Efesios 3 - Zoque Copainalá New Testament

Pablo's yoscuy genti'lojmota'm

¹ Te'cotoya ʌj Pablo oto'ŋʌyjojcʌtʌcpa'ʌs Dios mijcotoyata'm. Somyaju'ʌj preso'mo porque ndzi'oquia'u'ʌs nwin Jesucristocʌsi y porque ndzamgopuŋjaytyamba'ʌsmij te' Diojsis chame, mij gentilta'm.

² Ngomʌ'pya'ʌs que matoŋdamwa'mis jutz Diojsisʌj copiŋu wa'yʌsmij nyajmustamu ñe' yajya'moquiuy mijcotoyata'm.

³ Y Diojsisʌj yajquenu y yajnʌctʌ'yu te' jayajqueyapʌ tiyʌ ya'ajca. Yʌ'šejta'mbʌ tiyʌ metza tuca'pyʌ tzamepit ndzamwa'mʌs wina ʌs ŋgarta'ojmo.

⁴ Y ndu'ndamba'camis te'wʌ, maŋbamis mustamu jutzʌs nʌctʌ'pya te' tzameta'm chambapʌ's te' Cristo, te' wina jayajqueyapʌ tiyʌ Diojsis.

⁵ Ya'ajca jeque Diojsis jayajmujša pʌnda'm yʌ' yʌ'šej nʌ yajquejupʌ tiyʌ yʌtij. Pero yʌtij Diojsistʌj nʌ yajmujsu ñe' 'Yespiritu Santopit, jujche'ŋdʌj masanda'mbʌ cʌ'wej y tza'maŋwa'oyeta'm.

⁶ Yʌ'wʌtʌjte' nʌ yajmujsupʌ tiyʌ Diojsis: Que mijta'm gentilta'm, juca nwʌ'aŋjamdambamis te' Diojsis 'yevangelio, maŋbamis ndumʌnʌtzʌ'ytyamu mbarte Diojsis wyi'naŋdʌjqui jujche'ŋ judio-pʌnji'ŋda'm. Y wina chamdzi'oquia'ušej Diojsis, te'šej minu Cristo Jesús wa'ytyʌj ŋgotzojcu tʌj y mijta'm.

⁷ Y Diojsisʌj yajyamu y copiŋu'ʌj wa'yʌs ndzamgopuŋu yʌ'šejpʌ evangelio. Tzi'u'cʌj jeque Diojsis yʌ'šejpʌ tzi'ʌtʌjcuy, yajqueju ñe' isaŋwʌ'ajcuy.

⁸ Ñempe'ʌj más cʌmaŋ que ja'nde' te' más cʌmaŋda'mbʌ masanbʌn, pero Diojsisʌj tzi'u yʌ' yajya'moquiuy wa'yʌsmij ndzamgopuŋjaytyamu yʌ' evangelio mijta'm, gentil-pʌn. Tzi'u'ʌj jeque wa'yʌsmij ndzamjaytyamu jutzte' mʌja'ŋ te' Cristo's yajya'moquiuy mijcotoyata'm.

⁹ Y nitza'mʌyjayu'ʌj Diojsis wa'yʌs ndzamnʌctʌ'yaju mumu pʌn jutz Diojsis maŋba chʌjcota'nu mumutiyʌ quipsušej ya'ajca, wina jayajqueyapʌ tiyʌ. Y yʌ'šejte' quipsu ñe'cʌ's tzo'tzcu'yojmo chʌjcu'c mumutiyʌ.

¹⁰ Te' wina quipsaŋgospo'ʌyušej Diojsis, yʌtij nʌ chʌjcota'nu ñe' tyu'mʌquiupyit wa'ytye' ñe' tyu'mʌquiu'yis yajquejayaju Diojsis aŋba'tepʌ myujsoquiuy te' mumu tzajpojmota'mbʌ aŋgui'myajpapʌ y co'aŋgui'moyeta'm.

¹¹ Ya'ajca quipsušej Diojsis wa'y chʌjcu, te'šej minu chʌjcota'nu yʌtij tʌ Ngomi Jesucristopit.

¹² Te'cotoya yʌtij jana na'chcuytyʌ muspa ndo'mʌytyamu Dios porque tumʌtzʌctamutʌ Cristoji'ŋ. Te'šejtʌ muspa ndzʌjcu porque nwʌ'aŋjamdambatʌ y nijamdambatʌ Cristo Jesús.

¹³ Nwa'cjaytyamba'ʌsmij umij ñchocomyocha'tame mijta'm, sino que wʌcocottamʌ yʌ' toya ʌs nʌ ŋguenupʌ yʌtij mijcotoyata'm.

Jene sundambatʌ Cristo's

¹⁴ Njamwʌtzʌcpa'cʌs te' Diojsis quipsušej y chʌjcota'nušej Cristopit, cujnapya'ʌj tʌ Ngomi Jesucristo's Tyata's wyi'naŋdʌjqui wa'yʌs oto'ŋʌyu mijcotoyata'm.

¹⁵ Mumuta'mbʌ'ste' Tyataj yʌ' Dios. Te'cotoya te' najsacopajcʌsi ijtyajupʌ's y te' tzajpojmota'mbʌ angelejsista'm ñʌjayajpa Dios: Mijte' tʌs Ndataj.

¹⁶ Nwa'cpa'ʌs Dioscʌsi wa'mij ñe' 'Yespiritu Santo's mbyʌmitzi'tamu mis ndzoco'yojmo. Porque ñe'cʌ Dios maya'aŋde' pʌmi'ʌyupʌ wa'mij ŋguiotzoŋdamu.

¹⁷ Y nwa'que'tpa'ʌs Dioscʌsi wa'y itjojcʌtʌjcu te' Cristo mumu jama mista'm ndzoco'yojmo porque nwʌ'aŋjamdambamis ñe'cʌ. Y nwa'que'tpa'ʌs wa'y paquic itjojcʌtʌjcu Cristo's šu'noquiuy mi'ojmota'm.

¹⁸ Sunba'ʌs wa'mis ndumʌnʌctʌ'ytyamu oye te' masanbʌnji'ŋda'm jutztʌ jene maya'aŋ sundamba Cristo's.

¹⁹ Y sunba'ʌs wa'mis nʌctʌ'ytyamu oye'c que ñe'cʌ's jene sundambatʌ. Pero yajujche'ctʌ ja'n maŋu muspʌ'tamu jujche'ŋdʌ yajyamdamba y sundamba ñe'cʌ's. Y Dios maŋba itjojcʌtʌjcu mista'm ndzoco'yojmo wa'mis nʌ'ittamu ñe'šejpʌ itcuy y tzocoy.

²⁰ Y Diojsis muspa chʌjcu más maya'aŋda'mbʌ tiyʌ que ja'nde' te' nwa'ctambaše'ŋdʌ y chʌcpa más oyeta'mbʌ tiyʌ que ja'nde' te' ne'cʌtʌ nʌctʌ'ytyambaše'ŋ, porque Dios pʌmi'ʌyupʌte' y ñe' 'Yespiritu's pyʌmitzi'japya tʌta'm ndzocoy.

²¹ Jujche'ŋ tu'mʌyajpapʌ Cristo's ñʌquiʌsi yajmʌja'ŋwʌcotzamya Dios mumu jamacotoya. Amén.