Efesios 5 - Zoque Copainalá New Testament

Pyʌcpašej wa'y ijtyaju Diojsis 'yuneta'm

¹ Mijta'm, como Diojsismijyʌ' 'yuneta'm, jene šundambapʌmij. Te'cotoya quengʌspʌctamʌ ñe'cʌcʌsi.

² Chi'oquia'u'c Cristo's te' wyin y ca'u'c tʌcotoyata'm, yajqueju que jene sundambatʌ. Te'cotoya pyʌcpa wa'ytyʌ tʌ našunʌtʌjtamu ne'co'mo. Porque Cristo's chi'oquia'u ñe' wyin jujcha' tzi'oquiuy Dioscotoya y te'šej tzocopyajcu Dios.

³ Pero como mijta'm Diojsis myasanbʌnda'm, ja'namis ndzʌctame ispʌquitzʌjcuy ni ni'aŋsu'noquiuy ni eyata'mbʌ tiyʌ mʌjša'ŋda'mbʌ. Ni ja'namis nwʌmʌ'ytyame wa'mis te'šejta'mbʌ tiyʌ ndzamdamu.

⁴ Ni ja'n pyʌqui wa'mis ndzamdamu tza'ajcuytya'mbʌ tiyʌ ni jowi tzame ni jowi yende'ŋajcuy, sino que pyʌcpa wa'mis nʌjaytyamu Dios: Yʌscotoya Tatay.

⁵ Wiyuŋšej mustamba'mis que ja'n maŋu pyʌjcʌchoŋyaju yajtiyʌ aŋgui'mbamʌy Dios Cristoji'ŋ te' ispʌquitzʌcpapʌ's, ni te' chʌcpapʌ's mʌjša'ŋda'mbʌ tiyʌ ni te' ni'aŋsu'nopyapʌ's, porque te' ni'aŋsu'nopyapʌ's ja'n šuni Dios, eyata'mbʌ tiyʌ 'yaŋsunba.

⁶ Coquendamʌ cuenta umij 'yaŋgoma'cʌtʌjtamu ya'iwʌ's ñe' chamepitta'm, porque te' ñe' chameta'm jojtacapʌ tiyʌšejpʌte'. Y Diojsis maŋba yajnʌco'aŋgʌyaju te' ja'n myato'ŋoyjayapyʌ's ñe'cʌ porque chʌquiajpa te'šej yatzita'mbʌ chʌqui.

⁷ Te'cotoya uy tzʌctame ñe'cʌ's chʌquiajpašej.

⁸ Wina pi'tzʌta'majmis inʌc ŋguipsoquiuy, pero yʌtij tʌ'a Ngomi's 'yaŋgui'mʌtʌjcuquiʌ'mʌ mij ittamu ñe' šʌ'ŋgʌ'ojmo. Te'cotoya tu'ŋajtamʌ oye'c tu'ŋajyajpašej te' sʌ'ŋgʌ'ojmo ijtyajpapʌ.

⁹ (Porque juca ñdyu'ŋajtambamij sʌ'ŋgʌ'ojmo, maŋbamis ŋgo'ŋdamu wʌpʌ-pʌ'najcuy y justo'ajcuy y maŋbamij nwyiyuŋdzamdamu.)

¹⁰ Tzʌcme'tztamʌ wa'mis ŋgo'ŋjaytyamu tʌ Ngomi's šu'noquiuy wa'mis ndzʌctamu ñe'cʌ's šunbašej.

¹¹ Uy tzʌctame chʌquiajpašej te' pi'tza'ŋajcu'yojmo wijtyajpapʌ's, porque ñe'cʌ'sta'm ja'n ñʌwʌ'ajyay yajtiyʌ. Más oye wa'mis otoŋwinduquiaju yʌ'šejta'mbʌ tiyʌ chʌquiajpapʌ's porque ja'nde' 'yoyeta'mbʌ tiyʌ.

¹² Tza'ajcuytya'mbʌ tiyʌte' wa'ytyʌ ndzamgue'tu tʌ, te' ñe'cʌ'sta'm ñu'mdzʌquiajpapʌ tiyʌ.

¹³ Pero juca nyajquejtambatʌ te' sʌ'ŋgʌpit que yʌ'šejta'mbʌ tzʌqui ja'nde' 'yoyeta'mbʌ tiyʌ, ñe'cʌ'sta'm maŋba myujšaju que ja'nde' 'yoyeta'mbʌ tiyʌ. Porque ŋguenda'nbatʌ oye te' sʌ'ŋgʌ'ojmo ijtyajupʌ tiyʌ.

¹⁴ Te'cotoya nʌmyajpa te' tza'maŋwa'oyeta'm: Itzaŋwa nwitʌm, porque 'yʌŋupʌšejpʌ mijyʌ', Tzu'cumʌ porque ŋguia'upʌšejpʌ mijyʌ', Y Cristo's maŋba šʌ'ŋjayu mis ndzocoy.

¹⁵ Te'cotoya coquendamʌ cuenta wa'mij nwyiyuŋdu'ŋajtamu, ja'n jowita'mbʌšej sino que mujsoyajpapʌšej.

¹⁶ Nʌwʌ'ajtamʌ yʌ' aŋsʌŋ wa'mis ndzʌctamu oyeta'mbʌ tiyʌ porque te' yʌtijta'mbʌ pʌ'nis chʌquiajpa ja'n 'yoyeta'mbʌ tiyʌ.

¹⁷ Te'cotoya, uy jowicotzʌctame nwin sino que nʌctʌ'ytyamʌ jutzte' šunba tʌ Ngomi's wa'mis ndzʌctamu.

¹⁸ Y uy no'tcuy tzʌctame porque te'wʌ'smij ñʌtocoytyamba. Más oye wa'mis ndzi'tamu lugar te' Espíritu Santo wa'y itjojcʌtʌjcu mista'm ndzoco'yojmo.

¹⁹ Y wandamʌ mi'ojmota'm salmo y himno y eyata'mbʌ wane Espíritu Santo'smij 'yaŋmaytyambapʌ wa'y quieju que nʌmis nwʌcotzamdamu y nwanjaytyamu tʌ Ngomi mista'm ndzoco'yojmo.

²⁰ Te'cotoya mumu jama mumutiyʌcʌsi nʌjaytyamʌ Dios tʌ Ngomi Jesucristo's ñʌquiʌsi: Tatay, yʌscotoya mis ndzʌcpa.

Jutz pyʌcpa wʌ'aŋja'moye's wa'y ijtu tyʌjcojmota'mbʌji'ŋ

²¹ Namyato'ŋoyjatʌjtamʌ ne'co'mo, porque Dios miste' nʌ ŋgʌna'tzʌytyamu.

²² Co'tʌc-yomota'm, como mato'ŋoyjaytyambamis tʌ Ngomi, te'šej pyʌcpa wa'mis mato'ŋoyjaquie'tu mis njayaj.

²³ Y tʌta'm Ngomi, te' Cristo's, yajcotzoquiajpa te' tu'mʌyajpapʌ ñe' ñʌquiʌsi. Te'cotoya Cristo's tyu'mʌquiuy ñe' te' cuerpo, y Cristote' te' tu'mʌquiu'yis quiopac. Te'šejtijque' te' jayaj, yomo'ste' quiopac.

²⁴ Y jujcha' te' tu'mʌquiu'yis myato'ŋoyjapya te' Cristo, te'šejtijque' mijta'm, co'tʌc-yomo, pyʌcpa wa'mis mato'ŋoyjaytyamu mista'm njayaj mumutiyʌcʌsi.

²⁵ Jayajta'm, yajyamdamʌ mista'm nyomo jujcha' Cristo's yajyamba ñe' tyu'mʌquiuy y chi'oquia'u wyin y ca'u ñe' tyu'mʌquiuquiotoya.

²⁶ Te'šej chʌjcu Cristo's wa'y yajmasa'najyaju te' tu'mʌyajpapʌ ñe' ñʌquiʌsi. Yajcowajayajpa chocoy jujche'ŋ tu'mʌyajpapʌ's, porque wyʌ'aŋjamjayajpa Diojsis chame y nʌ'yʌyajpa nʌ'pit.

²⁷ Te'šej jeque chʌjcu Cristo's wa'y ya'aŋgueju ñe' wyi'naŋdʌjqui te' ñe' tyu'mʌquiuy saŋoyepʌ y sa'sapʌ tiyʌšej nu'cpa'cande' jama. Pijche'c maŋba 'yaŋgueju ñe' wyi'naŋdʌjqui masanbʌ, cowajupʌ y ja'ndiyʌpʌ's quiowa.

²⁸ Ndzamjaytyaŋgue'tpa'ʌsmij que pyʌcpa wa'y jaya'sta'm yajyamyaju ñe'ta'm yomo jujcha' yajyamyajpa ñe' wyin. Porque iwʌ's yajyamba te' ñe' yomo, ñe' te' wyin nʌ yajyamu.

²⁹ Tumduma'ŋbʌ'nis yajyamba ñe' wyin, sa'sa pyʌ'nʌpya y quioquenba. Te'šejtijque' Cristo's yajyamba te' tyu'mʌquiuy,

³⁰ porque ñe'te' te' cuerpo y tʌta'm tumduma'ŋbʌn tyiyʌ'iwʌtʌte' te' Cristo's cuerpo'sñe'.

³¹ Te'cotoya co'tʌjcajyajpapʌ pʌ'nis tiene que wa'y chaquiaju tyataj y ñanaj, y tyumʌtzʌquiajpa yomoji'ŋ. Y te' metzata'mbʌ inʌc tumʌ'ajyajpa.

³² Nʌ'ʌs ŋgojtu co'tʌjcajcuy jujcha' comparación wa'yʌsmij ndza'maŋwajaytyamu te' wina jayajqueyapʌ tiyʌ Diojsis. Yʌ'šejpʌte': Te' Cristo y te' tu'mʌyajpapʌ ñe' ñʌquiʌsi tumʌ'ajyajpa.

³³ Pero nʌ'ʌsmij ndzamjaytyamu mijta'm, que pyʌcpa wa'y tumduma'ŋbʌ'nis mi'ojmota'm yajyamu ñe' yomo jujcha' yajyamba ñe' wyin. Y pyʌcpa wa'y yomo's wyʌcocojtu te' jyayaj.