2 Corintios 9 - Zoque Copainalá New Testament

Pyʌcpa wa'y quiojtyaju tumin wʌ'aŋja'moyecotoyata'm

¹ Pero ja'ndiyʌ pyena wa'yʌsmij ŋgʌ'wejaytyamu toto chambamʌy te' tzi'oquiuy masanbʌngotoyata'm.

² Porque musjapya'ʌs mista'm oyepʌ su'noquiuy, y te'wʌ mʌja'ŋgotzamba'ʌs Macedonia-pʌ'nojmota'm. Nʌ'ʌs nʌtzamyaju que mij, te' Acaya-pʌnda'm, ñimejcʌytyamumij desde ame'a. Y mista'm ndziŋi'ajcu'yis chʌcje'cšajwa'a wʌwʌ pʌn.

³ Pero nʌ'ʌs ŋgʌ'wejyaju te' atzita'm uytyʌsmij comeque mʌja'ŋgotzamdamu yʌ'šejta'mbʌ tiyʌcʌsi. Te'cotoya nʌtzamyajuše'a'mʌs, nimejcʌytyamʌ,

⁴ uytya' miñaju ʌji'ŋ Macedonia-pʌnda'm y mbya'tʌtʌjtambamij jañimejcʌytyamʌ'ctijmij. Y tʌj maŋbatʌj ndza'aju te' nʌtʌsmij nijamdamupʌ tiyʌcʌsi, y tza'ajcuytyijque' mijcotoyata'm.

⁵ Te'cotoya ŋguipsu'ʌs que pyʌcpa wa'yʌs nyajmujšaju te' atzita'm wa'y winac myaŋyaju mi'aŋʌta'm. Ñe'cʌ'sta'm maŋba yajtu'mʌyaju winac te' tzi'oquiuy wina ndzamdzi'oquia'tamušejmis, wa'y teytya' ijtu jujcha' tumʌtzocoytya'mbʌ tiyʌ y ja'n jujcha' tʌs njaquewa'cupʌ tiyʌšej.

⁶ Yʌ'še'ʌs jeque ndzamba: Iwʌ's uša'ŋ ñijpu, uša'ŋ pyʌjcʌchoŋba. Y iwʌ's ñijpa wʌwʌ, wʌwʌ pyʌjcʌchoŋba.

⁷ Tumduma'ŋbʌ'nis yajtzi'oquia'ʌ te' quipsušej choco'yojmo, ja'n tuyu'yoquiuyji'ŋ, ni wya'quiajpa'ŋmʌjcʌ, porque Diojsis šunba tumʌtzocoy chi'oquia'papʌ's.

⁸ Y Diojsis muspa yajwʌwa'u yajya'moquiuy mi'ojmota'm, wa'mis nʌ'ittamu sundambapʌ tiyʌmis mumu jamacotoya. Y te'šej maŋba ijtu tiyʌ mis wa'y ndzi'oquia'tamu mumu oyepʌ tzʌquicotoya.

⁹ Yʌ'šej ja'yʌyu te' wʌpʌ pʌn: Šaju y chi'oquia'u pobreta'm. Ñe' wyʌ'ajcuy itjojcʌtʌcpa mumu jamacotoya.

¹⁰ Te' Dios, chi'papʌ's tʌmbu te' maŋba ñijpupʌ, y sunba quiu'tupʌ chi'pa cu'tcuy, te'wʌ's maŋba chi'u y yajpucsjayu mista'm nipi, y maŋba yajwʌwa'jayu mis oyeta'mbʌ ndzʌqui mis nwʌ'ajcupyit.

¹¹ Te'šejmij maŋba itʌpa'ttamu mumutiyʌcʌsi wa'mij ša'oytyamu. Y te'wʌ tʌste' nwe'nbʌ'pa, y te'cotoya nʌmyajpa yʌscotoya Dios.

¹² Porque te' nʌmis nyajtu'mʌytyamupʌ tiyʌ's maŋba yojsu wa'y pyajtzaŋdajšaju masanbʌnda'm. Y te'šejtijque' maŋba yojsu wa'y wʌwʌ pʌn nʌmyaju yʌscotoya Dios.

¹³ Yʌ'šejta'mbʌ tiyʌtʌ nʌ ndzʌctamu'ŋmʌjcʌ, te' Jerusale'ŋojmota'mbʌ's myʌja'ŋwʌcotzamyajpa Dios. Yʌ'šej wyʌcotzamyajpa porque mato'ŋoyjaytyambamis te' Cristo's 'yevangelio. Y te'šejtijque' porque tumʌtzocoy ŋgottamumis tumin ñe'cʌcotoyata'm y eyata'mbʌcotoya.

¹⁴ Te'šejtijque' ñe'cʌ'sta'm wya'cjayajpa Dios mijcotoyata'm. Y jene šunʌtʌjtambamij te' Diojsis maya'aŋbʌ yajya'moquiupyit mista'm ndzoco'yojmo ijtupʌ.

¹⁵ Te' aŋba'tepʌ y jana tza'maŋbʌ Diojsis yajya'moquiuquiotoya: Yʌscotoya Dios.