El Apocalipsis 2 - Zoque Copainalá New Testament

Yajmujsu Cristo's jutz nʌ tyu'ŋajyaju yʌ' cu'ya'ytya'mbʌ tu'mʌquiuy. Yʌ'šej jyayjayu te' Efeso-tu'mʌquiuy

¹ Ʌj Juan, nʌjayu'ʌj Cristo's: Jayja te' nʌ quioquenupʌ's Efeso-tu'mʌquiuy wa'y ñe'cʌ's yajmujšaju tiyʌ'ʌsmij nʌ ndzamjayu. Tzamja te' coque'noye y te' tu'mʌquiuy que ʌjte' te' cho'ŋajupʌ's cu'ya'pyʌ matza tzʌ'naŋbʌ ŋgʌ'pit, y ʌjte' te' ñʌcjojwijtʌpyapʌ's te' cu'ya'pyʌ oro no'a-sʌ'ŋguy.

² Muspa'ʌs tiyʌta'm mis ndzʌctamba y jutzmij ñchijpana-yostamba y mbʌ'mgopajcʌytyambamis mumutiyʌ. Pero te' ja'n tyu'ŋajyapyʌ oye ja'nmis mbʌ'mgopajcʌytyame y ndzʌjquistamwa'mis te' nʌmyajpapʌ que cʌ'wejta'mde' y ja'nde' pitta'm, y nʌctʌ'ytyamumis que sujchajpapʌte'.

³ Y muspa'ʌs que ŋguendamwa'mis toya y mbʌ'mgopajcʌytyamumis mumutiyʌ y ñchijpana-yostamwa'mij y jamyochcʌtʌŋdamʌtijmij.

⁴ Ja'namʌs nʌ nwʌmʌ'yjayu mis itcuytya'm porque ja'namij su'noytyame jujcha' wina.

⁵ Te'cotoya jamwʌtzʌctamʌ jutzmij inʌc šu'noytyamba y ñchijpana-yostamba y yʌtij ja'namij šu'noytyame te'šej. Quipswitu'tamʌ y tzʌctamʌ te' oyeta'mbʌ tiyʌ yostamušejmij wina. Juca ja'nmij ŋguipswitu'tame wa'mij šu'noytyamu y nyostamu winašej, maŋba'ʌsmij ŋgʌ'mindamu jʌ'nʌ'oyj. Ñempemij no'a-sʌ'ŋguyšej ittamu yʌtijmij nʌ nyostamumʌy, maŋba'ʌsmij nyajʌcʌ'tamu u'yamisʌj ŋgotestigosajtamu.

⁶ Pero uša'ŋ oyepʌ tiyʌ mis nʌ ndzʌjcupʌ porque ŋgui'nistambamis te' tocoquiuytya'mbʌ tiyʌ chʌquiajpapʌ nicolaita-pʌ'nista'm. Te'šejta'mbʌ tiyʌ yajti ʌs ŋgui'nisque'tpa'ʌs.

⁷ Iwʌ's ijtyaju quiowi wa'y myatoŋyaju, yajcʌmato'ŋʌya te' Espíritu Santo's 'yoto'ŋʌyajpašej te' Diojsis tyu'mʌquiuytya'm. Iwʌ's ñʌwʌ'ajpa, maŋba'ʌs ndzi'u lugar wa'y quiu'tu te' iscuy-quenguquiotoya yospapʌ cu'yis tyʌm. Te'šejpʌ mʌja cuy, Diojsiste' pyaraiso'ojmo ijtupʌ.

Yʌ'šej jyayjayu te' Esmirna-tu'mʌquiuy

⁸ Ʌj Juan, nʌjaquie'tu'ʌj Cristo's: Jayjaquie'ta te' nʌ quioquenupʌ's Esmirna-tu'mʌquiuy. Tzamja te' coque'noye y te' tu'mʌquiuy que ʌjte' te' winapʌ y te' ultimopʌ, te' ca'upʌ y te' winsa'upʌ,

⁹ y que muspa'ʌs tiyʌta'm mis ndzʌctamba. Y musque'tpa'ʌs jutzmij nyacsnutzʌquiajpa y te'wʌcotoya mijte' mbyobre'ajtamba. Pero mij, ricota'm mij porque ispʌctambamis Dios. Y muspa'ʌs jutzmij 'yotowewʌ'ajayajpa te' nʌmyajpapʌ's que judio-pʌnda'mde', y ja'nde' pitta'm, sino que tu'mʌyajpa wa'y chʌcjayaju Satanajsis šu'noquiuy.

¹⁰ Pero uy na'tztame te' maŋbamis ŋguendamupʌ toya. Yʌtij jeque te' diablo's maŋba yajsomatʌju iwʌjutiwʌ mi'ojmota'mbʌ wa'mij ñchʌjquisatʌjtamu toyapʌjcu'yojmo. Y majca'y jamamij maŋba nyacsnutzʌcʌtʌjtamu. Paquic ittamʌ nwʌ'aŋjamgu'yojmo hasta que ŋguia'tambamij, y ʌsmij maŋba ndzi'tamu jujcha' corona te' iscuy-quenguy wa'yʌsmij nyajmʌja'ŋajtamu.

¹¹ Iwʌ's ijtyaju quiowi wa'y myatoŋyaju, yajcʌmato'ŋʌya te' Espíritu Santo's 'yoto'ŋʌyajpašej te' Diojsis tyu'mʌquiuytya'm. Iwʌ's ñʌwʌ'ajpa ja'n maŋu quia'u metza naco'mo.

Yʌ'šej jyayjayu te' Pergamo-tu'mʌquiuy

¹² Ʌj Juan, nʌjaquietu'ʌj Cristo's: Jayjaquie'ta te' nʌ quioquenupʌ's Pergamo-tu'mʌquiuy. Tzamja te' coque'noye y te' tu'mʌquiuy que ʌjte' te' ñʌ'ijtupʌ's espada mejtza'ŋ wi'napʌ,

¹³ y que muspa'ʌs tiyʌta'm mis ndzʌctamba. Y musque'tpa'ʌs jutzpʌte' te' cumguy ijtumʌmyij. Tey ijtu Satanajsis 'yaŋgui'mʌtʌjcuy porque tey ijtu pyocscuy. Pero mis ŋgowʌ'aŋjamjaytyambamis ʌs nʌy, y paqui mij inʌc ittamu mis nwʌ'aŋjamgu'yojmo nimeque'ctij te' jamo'oyjtya'm ca'u'c ʌs wiyuŋdzambapʌ ndestigos Antipas. Te'wʌ yajca'yaju mi'ojmota'm, tepyʌ cumgu'yoyj ijtumʌy Satanajsis itcuy.

¹⁴ Ja'namʌs nʌ nwʌmʌ'yjayu mista'm itcuy porque ijtu mi'ojmota'm quio'ŋjayajpapʌ's ya'acpʌ Balaa'ŋis 'yaŋma'yoquiuy. Ñe'cʌ's 'yaŋmapya inʌc te' Balac wa'y cowapa'tcuy quie'naŋgʌschi'ʌyaju te' Israel-pʌnda'm. Yajcʌ'šajpa inʌc tiyʌta'm comichʌqui's ñʌquiʌsi yajca'yajupʌ tiyʌ y ya'ispʌquitzʌquiajpa inʌc.

¹⁵ Te'šejtijque' ijtu mi'ojmota'm quio'ŋjayajpapʌ's nicolaita'sta'm 'yaŋma'yoquiuy, y te'šejpʌ aŋma'yoquiuy ʌs ŋgui'nispa'ʌs.

¹⁶ Te'cotoya quipswitu'tamʌ. Juca ja'nmij ŋguipswitu'tame, maŋba'ʌsmij ŋgʌ'mindamu jʌ'nʌ'oyj y maŋba'ʌs nʌquipyaju yʌ'šejta'mbʌ ʌs aŋnaco'mo putpapʌ espadapit.

¹⁷ Iwʌ's ijtyaju quiowi wa'y myatoŋyaju, yajcʌmato'ŋʌya te' Espíritu Santo's 'yoto'ŋʌyajpašej te' Diojsis tyu'mʌquiuytya'm. Iwʌ's ñʌwʌ'ajpa, maŋba'ʌs ndzi'u wa'y quiu'tu te' ja'nmaj quieyepʌ maná y maŋba'ʌs ndzi'u tumʌ popopʌ nama tza', y te' nama tza'cʌsi ja'yʌyumʌy jomepʌ nʌy. Y te'wʌ ya'iwʌ's ja'n maŋu ispʌjcu sino que te' pyʌjcʌchoŋbapʌ's.

Yʌ'šej jyayjayu te' Tiatira-tu'mʌquiuy

¹⁸ Ʌj Juan, nʌjaquie'tu'ʌj Cristo's: Jayjaquie'ta te' nʌ quioquenupʌ's Tiatira-tu'mʌquiuy. Tzamja te' coque'noye y te' tu'mʌquiuy que ʌjte' te' Diojsis 'Yune, jucʌtʌc-nemašejpʌ's wyitʌm, y qui'toŋbapʌ tzapas tʌ'ŋguyšejpʌ's ñe'ŋbac,

¹⁹ y que muspa'ʌs tiyʌta'm mis ndzʌctamba, y jutzmij su'noytyamba y nwyʌ'aŋja'moytyamba wa'mis ŋgotzoŋdamu ndʌwʌ y jutzmis mbʌ'mgopajcʌytyamba mumutiyʌ. Y musque'tpa'ʌs que yʌtij nʌmij ñchijpana-yostamu más que ja'n winašej.

²⁰ Ja'namʌs nʌ nwʌmʌ'yjayu mista'm itcuy porque ndzi'tambamis lugar ʌ' yomo Jezabel wa'y 'yaŋma'yoyu y 'yaŋgoma'cʌyjayaju ʌs ŋgoyosata'm jutz wa'y ispʌquitzʌquiaju y wa'y quiu'tyaju tiyʌta'm comichʌqui's ñʌquiʌsi yajca'yajupʌ tiyʌ. Y ñe'cʌ nʌmba que tza'maŋwa'opyapʌ yomote'.

²¹ Y njo'cjo'wya'mʌs wa'y quipswitu'u y wa'y chajcu te' ispʌquitzʌjcuy, y jašunʌ quipswitu'ʌ.

²² Yʌtij jeque maŋba'ʌs nya'ʌŋguytyʌjcʌyu wa'y quienu toya ñe'cʌ's y ñe'cʌji'ŋ cʌtzʌjcʌ'oyajpapʌ juca ja'n quipswitu'yay wa'y chaquiaju te' tzʌqui te' yomo's 'yaŋmayajušej.

²³ Y ñe' 'yuneta'm quio'ŋjayajpapʌ's ñe' chʌqui maŋba'ʌs ŋgotjayaju toya wa'y quia'yaju. Y mumu Diojsis tyu'mʌquiu'yis maŋba myujšaju que ʌs ocme'tzpʌ'jayajpa'ʌs pʌ'nista'm quipsoquiuy y chocoy. Y tumduma'ŋbʌnmij maŋba ŋguiʌme'tzatʌjtamu tiyʌta'm mis ndzʌctamu yʌy najsacopajcʌsi.

²⁴ Pero Tiatira-tu'mʌquiu'yojmo itque'tu eyata'mbʌ ja'n quio'ŋyapyʌ's yʌ'šejpʌ aŋma'yoquiuy, te' ja'n inʌc suni chʌjquišajupʌ's te'šejpʌ cowapa'tcuy. Yʌ'ta'mbʌ's ñʌjayajpa que yʌ'wʌte' te' maya'aŋbʌ Satanajsis 'yaŋma'yoquiuy. Yʌ'šejta'mbʌ pʌn mi'ojmota'm nʌ'ʌsmij nyajmustamu: Ja'na'ʌs maŋu ŋgojtu eyapʌ tiyʌ wa'mis ndzʌctamu.

²⁵ Pero ʌs ndzameta'm nʌ'ittamupa'mis, cojamjojcʌtʌctamʌ hasta que minba'ʌj.

²⁶ Iwʌ's ñʌwʌ'ajpa, y chʌcjojcʌtʌcpa tiyʌta'mʌs ʌs nwʌmʌ'pya hasta co'yajcu'yojmo, te'šejpʌ pʌn maŋba'ʌs ndzi'u aŋgui'mʌtʌjcuy te' nacioŋgʌsita'm.

²⁷ Y ñe'cʌ's maŋba 'yaŋgui'mu te' nacioŋda'm na'chaŋbʌ y pʌmi'ʌyupʌ 'yaŋgui'mʌtʌjcupyit. Weñajpapʌ tzica y platušejta'mbʌtijte' mumu pʌn ñe' wyi'naŋdʌjqui. Te'šejpʌ aŋgui'mʌtʌjcu'yʌj tzi'que'tu'ʌj Ndata's.

²⁸ Te'cotoya iwʌ's ñʌwʌ'ajpa, maŋba'ʌs nyajsʌ'ŋjayu chocoy porque ʌjte' te' namdzuctya'a tzi'muŋu'c tzotpapʌ matza.

²⁹ Iwʌ's ijtyaju quiowi wa'y myatoŋyaju, yajcʌmato'ŋʌya te' Espíritu Santo's 'yoto'ŋʌyajpašej te' Diojsis tyu'mʌquiuytya'm.