Hechos 3 - Zoque Copainalá New Testament

Tzojcu te' ne'ŋyacšnupʌ pʌn

¹ Te' Pedro y te' Juan nʌ inʌc tyumʌqui'myaju wa'y myaŋyaju templo'aŋʌ las tresše'ŋoyj, Dios-oto'ŋʌquiuy hora'oyj.

² Ijtu inʌc tumʌ pʌn yacšnupʌ's ñe'ŋbac, te'šejtya'a pʌ'najupʌ. Ñʌmiñajpa inʌc te'wʌ tumdumʌ jama te' templo-tʌjcʌquiu'yoyj, quiotjayajupʌ's ñʌy Hermosa Puerta. Quiojtyajpa inʌc tey wa'y wya'cu tiyʌ'iwʌ tʌjcʌyajpapʌcʌsi te' templo'ojmo.

³ Quienu yʌ'wʌ's que maŋba tyʌjcʌyaju te' Pedro y te' Juan te' templo'ojmo. Y wya'cʌ'yu wa'y chi'yaju limosna.

⁴ Pedro's, te' Juaŋji'ŋ ñique'nʌyaju, y ñʌjayu Pedro's: Nique'nʌtʌj.

⁵ Pijche'ca te' ne'ŋyacšnupʌ's quiengʌpʌjcʌ'yaju y nʌ inʌc jyo'cu wa'y chi'yaju tiyʌ'iwʌ.

⁶ Pero te' Pedro nʌmu: Ja'ndiyʌ ʌs mblata ni ʌs oro, pero ndiyʌ ʌs ijtu, te'wʌ'ʌsmij ndzi'pa. Nazarejtojmopʌ Jesucristo's ñʌquiʌsi tzu'cumʌ y ca'ŋʌ.

⁷ Y jyascʌtʌjcʌyu chʌ'naŋbʌ quiʌ'cʌsi y yajtenaqui'mu. Pijche'ctij paquipʌjcu te' ñe'ŋbac y pyoquipac,

⁸ tʌptongui'mu'c tenayu y ca'ŋnitzʌjcu. Y ca'ŋdʌjcʌyu ñe'cʌji'ŋda'm templo'ojmo, y tʌpwijtu'c inʌc wyʌcotzamba Dios.

⁹ Y mumu pʌ'nis quieñaju jutz ca'ŋba y wyʌcotzamba Dios.

¹⁰ Ispʌquiajpa inʌc que te'wʌte' inʌc pocspa wa'y wya'cu templo's tyʌjcʌquiu'yoyj, quiotjayajupʌ's ñʌy Hermosa Puerta. Jopi'tyaju y maya'yaju yʌ'še'a quiʌtʌcjayu'c te' ne'ŋyacšnupʌ.

Tzamgopu'ŋoyu Pedro Salomo'ŋis šetzecʌsi

¹¹ Tey inʌc nuctzo'ŋajpa Pedro y Juaŋgʌsi te' tzojcupʌ, te' yacšnupʌ's inʌc ñe'ŋbac. Pijche'ctij quiʌ'miñaju cumgupyʌ'nis te' ñʌjayajpapʌ Salomo'ŋis šetze'oyj, y jowya'pʌ'yaju.

¹² Yʌ'še'a quienu'c Pedro's, ñʌjayu te' pʌnda'm: Israel-pʌnda'm, ¿tiyajca' nʌmaya'tamba yʌ'wʌ? ¿Y tiyajca' tʌj ŋguengʌpʌctamba? ¿Ngomʌ'ytyambaja que tʌsyʌ' isaŋwʌ'ajcupyit o tʌs nwʌ'ajcupyit nʌtʌs nyajca'ŋu yʌ'wʌ?

¹³ Te' Abrahán, te' Isaac, y te' Jacob, y te' eyata'mbʌ tʌ nwinata'mbʌ ndata's Diojsis yajqueju que mʌja'ŋbʌte' te' 'Yune Jesús. Y sunu'c chʌcʌpʌ'tʌ'ʌ Pilato's, mis ndzi'oquia'tamu y ñʌmdamumij wyi'naŋdʌjqui que ja'ne.

¹⁴ Y jašundamʌmis yʌ' Masanbʌ y Justopʌ. Nwa'ctamumis wa'y chʌcʌpʌ'u te' yajca'opyapʌ.

¹⁵ Nyajca'tamumis te' tzi'papʌ'stʌ iscuy-quenguy. Y te'wʌ yajwinsa'u Diojsis ca'yajupʌ'ojmoc, y te' ŋguenupʌ tiyʌtʌs, te'wʌtʌs ndzamba.

¹⁶ Y yʌ' Jesujsis ñʌquiʌsipʌ wʌ'aŋjamgupyit yajtzojcu Jesujsis yʌ' pʌn nʌmis ŋguendamupʌ y ispʌctambapʌmis. Te' Jesujsistʌ tzi'tambapʌ wʌ'aŋjamgupyit, ijtu yʌ'wʌ's cota'nupʌ ša'sa'ajcuy mista'm nwi'naŋdʌjqui.

¹⁷ Tʌwʌta'm, muspa'ʌs que como ja'nmis inʌc nʌctʌ'ytyame, te'cotoya nyajca'tamumis te' Jesús, mista'm y mista'm ŋgowi'na's.

¹⁸ Pero te'šej chʌcwa'a Diojsis chamušej wina te' cha'maŋwa'oye'sta'm 'yaŋnacapit que maŋba inʌc tyoyapʌjcu te' Cristo.

¹⁹ Te'cotoya, quipswitu'tamʌ y tzi'tamʌ ndzocoy Dios wa'y quiotocoyu mista'm ŋgowa. Tey jʌ'ʌ, nimeque'ctijmij maŋba ñchi'tamu tʌ Ngomi's te' sʌ'mnayupʌ itcuy, nu'cu'ca aŋsʌŋ.

²⁰ Y maŋba quiʌ'weju te' Jesucristo Diojsis, porque quiopiŋu wina te'wʌ mijcotoyata'm.

²¹ Pero wiyuŋšej ijtu pyena wa'y teymʌ ijtu Jesucristo tzajpojmo hasta que nu'cpa te' aŋsʌŋ wa'y jyomecotzʌcpʌ'u mumutiyʌ. Porque te'šejte' chamu Diojsis cʌtʌquiajupʌ aŋsʌ'ŋojmo masanda'mbʌ cha'maŋwa'oye's 'yaŋnacapit.

²² Y Moisejsis chamjayaju tʌta'm ndataj: Mista'm Ngomi Diojsis maŋbamij ŋguiʌ'wejaytyamu tza'maŋwa'oye mista'm nʌ'pin-dʌwʌ'ojmocpʌ jujcha' ʌj. Ñe'cʌ cʌmato'ŋʌytyamʌ tiyʌta'm mij ñchamjaytyamba.

²³ Y maŋba tyocoyoctujcu te' pʌ'nojmota'm jujche'ŋbʌ'nis ja'n quiʌmato'ŋʌyay yʌ' tza'maŋwa'oye.

²⁴ Y mumu tza'maŋwa'oye's chamyajupʌ tiyʌ desde te' Samuel y te' jʌsa'cta'mbʌ's, quiotzamyaju yʌ'ta'mbʌ jama.

²⁵ Mijta'm, tza'maŋwa'oye's mijyʌ' quiʌwo'mata'm, y nʌ'ittamumis te' Diojsis chamdzi'yajupʌ tiyʌ tʌta'm ndataj. Yʌ'šej chamjayu Diojsis te' Abrahán: Y misne' ŋgʌwo'mapit maŋba'ʌs nicomasa'nʌpyʌ'u mumu najsacopajcʌsipʌ pʌn.

²⁶ Mijcotoyata'm yajminu Diojsis te' 'Yune, y quiʌ'weju wina mi'ojmota'm wa'mij ñicomasa'nʌytyamu y wa'mij nyajtzactamu tumduma'ŋbʌn mista'm nyacha'cuy.