Hechos 2 - Zoque Copainalá New Testament

Minu te' Espíritu Santo

¹ Nu'cu'cande' te' Pentecostes-jama tumo'oyjtya'm inʌc quipsoquiuy tumʌ ijtyajumʌy.

² Y tumnacacʌsi minu ju'ucʌ tzajpojmoc y myatoŋyaju jujcha' nʌ pyoyu'c pʌmipʌ sawa. Y jyo'ʌyu te' ju'ucʌ's mumu te' tʌc pocšajumʌy.

³ Quieñaju totz jucʌtʌcšejta'mbʌ, y tzʌ'yu tumduma'ŋbʌngʌsi.

⁴ Pijche'ca pa'ŋna jyo'ʌyaju Espíritu Santo's. Y chamgʌ'yaju wi'ni eyata'mbʌ otowe, chi'yajpašej inʌc te' Espíritu Santo's wa'y chamdzamnayaju.

⁵ Pijche'cta'm te' Jerusale'ŋoyj ijtyaju, inʌc tumʌtzocoy cʌna'tzʌ'oyajpapʌ judio-pʌn. Yʌ'ta'mbʌ mumu najsacopajcʌsipʌ nacio'ŋojmocte' miñajupʌ.

⁶ Yʌ'še'a cʌtʌjcu'c te' ju'ucʌ, tu'mʌyaju wʌwʌ pʌn. Y jopi'tyaju myatoŋyaju'ca tumduma'ŋbʌ'nis jutz inʌc nʌ chamdzamnayaju ñe' 'yotowe'ojmo.

⁷ Jowya'pʌ'yaju y maya'yaju y nʌmyaju: Matoŋdamʌ, ¿y ja'nja jeque yʌ' Galilea-pʌnda'm mumu yʌ' nʌ chamdzamnayajupʌ?

⁸ ¿Jutza' jeque nʌtʌs matoŋu que tzamdzamnayajpa tumduma'ŋbʌn tʌsne' mbʌ'na'aŋ otowe'ojmoc?

⁹ Partia'ojmocta'mbʌ, Media'ojmocta'mbʌ, Ela'mojmocta'mbʌ, y tʌj Mesopotamia-iti, y Judea'ojmocta'mbʌ, y Capadocia'ojmocta'mbʌ, Ponto'ojmocta'mbʌ, y te' Asia'ojmocta'mbʌ,

¹⁰ te' Frigia'ojmocta'mbʌ, te' Panfilia'ojmocta'mbʌ, y te' Egipto'ojmocta'mbʌ, y uša'ŋde' Africa'ojmocpʌ tome quienbamʌy te' Cirene, y Roma'ojmocta'mbʌ judío yʌy ijtyajupʌ, y te' tumʌtzʌquiajupʌ ñe'cʌji'ŋda'm,

¹¹ y te' Creta'ojmocta'mbʌ, y te' Arabia'ojmocta'mbʌ's nʌtʌs matoŋu nʌ chamyaju tʌs otowe'ojmo te' mʌja'ŋda'mbʌ tiyʌ chʌjcupʌ Diojsis.

¹² Y mumu jowya'pʌ'yaju y jamyujša tiyʌ wa'y chʌquiaju. Nʌ inʌc nañʌmjayatʌju: ¿Tiya'yʌ' nʌ quiʌtʌjcupʌ?

¹³ Pero eyata'mbʌ's quitzcu'yajyaju y nʌmyajpa inʌc: Yʌ'ta'mbʌ nʌyʌ' ño'tyajupʌ.

Tzamgopu'ŋoyu Pedro

¹⁴ Pijche'ca tenaqui'mu Pedro te' mactuma'pyʌ tyʌwʌji'ŋ y paqui ñʌjayaju: Judio-pʌnda'm y jujche'ŋmij Jerusale'ŋojmo ittamupʌ, matoŋjaytyamʌ ʌs ndzame y mustamʌ tiyʌyʌ' nʌ tyujcu:

¹⁵ Ja'nyʌ' nʌ ño'tyajupʌ yʌ'ta'mbʌ mis ŋguipstambašej, porque las nueveše'ŋopyʌmajyʌ'.

¹⁶ Pero yʌ'šejte' chamnitzajcu te' tza'maŋwa'opyapʌ Joe'lis:

¹⁷ Yʌ'šej maŋba tyujcu te' ultimota'mbʌ jamo'oyj, nʌmu Dios, Maŋba'ʌs ŋgʌ'weju ʌs Espíritu mumu pʌngʌsi. Y maŋba cha'maŋwa'oyaju mista'm njaya-une y nyomo-une. Maŋba quieñaju quene mis soca'sta'm, Y maŋba ñapašʌyaju mis ndzamupʌnda'm.

¹⁸ Wiyuŋšej maŋba'ʌs ŋgʌ'weju ʌs Espíritu ʌs ŋgoyosacʌsi y ŋgoyomocʌsita'm ʌ'ta'mbʌ jamo'oyj, Y maŋba cha'maŋwa'oyaju.

¹⁹ Y maŋba'ʌs nyajqueju isaŋwʌ'ajcuy tzajpojmo, Y señalta'm yʌy najsacopajcʌsi, nʌ'pin y jucʌtʌc y jocoj yososcʌ'.

²⁰ Maŋba pyi'tzʌ'aju te' jama, Y maŋba tyujcu nʌ'pinšej te' poyaj, Antes que minba tʌ Ngomi's jyama quenequene'c y mʌja'ŋbʌ.

²¹ Y jujche'ŋ wyejwindzoŋjapyapʌ's tʌ Ngomi's ñʌy, maŋba quiotzojcu.

²² Israel-pʌnda'm, matoŋdamʌ yʌ'šejta'mbʌ tzame: Yʌ' Nazarejtojmopʌ Jesús quiojtu Diojsis cosujupʌ pʌn mi'ojmota'm. Y yajqueju que cosujupʌte' maya'aŋda'mbʌ chʌquipit, isaŋwʌ'ajcupyit y señalpitta'm. Diojsis chʌjcu yʌ'šejta'mbʌ tiyʌ mi'ojmota'm Jesuspit, mustambaše'amis.

²³ Yʌ' Jesús chi'oquia'yaju quipsaŋgospo'ʌyušej y ñimejcʌyušej Diojsis wa'y tyujcu. Y yʌ'wʌ nuctamumis y ma'mga'tamumis cruzcʌsi yatzita'mbʌ pʌ'nis quiʌ'pit.

²⁴ Pero yajwinsa'u Diojsis y chʌcʌpʌ'u te' ca'a'ŋis ñuctzʌ'yumʌy, porque te' ca'a'ŋis ja'n inʌc musi yajtzʌ'yu.

²⁵ Yʌ'šej chamu Davijtis te' Cristo nʌmu'c: Nguenjojcʌtʌcpa'ʌs inʌc ʌs Ngomi ʌs nwi'naŋdʌjqui. Ʌs ndzʌ'na'ŋojmo itpa'ŋmʌjcʌ ja'nʌj ndzocomyocha'e.

²⁶ Te'cotoya tzi'ŋbʌ'u'ʌj ndzoco'yojmo, y wanu'ʌj aŋnacapit, Y ʌs ŋgüerpo maŋba šʌ'mnayu jo'coquiu'yojmo.

²⁷ Ja'nmis maŋu ndzacjayu ʌs ŋguenguy ijtyajumʌy ca'yajupʌ. Ni ja'nmis maŋu ndzajcu mis Masanbʌ wa'y pyutzpʌ'u.

²⁸ Nyajquenumisʌj te' Tuŋ te' maŋbapʌ quengu'yojmo. Njo'ʌyjapyamis ʌs ndzocoy omapit yʌmyij ijtu'c.

²⁹ Tʌwʌta'm, jana na'chcu'yʌsmij muspa nʌjaytyamu que tʌta'm nwinatata David ca'u, y ñipyaju, y te' ñe' cha'tʌc ijtumaj hasta yʌtij.

³⁰ Pero tza'maŋwa'oyete' inʌc ñe'cʌ. Y myujsu que Diojsis chambʌjcu ñʌy chamdzi'u'c wiyuŋšej que te' ñe' fyamilia'ojmoc maŋba inʌc pyʌ'naju te' Cristo wa'y ñʌcpocsʌyjayu te' Davijtis 'yaŋgui'mʌtʌjcuy.

³¹ Y maŋba'cmaj tyujcu, quienu y chamu Davijtis que te' Cristo maŋba inʌc wyinsa'u. Chamgue'tu que te' quienguy jachacja Diojsis ijtyajumʌy ca'yajupʌ, y te' cuerpo japyutzpʌ'ʌ.

³² Yajwinsa'u Diojsis yʌ' Jesús, y mumu tʌs ŋgotzamba te'šej.

³³ Te'šej jeque, yajmʌja'ŋaju Diojsis ñe' chʌ'na'ŋojmoc. Y Jesujsis pyʌjcʌchoŋu te' Espíritu Santo, Tyata's chamdzi'ušej, y quiʌ'weju yʌ' yʌtijmis nʌ ŋguendamupʌ y matoŋdamupʌ.

³⁴ Porque jaqui'mʌ te' David tzajpojmo, pero ñe'cʌ nʌmba: 'Yoto'ŋʌyjayu ʌs Ngomi te' Tata Diojsis y ñʌjayu: Pocsa yʌy ʌs ndzʌ'na'ŋoyj mʌja'ŋajcu'yojmo,

³⁵ Nyajmaŋgopajcʌyajpa'cše'ŋo'yʌsmij te' ŋgui'nišajpapʌ'smij.

³⁶ Sunba'ʌs wa'y wiyuŋšej myujšaju mumu te' Israel-pʌ'nista'm que quiojtu Diojsis jujcha' Comi y Cristo yʌ' Jesús, ma'mʌytyamupʌmis cruzcʌsi.

³⁷ Myatoŋyaju'ca yʌ'šej, sʌ'myaju chocoy y ñʌjayaju Pedro y te' eyata'mbʌ cʌ'wej: Atzita'm ¿tiya'ndʌs ndzʌcpa?

³⁸ Y Pedro's ñʌjayaju: Quipswitu'tamʌ, y nʌ'yʌytyamʌ tumduma'ŋbʌn Jesucristo's ñʌquiʌsi, wa'y quiotocoytyamu mis ŋgowa. Y Diojsismij maŋba ñchi'tamu te' Espíritu Santo.

³⁹ Porque mijte' ñchamdzi'ʌtʌjtamu, y mista'm une, y mumu jujche'ŋ ya'ay ijtyajupʌ, y mumu jujche'ŋ wyejpapʌ tʌ Ngomi Diojsis.

⁴⁰ Y wi'ni eyata'mbʌ chamepit Pedro's 'yaŋmayaju y pyʌmitzi'yaju, y nʌmu: Cotzoctamʌ yʌ' yatzita'mbʌ pʌ'nojmoc.

⁴¹ Te'cotoya te' wyʌ'aŋjamyajupʌ's te' chame nʌ'yʌyaju. Te' jamo'oyj a'ŋʌyaju ñe'co'mo tuca'y mil pʌnše'ŋoyj.

⁴² Y quio'ŋjojcʌtʌquiaju te' cʌ'we'is 'yaŋma'yoquiuy, y našuñatʌju ñe'co'mo. Tumo'oyjtya'm inʌc chima y 'yawa' y quiomicu'tcuy, y 'yoto'ŋʌyjojcʌtʌquiajpa inʌc Dios.

Jutz tiju ijtyaju te' winata'mbʌ wʌ'aŋja'moye

⁴³ Y mumu pʌn inʌc nʌ ña'tzu. Y chʌquiaju te' cʌ'we'ista'm sone maya'aŋda'mbʌ tiyʌ y isaŋwʌ'ajcuy jujcha' señal.

⁴⁴ Mumu jujche'ŋ wʌ'aŋja'moyajpapʌ tumʌ'ijtyajpa inʌc, y mumutiyʌ inʌc tumo'oyj yajyojšajpa.

⁴⁵ Y jujche'ŋ wʌ'aŋja'moye's mya'ʌyajpa inʌc te' yojsaŋ y eyata'mbʌ tiyʌ, y wye'nbʌ'jayatʌjpa inʌc mumu yajyojšajpaše'ŋ tumduma'ŋbʌ'nis.

⁴⁶ Tumdumʌ jama inʌc itjojcʌtʌquiajpa myuma'ŋgʌ'y te' templo'ojmo. Y tumʌ'ajcu'yoyj inʌc wye'nbʌ'yajpa te' pan tumdumʌpʌ tʌjcojmo. Y myuma'ŋgʌ'y inʌc cu'tyajpa pumñayu'c y sʌ'mnayupʌ chocopyit.

⁴⁷ Wyʌcotzamyajpa inʌc Dios, y ñe'cʌta'm wyʌcocojtyatʌjpa inʌc te' cumgupyʌ'nis. Y tʌ Ngomi's tumdumʌ jama inʌc 'ya'ŋʌpya te' tu'mʌquiu'yojmo nʌ inʌc quiotzoquiajupʌ.