Gálatas 2 - Zoque Copainalá New Testament

Te' eyata'mbʌ cʌ'we'is pyʌjcʌchoŋyaju Pablo

¹ Jʌsa'ca, cʌtʌjcu'ca macmactascu'y ame, maŋwʌtzʌjque'tu'ʌj Jerusale'ŋojmo. Maŋgue'tu Bernabé ʌji'ŋ, y nʌmaŋgue'tu'ʌs Tito.

² Maŋu'ʌj porque yajquenu'ʌj Diojsis que te'šejte' inʌc pyʌcpa wa'yʌs ndzʌjcu. Teyma'a, te' cowi'našej quiomʌ'yatʌjpapʌ ñaytyumʌ ijtyaju'c, nʌtzamyaju'ʌs te' evangelio ʌs ndzamgopuŋbapʌ te' genti'lojmota'm. Te'še'ʌs ndzʌjcu wa'y jana comeque tyujcu ʌs nyoscuy, te' ndzʌjcupʌ'ʌs, ni te' maŋbapʌ'ʌs inʌc ndzʌjcu.

³ Y te' Tito tey inʌc ijtu ʌji'ŋ, y ñempe inʌc griego-pʌn jachi'ya pena ñe'cʌ'sta'm wa'y šircuncidatzʌjcu,

⁴ ñempe inʌc šuñajtʌ'u porque tey inʌc ijtyaju te' chʌquichʌquita'mbʌ atzi. Yʌ'ta'mbʌ's yajnu'mdʌjcʌyatʌjupʌte' wa'ytyij quiʌ'isʌyjayaju tʌta'm libre'ajcuy Cristo Jesujsistʌj tzi'tamupʌ. Y šuñajpa wa'ytyʌ nʌ'ittamu aŋgui'mgu'yis jujcha' coyosa.

⁵ Pero jañʌ'mʌnjayatʌs yʌ'ta'mbʌ nijutz wa'ytyʌs mato'ŋoyjayaju, wa'y itjojcʌtʌjcu mista'm ndzoco'yojmo te' wiyuŋšejpʌ evangelio.

⁶ Pero te' cowi'našej quiomʌ'yatʌjpapʌ's jañʌtzamya'ʌj jomepʌ tiyʌ. Juca cowi'nata'm inʌc wina, ja'ʌs tiyʌ maya'cuy mbʌqui, porque Diojsis ja'n myenoschʌqui ya'iwʌ.

⁷ Pero te'ta'mbʌ's quieñaju que Diojsisʌj tzi'u te' evangelio wa'yʌs ndzamgopuŋu te' genti'lojmota'm, jujcha' tzi'u Pedro te' evangelio wa'y chamgopuŋu te' judio'ojmota'm.

⁸ Porque te' quiʌ'wejupʌ's Pedro wa'y chamgopu'ŋoyu judio'ojmota'm, te'wʌ'sʌjte' cʌ'wejque'tu ʌj wa'yʌj ndzamgopu'ŋoyu genti'lojmota'm.

⁹ Y quiomʌ'yajpa inʌc que cowi'nata'mde' te' Jacobo, te' Pedro y te' Juan. Y quieñaju'ca yʌ'ta'mbʌ's que Diojsisʌj tzi'u yajya'moquiuy te'še'ʌj wa'y nyojsu, jotzpʌquiaju'ʌj ʌj y te' Bernabé. Te'šejtʌj yajqueñaju que nʌtʌjte' inʌc pʌjcʌchoŋyaju wa'ytyʌj tʌj maŋu ndzamgopu'ŋoyu genti'lojmota'm y ñe'cʌ wa'y myaŋyaju judio'ojmota'm.

¹⁰ Nitza'mʌyjayajutʌj te' pobreta'm, que te' ŋgotzoŋyajpašejtijtʌs uytyʌs njambʌ'yaju. Ngotzoŋyajuše'ʌs wina, te'še'ʌs nʌ ŋgotzoŋjojcʌtʌquiaju.

Antioquia-cumgu'yojmo 'yotoŋjayu Pablo's te' Pedro

¹¹ Pero minu'c Pedro te' Antioquia-cumgu'yojmo, otoŋjayu'ʌs pʌ'nista'm wyi'naŋdʌjqui porque ja'n inʌc 'yoye te' nʌšej inʌc chʌjcu.

¹² Porque jamiña'camaj Jerusale'ŋojmoc te' quiʌ'wejyajupʌ Jacobo's, cu'tpa inʌc yʌ' Pedro te' gentilji'ŋda'm. Pero miñaju'ca te'ta'mbʌ, ca'ŋjʌcʌ'pa inʌc Pedro y jamyawa' quiu'tʌ te' gentilji'ŋda'm. Te'šej chʌjcu porque ña'tzpa inʌc te' quioquipyajpapʌ's te' circuncisión.

¹³ Y te'še'a inʌc nʌ quiengʌspʌquiajque'tu te' Pedro's chʌqui eyata'mbʌ judio-wʌ'aŋja'moye'sta'm. Y hasta te' Bernabé nʌwa' inʌc ñʌcpʌjcʌyaju te'šejpʌ wʌ'aŋjamba-chʌjcu'yojmo.

¹⁴ Pero ŋguenu'ʌs que ja'n nʌ quio'ŋyaju oye te' wiyuŋšejpʌ evangelio. Pijche'cʌs nʌjayu Pedro mumu te' tu'mʌyajupʌ's wyi'naŋdʌjqui: Mij, njyudiomijyʌ', pero ja'nmis ŋgo'ŋjay judio'sta'm wyʌ'aŋja'moquiuy, sino que genti'lista'mñe'. ¿Tiyajca'nde' ndzi'yajpa pena gentilta'm wa'y quio'ŋjayaju judio'sta'm wyʌ'aŋja'moquiuy?

Judiota'm, jujcha' eyata'mbʌ, cotzoquiajpa wʌ'aŋjamgupyit

¹⁵ Tʌta'm, judiota'mdʌyʌ', porque te'wʌpʌ nʌ'pindʌ nʌ'ittamu. Ja'ndʌyʌ' gentil-nʌ'pin cowatzʌquita'm.

¹⁶ Pero mustambatʌ que Diojsis ja'n jyustococote te' pʌnda'm te' ñe'ta'm chʌquipit ñempe quiojamyajpa te' Moisejsis 'yaŋgui'mguy, sino que jyustococojtyajpa porque wyʌ'aŋjamyajpa Jesucristo. Te'cotoya tʌta'm nwʌ'aŋjambatʌ Jesucristo wa'ytyʌ justococojtu Diojsis porque nwʌ'aŋjamdambatʌ ñe'cʌ y ja'n tʌta'm ndzʌquipit porque ŋgojamdambatʌ te' aŋgui'mguy. Ja'n jyustococote ni'iwʌ pʌn ñe' chʌquipit ñempe chʌcʌ te' chambašej te' aŋgui'mgu'yis.

¹⁷ Te'šej jeque tʌta'm me'tztambatʌ wa'ytyʌ justococojtu Jesucristopit, pero mba'ttambatʌ que te'šejtijque' tʌta'm cowatzʌquita'mdʌyʌ' jujcha' ñe'cʌta'm. ¿Cotzoŋbasʌ'ŋdʌ Cristo's wa'ytyʌ ŋgowapa'tu? Ja'ne, Cristo's ja'ndʌ cotzowe.

¹⁸ Juca te' ndzajcupʌ aŋgui'mgu'yandʌ, te'wʌtijtʌ minba ŋgojamwʌtzʌjque'tu nʌtijtʌte' ŋgowapa'twʌtzʌjque'tu.

¹⁹ Como ja'ʌs musi ŋgojamda'nbʌ'u te' aŋgui'mguy, ca'uwʌše'amʌj ijtu te'wʌ's wyi'naŋdʌjqui wa'yʌj ndu'ŋaju šunbašej Diojsis.

²⁰ Yʌtij tumʌma'mʌyuše'amʌjyʌ' ijtu Cristoji'ŋ cruzcʌsi. Te'cotoya ja'nande' ʌj ijtu yʌtij sino que Cristo'sʌjyʌ' nʌc'ijtʌyupʌ. Y yʌtij ijtuše'ʌj ʌs ŋgüerpo'ojmo, ijtu'ʌj porque nwʌ'aŋjamba'ʌs te' Diojsis 'Yune. Yʌ'wʌ's jene sunu'ʌj y chi'oquia'u wyin wa'yʌj coca'u.

²¹ Ja'ʌs nyajʌcʌ'jay Diojsis yajya'moquiuy, porque juca inʌc tʌ justococottamba te' aŋgui'mgupyit, comeque inʌc ca'u Cristo.