Efesios 2 - Zoque Copainalá New Testament

Porque sundambatʌ Diojsis, yajcotzoctamutʌ

¹ Wina ca'uwʌšejmij inʌc ittamu mista'm ŋgowapit y nyacha'cupyit, pero yʌtij Cristo'smij ñchi'tamba iscuy-quenguy Diojsis wyi'naŋdʌjqui.

² Y wina ŋguiowapa'ttambamij inʌc cowapa'tyajpašej ja'n wyʌ'aŋja'moyapyʌ. Y ndzʌcjaytyambamis inʌc te' diablo's 'yaŋgui'mguy. Y te' diablo jeque yatzipʌ cowi'na-espiritute' y 'yaŋgui'mba mumu pʌmi'ʌyajupʌ yatzi-espiritu sawo'mo ijtyajpapʌ, y te'šejtijque' 'yaŋgui'mba te' pʌnda'm ja'n myato'ŋoyjayapyʌ's Dios.

³ Te'šejtijque' tʌta'm wina wittambatʌ inʌc ñe'cʌji'ŋda'm. Y janwyʌ'aŋja'moytyamʌ'cmajtʌ, ndzʌctambatʌ inʌc ne'ta'm yatzipʌ nwi'nis šu'noquiuy y ŋgo'ŋdambatʌ inʌc ne' ŋguipsoquiuy šunbašej inʌc tʌ ne' ndzoco'yis. Y como ndzʌctambatʌ inʌc te'šejta'mbʌ tiyʌ, Diojsistʌ maŋba inʌc yajnʌco'aŋgʌyu jujcha' wiyuŋšej maŋbamaj yajnʌco'aŋgʌyaju te' te'šej chʌcjojcʌtʌquiajpapʌ's.

⁴ Pero Diojsis, jenetʌ to'ya'ŋʌytyamba y sundamba.

⁵ Te'cotoya ñempe ca'uwʌšejtʌ inʌc ittamu wina tʌ ŋgowapit, Diojsistʌ tzi'tamba iscuy-quenguy Cristopit. (Porque te' Diojsis yajya'moquiupyit ŋguiotzoctamumij.)

⁶ Y Diojsistʌ yajtumʌtzʌctamu jeque Cristoji'ŋ ñe' wyinsa'cu'yojmo, y te'šejtijque' yajtumʌtzʌctamutʌ Jesucristoji'ŋ yajpocspajcu'c tzajpojmo nimeque'ctijpʌ mʌja'ŋajcu'yojmo.

⁷ Como Diojsistʌ yajyamdamu y yajtumʌtzʌctamu Cristo Jesusji'ŋ, te'cotoya te' minbapʌ aŋsʌ'ŋojmo maŋba yajqueju mumupʌ's wyi'naŋdʌjqui yʌ' yʌ'šejpʌ yajya'moquiuy tʌcotoyata'm.

⁸ Porque Diojsismij nyajcotzoctamu ñe' yajya'moquiupyit, y mista'm mbʌjcʌchoŋdamumis yʌ'šejpʌ cotzojcuy nwʌ'aŋja'moquiupyit. Y ja'nmis musi nyajcotzoctamu ne' nwin sino que Diojsistijtʌte' maŋba saŋdzi'tamu tʌta'm ŋgotzojcuy.

⁹ Y ja'nmis musi nyajcotzoctamu nwin ne' ndzʌquipit. Juca inʌc te'šej, maŋbamis inʌc mʌja'ŋgotzamdamu nwin.

¹⁰ Diojsis jeque jyomecotzʌcjayu tʌta'm ndzocoy cuando yajtumʌtzʌctamutʌ Cristo Jesusji'ŋ. Te'šej chʌjcu wa'ytyʌ ŋgo'ŋjojcʌtʌctamu te' oyeta'mbʌ tzʌqui Diojsis ñimejcʌyajupʌ wa'ytyʌ ndzʌctamu.

Cristopitte' nʌ'ittamutʌ sʌ'mnaquiuy

¹¹ Te'cotoya jamwʌtzʌctamʌ que mijta'm gentilta'm mijte' y ja'nmijte' judio-pʌnda'm. Te' judio-pʌ'nista'm pyʌjcʌchoŋyajpa cuerpocʌsi te' circuncidatzʌjcupyʌ seña, pʌ'nista'm quiʌ'pit chʌquiajpapʌ, y como mista'm jambyʌjcʌchoŋdamʌmis te'šejpʌ seña, te' judio'sta'm ñʌjatʌjtambamij circuncisioŋdacata'm.

¹² Jamwʌtzʌctaŋgue'ta que wina ja'nmis inʌc nwʌ'aŋjamdame te' Cristo y witišejmij inʌc ittamu te' copiwi Israel-pʌ'nista'm wyi'naŋdʌjqui. Y ja'ndita'mis inʌc mbarte te' Diojsis trato'ojmo wa'mis mbʌjcʌchoŋdamu te' chamdzi'oquia'upʌ tiyʌ. Ja'nmis inʌc ispʌctame Dios, y ja'nmis inʌc jutz njo'ctame tiyʌ'iwʌ wa'mij ñchi'tamu Diojsis.

¹³ Como yʌtij ñdyumʌtzʌctamwa'mij Cristoji'ŋ, te' 'yumbʌ'u'c ñe'cʌ's te' ñʌ'pin cruzcʌsi mijcotoyata'm, pijche'cmis ndo'mʌytyamu Dios yempe ya'ay mij inʌc ittamu wina Diojsis wyi'naŋdʌjqui.

¹⁴ Y ñe'cʌ Cristo's quiojtu te' sʌ'mnaquiuy tʌjcotoya y mijcotoyata'm. Wina tʌjta'm, te' judio-pʌ'nista'm, ŋgui'nistambatʌsmij inʌc mijta'm, gentilta'm. Y mijta'm ja'nmij inʌc musi sʌ'mnayu'c ittamu tʌji'ŋ. Pero yʌtij Cristo's yajʌcʌ'u we'ndambapʌ tiyʌ'stʌ inʌc y yajtumʌtzʌctamutʌ miji'ŋda'm.

¹⁵ Te'šej chʌjcu Cristo's chi'oquia'u'c ñe' wyin te' ca'u'c tʌcotoyata'm. Yajʌcʌ'u Cristo's te' aŋgui'mguytya'm chambapʌ's te' Diojsis yajwinduquiajpapʌ tiyʌ porque te' aŋgui'mgupyitta'm naqui'nisʌtʌjtambatʌ inʌc miji'ŋda'm. Pero ca'u'c te' Cristo, ñe'cʌ's chʌjcu jomepʌ tiyʌ. Minu tyumʌtzʌjcu gentilta'm te' judio-pʌnji'ŋ wa'ytyʌ sʌ'mnayu'c ittamu Diojsis wyi'naŋdʌjqui.

¹⁶ Ca'u'c jeque Cristo cruzcʌsi, yaju qui'nisoquiuy, tyumʌtzʌjcu gentil judioji'ŋda'm y chʌjcu wa'ytyʌ tumʌ'ajcu'yoyj sundaŋgue'tu Dios.

¹⁷ Minu jeque Cristo y ñe'cʌ'smij nyajmustamu oyepʌ tiyʌ, que ijtu sʌ'mnaquiuy mijcotoyata'm Diojsis wyi'naŋdʌjqui. Y mijta'm ya'ay mij inʌc ittamu wina Diojsis wyi'naŋdʌjqui. Te'šejtijque' Cristo'stʌj yajmusque'tu que ijtu sʌ'mnaquiuy Diojsis wyi'naŋdʌjqui tʌjcotoya. Y tʌs ja'ndʌs inʌc ya'ay nʌ ŋguenu Dios.

¹⁸ Ijtu sʌ'mnaquiuy tʌcotoyata'm porque Cristo's te' ñe' 'Yespiritu Santopit nʌtʌjcʌytyambatʌ, tʌj y mijta'm, Diojsis wyi'naŋdʌjqui.

¹⁹ Te'cotoya yʌtij ittamušejmij ja'namijyʌ' witita'm ni cʌtʌcpapʌšej ittamu. Porque yʌtij tumʌco nacioŋda'mbʌ'andʌyʌ' masanbʌnji'ŋda'm porque ñdyʌjcʌytyamwa'mij jujcha' Diojsis fyamilia'ojmota'mbʌ 'yunešej.

²⁰ Jujcha' tʌctzʌcpapʌ's quiotpa tzo'tzcuy te' tʌjquisñe', te'šej Diojsis quiojtu ñe' quiʌ'wejta'm y cha'maŋwa'oyeta'm wa'y yojšaju jujcha' tʌjquis cho'tzcuy. Y mijta'm, Diojsismij nyajtʌjcʌytyamu jujcha' tza'ta'm wa'mij ñecsco'matʌjtamu te'šejpʌ tʌjquis tzo'tzcuquiʌsi. Pero te' Jesucristo, te'wʌte' te' Diojsis jyejcupʌ aŋguinʌ tza'cowi'na.

²¹ Y Cristocʌsi necsco'mba te' tza' cha'tʌwʌcʌsita'm wa'y tyu'ŋaju te' Diojsis tyʌc, te'šejtʌ necsco'mdamba tʌta'm porque tumʌtzʌctamwa'ndʌ Cristoji'ŋ.

²² Y ñe'cʌpit jeque mijta'm nyostambamij jujcha' tza'ta'm wa'y tyu'ŋaju te' ñe' tyʌc. Mumu mijta'm jeque Diojsismijte' tyʌc itpamʌy ñe' 'Yespiritu Santo.