʌ'ojmo.

³ Pijche'ca Maria's pyʌjcu tumʌ libra jajsoquiuy cʌ'wingʌ'pyʌ nardo-omoma, wʌwʌ coyowapʌ. Y jyasjayu Jesujsis ñe'ŋbac y quiomocjayu wyapyit. Y entero tʌjcaju te' nardo-omoma.

⁴ Tey inʌc ijtu tumʌ te' Jesujsis quiʌ'aŋmaye ñʌjayajpapʌ Judas Iscariote, Simo'ŋis 'yune. Te'wʌ'ste' inʌc maŋba mya'ʌyu Jesús. Yʌ' Judas nʌmu:

⁵ ¿Tiyajca'yʌ' jamya'ʌya yʌ' jajsoquiuy yʌjti's denariocʌsi wa'y chi'yatʌju pobreta'm?

⁶ Pero nʌmu yʌ'šej ja'n porque tyo'ya'ŋʌyajpa inʌc pobre, sino que nu'mbapʌte' inʌc. Y ñe'cʌ'ste' inʌc quioquenba te' tumin-tzunu, y ya'aŋjecpa inʌc te' tumin.

⁷ Pijche'ca Jesujsis ñʌjayu: Tzacʌ te' yomo porque quioquenu yʌ' jajsoquiuy wa'yʌj jajsu winatij porque maŋba'ʌj nipyaju.

⁸ Porque te' pobreta'm mumu jama ijtyajpa miji'ŋda'm. Pero ʌj, ja'nʌj mumu jama maŋu ijtu miji'ŋda'm.

Quiʌquipsʌyaju Lázaro

⁹ Pijche'ca wʌwʌ te' judio-pʌ'nista'm ñʌctʌ'yaju que Betania'ojmo inʌc ijtu Jesús. Y miñaju, ja'n wa'ytyij quieñaju Jesús, sino que wa'y quieñajque'tu Lázaro, te' yajwinsa'upʌ Jesujsis te' ca'yajupʌ'ojmoc.

¹⁰ Pero te' sacerdote-cowi'na'sta'm chamyaju'ctya'nde' ñe'co'mo wa'y yajca'yajque'tu Lázaro.

¹¹ Porque Lazaropit soneta'mbʌ judio's inʌc nʌ chaquiaju ñe' wyʌ'aŋja'moquiuy wa'y quio'ŋyaju Jesús.

Tʌjcʌyu Jesús Jerusale'ŋojmo

¹² Y jo'pit te' wʌwʌ pʌn minu quiosʌ'ŋajyajupʌ's myujšaju que maŋba inʌc minu Jesús Jerusale'ŋojmo.

¹³ Pijche'ca pyʌquiaju sa'ŋi-ay y maŋu pyʌjcʌchoŋyaju Jesús. Y weju'c inʌc nʌmyajpa: Viva. Wʌcotzamda'mitʌy yʌ' Israel-pʌ'nista'm Rey yʌy nʌ minupʌ Diojsis ñʌquiʌsi.

¹⁴ Y pya'tu Jesujsis tumʌ burro-une, y pocsu ñe'cʌcʌsi. Porque yʌ'šejte' ja'yʌyu:

¹⁵ Uy na'tztame tʌwʌy, Sioŋ-gumguy itita'm, Yʌy nʌ minu mis Rey, Pyocsupʌ's burro-une.

¹⁶ Wina tʌs, te' quiʌ'aŋmaye's, jañʌctʌ'yʌtʌs yʌ'šejta'mbʌ tiyʌ. Pero qui'mu'ca tzajpojmo te' Jesús, pijche'ctʌs njamwʌtzʌjcu que yʌ'šejta'mbʌ tiyʌ ja'yʌyupʌte' chambamʌy ñe'cʌ. Y yʌtij tucwa'a te'šej ja'yʌyušej.

¹⁷ Ijtyaju inʌc pʌnda'm Jesusji'ŋ wyeju'c Lázaro cha'tʌjcojmoc, te' yajwinsa'u'c ca'yajupʌ'ojmoc. Yʌ'ta'mbʌ's quiotzamyaju jutz chʌjcu.

¹⁸ Te'cotoyate' maŋu choŋyaju te' pʌ'nista'm Jesús. Porque myujšaju'cande' que ñe'cʌ's chʌjcu yʌ' isaŋwʌ'ajcuy.

¹⁹ Pero te' fariseota'm nʌmyaju ñe'co'mo: ¿Nguendamwa'ja que yajtiyʌtʌ ja'n nʌwʌ'ajtame? Quendamʌ naswindumʌpʌ's nʌ wyʌ'aŋjamyaju y nʌ quiʌ'maŋyaju ñe'cʌ.

Griego'sta'm minu mye'chaju Jesús

²⁰ Y te' qui'myajupʌ'ojmo wa'y minu quiʌna'tzʌyaju Dios te' sʌ'ŋoyj ijtyaju inʌc griegota'm.

²¹ Quiʌnu'cʌyaju jeque yʌ'ta'mbʌ's te' Felipe Betsaida-cumgu'yojmopʌ, Galilea's quiowindzʌmbapʌ, y minu ñʌjayaju: Señor, sunbatʌs ŋguenu Jesús.

²² Y Felipe'sa maŋu chamjayu Andrés. Pijche'ca Andrejsis, y Felipe's maŋu chamjayaju Jesús.

²³ Pijche'c Jesujsis 'yaŋdzoŋyaju: Nu'cwa'nde' aŋsʌŋ wa'yʌj yajmʌja'ŋaju Diojsis ʌj, te' Pʌ'nis 'Yune.

²⁴ Wiyuŋše'ʌsmij nwiyuŋdzamjaytyamba juca te' trigo-puj ja'n quiuni najsojmo wa'y quia'u, ñaytyumʌ tzʌ'pya. Pero juca ca'apa, maŋba pyucsu wʌwʌ eyata'mbʌ tʌmbu.

²⁵ Iwʌ's jene tyo'ya'ŋʌpya wyin yʌy maŋba yajtocoyu. Pero iwʌ's chi'oquia'pa wyin yʌy najsacopajcʌsi nʌte' quioquenu ja'n yayepʌ quenguquiotoya.

²⁶ Juca iwʌ's sunba chʌcjayu ʌs nyoscuy, yajco'ŋa'ʌj. Y maŋbamʌ'yʌj ijtu ʌj teymʌ maŋba itque'tu yosjapyapʌ'sʌj. Juca iwʌ'sʌj sunba yosjayu, te'wʌ maŋba wyi'naŋgojtu ʌs Ndata's.

Jesujsis 'yaŋgocasʌyu que maŋba yajca'yaju

²⁷ Yʌtij maya'a'ŋʌj nʌ ndoyapʌjcu ndzoco'yojmo. ¿Tiya'mʌs ndzamjaytyʌ'wa' Ndataj? ¿Maŋbasʌ'ŋʌs nʌjayu: Tatay, yajcotzoca'ʌj yʌtijpʌ'ʌs ndoyapʌjcu'yojmo? Ja'nde, ja'ʌs ndzame te'šej, porque nu'cupa'yʌ' hora wa'yʌj ndoyapʌjcu.

²⁸ Pero maŋba'ʌs nʌjayu: Tatay, ʌs ŋga'aŋbit wa'y quienjayaju que mʌja'ŋbʌte' mis nʌy. Pijche'c 'yaŋdzoŋu Diojsis tzajpojmoc, y ñʌjayu: Nyajmʌja'ŋajwa'mʌs, y maŋbama'ʌs nyajmʌja'ŋajque'tu.

²⁹ Y te' tey inʌc ijtyajupʌ's myatoŋyaju jutz 'yaŋdzoŋu, y nʌmyajpa inʌc: Jititcʌte'. Y eyata'mbʌ nʌmyaju: Angelejsiste' 'yoto'ŋʌyu.

³⁰ Ñʌjayaju Jesujsis: Aŋdzoŋu te'šej ja'nde' ʌjcotoya, sino que mijcotoyata'mde'.

³¹ Yʌtij nʌ cho'tzu wa'y quio'aŋgʌyaju najsacopajcʌsita'mbʌ's porque yʌ'še'ʌj nʌ tzʌquiaju. Yʌtij te' najsacopajcʌsipʌ yatzi-cowi'na ndʌŋgʌtejwa'mʌs.

³² Y yajqui'myaju'ca'mʌj cruzcʌsi, mumu pʌ'nʌs maŋba njʌ'cminbʌ'u ʌ'aŋi wa'yʌj ʌj nique'nʌyaju.

³³ Y Yʌ'šej chamu Jesujsis wa'ytye' yajnʌctʌ'yaju pʌnda'm jutzte' inʌc maŋba quia'u.

³⁴ 'Yaŋdzoŋyaju te' pʌ'nista'm: Aŋmayutʌs te' aŋgui'mgu'yojmo que yajujche'c ja'n maŋu quia'u te' Cristo. ¿Tiyajca'nde' ñʌmbamij que pyʌcpa wa'y yajqui'myaju cruzcʌsi te' Pʌ'nis 'Yune? ¿Iwa' jequete' te' Pʌ'nis 'Yune?

³⁵ Pijche'c Jesujsis ñʌjayaju: Yʌy najsacopajcʌsi uša'ŋ horatya'mʌsmijyʌ' maŋba sʌ'ŋgʌtzʌcjaytyamu, te'šej wittamʌ umij mbya'tewʌ'ajtamu pi'tza'ŋajcʌ's. Porque iwʌ witpa pi'tza'ŋajcu'yojmo ja'n myusi jutʌte' nʌ myaŋu.

³⁶ Nʌ'cše'ŋo'yʌsmij sʌ'ŋgʌtzʌcjaytyamu wittamʌ ʌs sʌ'ŋgʌ'ojmo, wa'mis mustamu tiyʌte' te' wiyuŋšejpʌ sʌ'ŋgʌ'. Yʌ'šejta'mbʌ tiyʌ chamu Jesujsis, y maŋu quiʌwʌ'nu wyin.

Judio'sta'm jawyʌ'aŋjamya Jesús

³⁷ Ñempe chʌjcu Jesujsis sone isaŋwʌ'ajcuy ñe'ta'm wyi'naŋdʌjqui jawyʌ'aŋjamya.

³⁸ Jawyʌ'aŋjamya wa'ytye' tyujcu te' tzame jya'yʌyušej tza'maŋwa'opyapʌ Isaiajsis, nʌmu'c: ¿Señor, iwʌ'sasʌ'ŋ wyʌ'aŋjamjawya'a tʌs ndzamgopuŋupʌ tiyʌ? ¿Y iwʌ'sasʌ'ŋ ñʌctʌ'yjawya'a tʌ Ngomi's pyʌmi?

³⁹ Te'šej jeque jawyʌ'aŋjamya te'ta'mbʌ's, porque nʌmgue'tu emʌ Isaías:

⁴⁰ Diojsis jyajsaŋga'mjayaju wyitʌm, y yajnuyu'ajayaju chocoy, Wa'ytyij jana quieñaju wyitʌmbit y uy ñʌctʌ'yaju choco'yojmo, Wa'yʌj cʌwitu'ʌyaju ʌj, wa'yʌs nyajcotzoquiaju.

⁴¹ Yʌ'šejta'mbʌ tiyʌ chamu Isaiajsis quienjayu'c tʌ Ngomi's chi'muŋgʌ', y te'šej chamu ñe'cʌ.

⁴² Ñempe te'šej chamu, soneta'mbʌ cowi'na's wyʌ'aŋjamyaju Jesús. Pero ja'n inʌc quiowʌ'aŋjamyay porque ña'chajpa inʌc te' fariseota'm uy maŋu myacpujtyatʌju judio-windʌjcojmoc.

⁴³ Porque más inʌc šuñajpa wa'y pʌ'nista'm myʌja'ŋdzʌquiaju que ja'n wa'y Diojsis myʌja'ŋdzʌquiaju.

Jesujsis chame's maŋba quiʌme'chaju pʌn

⁴⁴ Pero Jesús weju'c nʌmu: Iwʌ'sʌj wʌ'aŋjamba ʌj ja'nde' na' ʌjtij wʌ'aŋjame, sino que wyʌ'aŋjamgue'tpa te' cʌ'wejupʌ'sʌj.

⁴⁵ Y iwʌ'sʌj quenba ʌj, nʌte' quienu te' cʌ'wejupʌ'sʌj.

⁴⁶ Ʌj minu'ʌj najsacopajcʌsi wa'yʌs sʌ'ŋgʌtzʌcjayaju pʌ'nista'm chocoy wa'y mumu iwʌ'sʌj wʌ'aŋjamba ʌj u'ya wyijtyaju pi'tza'ŋajcu'yojmo.

⁴⁷ Iwʌ's myatoŋba ʌs ndzambapʌ tiyʌ y ja'n quiojame, ʌs ja'nʌs ŋgʌme'tze. Jaminʌ'ʌj wa'yʌs ŋgʌme'chaju najsacopajcʌsita'mbʌ pʌn, sino que wa'yʌs nyajcotzoquiaju.

⁴⁸ Ijtu iwʌ's quiʌme'chajpa te' je'ŋjayajpapʌ'sʌj y ja'n pyʌjcʌchoŋjay ʌs ndzambapʌ tiyʌ. Te' ʌs nʌ ndzamupʌ tiyʌ, te'wʌ's maŋba quiʌme'chaju ultimopʌ jamo'oyj.

⁴⁹ Porque jañchamʌ'ʌs ne' ŋgo'quips. Ʌs Ndata'sʌj cʌ'weju, y ñe'cʌ'sʌj aŋgui'mu jutzʌj wa'y nʌmu y jutzʌs wa'y ndzamu.

⁵⁰ Y ʌs muspa'ʌs que ñe'cʌ'sʌj aŋgui'myajupʌ tiyʌ yospa ja'n yayepʌ quenguquiotoya. Y tiyʌta'mʌj Ndata's aŋgui'mu, na' te'wʌ ʌs ndzamba.