Efesios 4 - Zoque Copainalá New Testament

Tumo'pyʌ quipsoquiuytyʌ nʌ'ittamu Espíritu Santopit

¹ Ʌj Pablo, somyaju'ʌj preso'mo porque yosjapya'ʌj Jesucristo. Y mijta'm, Diojsismij nwyejtamu wa'mis nwʌ'aŋjamdamu te' Cristo. Te'cotoya nwa'cjaytyamba'ʌsmij wa'mij ñdyu'ŋajtamu pyʌcpašej wa'y tyu'ŋajyaju te' Cristo's wyʌ'aŋja'moyeta'm.

² Yajyumi'ajtamʌ ne' nwin y ne' ndzocoy mis atzi'sta'm wyi'naŋdʌjqui. Y našunʌtʌjtamʌ ne'co'mo y nʌmaŋjaytyamʌ paciencia yʌ'wʌ te'wʌ atzi.

³ Como te' Espíritu Santo's tyumʌtzʌcjawya'a mista'm ŋguipsoquiuy, coquendamʌ cuenta wa'mij sʌ'mnayu'c ittamu ne'co'mo.

⁴ Te' Cristo's cuerpo tumʌwʌtijte' y te'wʌte' te' ñe' tyu'mʌquiuy, y te'šejtijque' tumʌwʌtijte' te' Espíritu Santo. Y Diojsismij nwyejtamu wa'mis nwʌ'aŋjamdamu te' Cristo, wa'ytyʌte' tumʌ'ajcu'yoyj njo'ctamu tiyʌtʌ ñe'cʌ's tzamdzi'tamu.

⁵ Y tumʌtijte' tʌ Ngomi Jesús, y tumʌtijte' te' wʌ'aŋjamguy, y tumʌtijte' te' nʌ'yʌ'oquiuy.

⁶ Y tumʌtijte' te' Dios tʌ Ndataj y mumuta'mbʌ'sñe'. Y ñe'cʌ Dios, cowi'nate' mumu pʌngʌsita'm, y ñe'cʌ's pyʌmitzi'japya tʌta'm ndzocoy y itjojcʌtʌcpa mumu tʌ'ojmo.

⁷ Y Diojsistʌ we'nbʌ'jaytyamu tumduma'ŋbʌn ñe' chi'ʌtʌjcuy, ñe'cʌ's sunuše'ŋ wye'nbʌ'u Cristo's yajya'moquiupyit.

⁸ Te'cotoya ja'yʌyu Totojaye'ojmo: Qui'mu'c Cristo tzajpojmo, yajqueju que wyʌyu mumu qui'nišajpapʌ's. Y Cristo's šaju tzi'ʌtʌjcuy pʌ'nojmota'm.

⁹ Pues ¿jutza' sunba ñʌmu nʌmbamʌy que qui'mu Cristo tzajpojmo? Sunbate' ñʌmu que wina wanajcu te' cʌ'mʌpʌ luga'rojmo najsacʌ'mʌ y pijche'c qui'mu tzajpojmo.

¹⁰ Y te' wanajcupʌ, te'wʌte' qui'mgue'tutij tzajpojmo wa'y 'yaŋgui'moyu mumutiyʌcʌsi mumujutʌ.

¹¹ Y Cristo's quiojtu ñe' tyu'mʌquiu'yojmo cʌ'wejta'm, tza'maŋwa'oyeta'm, y chamgopuŋjayajpapʌ's ñe' 'yevangelio. Y quiotque'tu eyata'mbʌ, te'ta'mbʌ's wa'y quioqueñaju y yajnʌctʌ'yaju te' tu'mʌyajpapʌ Cristo's ñʌquiʌsi.

¹² Cojtutʌj wa'ytyʌs aŋmayaju te' atzita'm jutz wa'y yosjayaju Dios. Y te'šejtijque' wa'ytyʌs mbaquitzi'jayaju te' atzi'sta'm chocoy porque mumu wʌ'aŋja'moye, Cristo'stʌte' cuerpo.

¹³ Y maŋbatʌ ndumʌyostamu hasta que tu'mbactʌ ndumʌwʌ'aŋjamdamba Cristo, y hasta que tu'mbactʌ ispʌctamba oye te' Diojsis 'Yune. Te'šejtʌ maŋba ŋgota'ndamu Diojsis wyi'naŋdʌjqui y ñe'cʌ'stʌ maŋba tzi'tamu Cristo's ñe'šejpʌ itcuy y chocoy.

¹⁴ Y ja'nandʌ maŋu nʌ'ittamu une-quipsoquiuy ni metza quipsoquiuy wa'ytyʌ ŋgo'ŋdamu wi'ni eyata'mbʌ aŋma'yoquiuy. Y ja'nandʌ maŋu mato'ŋoyjayaju te' tzi'šej aŋgoma'cʌ'oyajpapʌ's 'yaŋma'yoquiuy porque sutzita'mbʌ tiyʌte'.

¹⁵ Pero maŋbatʌ ŋgo'ŋdamu te' wiyuŋbʌ tiyʌ y maŋbatʌ našunʌtʌjtamu ne'co'mota'm wa'ytyʌ nʌ'ittamu Cristo's ñe'šejpʌ itcuy y chocoy. Porque mumu tʌyʌ'ta'm, tzʌctamʌ cuenta jujcha' Cristo's cuerpo, y Cristo jujcha' te' cuerpo's quiopac.

¹⁶ Como Cristo itpa jujcha' te' cuerpo's quiopac, ñe'cʌ's tyumʌtzʌcpa mumu te' ñe' cuerpo y pyʌmitzi'pa quio'manamaye. Y tumdumʌpʌ co'ma's yospa y quiotzoŋba te' cuerpo wa'y pyʌmipʌjcu y wa'y myʌja'u. Te'šejtijque' tʌta'm, naquiotzowatʌjtambatʌ y našunʌtʌjtambatʌ wa'ytyʌ tumduma'ŋbʌn mbʌmipʌctamu ndzoco'yojmo Diojsis wyi'naŋdʌjqui.

Jomepʌ quenguy Cristopit

¹⁷ Yʌ'šej jeque'ʌsmij ndzamjaytyamba y nwa'cjaytyamba'ʌsmij tʌ Ngomi's ñʌquiʌsi u'yamij nwyittamu wijtyajpašej te' ja'n wyʌ'aŋja'moyapyʌ gentilta'm. Porque te' genti'lista'm jyowya'ŋdʌjca'oyajpa ñe'ta'm quipsoquiupyit.

¹⁸ Y pi'tzʌta'ma quipsoquiuy. Te'cotoya ja'n ispʌquiay Dios porque ja'n ñʌctʌ'yay yajtiyʌ y porque nuyu'ajyaju ñe' chocoy.

¹⁹ Como nuyu'ajyaju te' chocoy, jana na'chcuy chʌquiajpa ñe'ta'm wyi'nis yatzi šu'noquiuy y quio'ŋyajpa mumu tocoquiuy porque te'šej šuñajpa.

²⁰ Pero mijta'm, mbʌjcʌchoŋdamu'cmis te' Cristo, ñʌjayatʌjtamumij umis ndzʌctamu yʌ'šej yatzita'mbʌ tiyʌ.

²¹ Wiyuŋšej matoŋdamwa'mis te' evangelio chambapʌ's te' Jesucristo, y te'wʌpit ispʌctambamis oye te' Cristo chambapʌ's te' wiyuŋbʌ tiyʌ.

²² Te' ndzʌctambašejmis inʌc wina, u'yamis ndzʌcjojcʌtʌctamu. Pyʌcpa wa'mis ndzactamu mis yatzipʌ nwi'nis šu'noquiuy porque te'wʌ'smij 'yaŋgoma'cʌytyamba wa'mij ñdyocoytyamu.

²³ Jomecoquipsoytyamʌ ndzoco'yojmo wa'mis ŋgacpʌ'tamu mis ja'n 'yoyepʌ ŋguipsoquiuy.

²⁴ Tu'ŋajtamʌ oye'c Diojsis wyi'naŋdʌjqui porque ñe'cʌ'smij njyomecotzʌctamu. Te'cotoya pyʌcpa wa'mij ñdyu'ŋajtamu te' wiyuŋšejpʌ justo'ajcu'yojmo y masa'najcu'yojmo.

²⁵ Uy sutzjaytyame eyata'mbʌ mis atzi, sino que tzamdamʌ te' wiyuŋbʌ tiyʌ ne'co'mota'm, porque tʌta'm tumʌpʌ cuerpošejpa'ndʌyʌ' porque Cristo'stʌyʌ' ñe'ta'm.

²⁶ Juca ŋgui'šca'tambamij, uy coquendame mista'm ndzoco'yojmo qui'šca'cuy umij ŋguiowpa'ttamu. Jʌnʌjtij jambʌ'tamʌ qui'šca'cuy.

²⁷ Uy tzi'tame lugar te' diablo wa'mij nyajcowapa'ttamu ndzoco'yojmo.

²⁸ Juca nu'mbapʌ inʌc, u'ya ñu'mgue'tumaj, sino que yajyosa ñe' quiʌ'pit oyepʌ yoscu'yojmo wa'y ijtu tiyʌ wa'y chi'yaju te' quieñajpapʌ's toya.

²⁹ U'yamij 'yotowewʌ'ajtamu, porque yʌtij pyʌcpa wa'mij sa'sa'c ñchamdzamnaytyamu wa'mis mbʌmitzi'tamu choco'yojmo te' ŋguiʌmato'ŋʌyajpapʌ'smij.

³⁰ Y uy yajtuyuquiʌñe'ctame te' Espíritu Santo Diojsisñe', porque Diojsis quiʌ'weju ñe' 'Yespiritu Santo wa'y ijtu mista'm ndzoco'yojmo wa'mis mustamu que te' minbapʌ aŋsʌ'ŋoyj Diojsismij maŋba nyajcotzojcoctuctamu.

³¹ Uy nʌ'ittame tacapyʌ tzocoy mi'ojmota'm, ni uy nu'motoŋdame, ni uy nisujtzʌytyame mis atzita'm. Jambʌ'tamʌ te' qui'šca'cuy, y mawʌqui'šca'cuy y te' wejwejnaquiuy.

³² Pyʌcpa jeque wa'mij ñayajyamʌtʌjtamu y ñatyo'ya'ŋʌtʌjtamu ne'co'mo. Yajcotocoytyamʌ mista'm atzi ñchʌcjaytyambapʌ'smij toya, porque Diojsis yajcotocoyjawya'a mista'm ŋgowa porque ca'u te' Cristo mijcotoyata'm.