2 Corintios 3 - Zoque Copainalá New Testament

Tiyʌ chamba te' jomepʌ trato's

¹ ¿Maŋbasʌ'ŋdʌs nitza'mʌwyʌtzʌjcu nwin? ¿Ijtusʌ'ŋde' pyena, jujcha' eyata'mbʌ's, wa'ytyʌj nitza'mʌyaju mijcʌsita'm totojayepit, o mistʌj wa'y nitza'mʌytyamu?

² Mijte'ta'm jujcha'ndʌs ndotojaye nitza'mʌpyapʌ'stʌj. Ja'yʌyupʌšej tʌs ndzoco'yojmo, ispʌquiajpapʌ y tyu'ñajpapʌ mumu pʌ'nis.

³ Nyajquejtambamis que mijta'mde' jujcha' Cristo's tyotojaye. Ñe'cʌ's yajtujcu yʌ'wʌ tʌs nyojsaŋbit. Y yʌ'wʌ ja'yʌyu ja'n tintapit sino que te' quenbapʌ Diojsis 'Yespiritupit. Ja'nde' nojtʌyupʌ paquipʌ tza'cʌsi, sino que ijtu pʌ'nista'm pononbʌ chocoquiʌsi.

⁴ Jana na'chcu'yʌj nʌmba yʌ'šej porque Cristo'stʌj cʌ'weju, y te'šejtijque' Diojsis.

⁵ Ja'nyʌ' tʌsne' mujsoquiuy wa'ytyʌs tiyʌ'iwʌ ŋguipsaŋgospo'ʌyu, sino que tʌs mujsoquiuy Diojsistʌjte' tzi'pa.

⁶ Yʌ'wʌ'stʌj yajnʌctʌ'yu te' jomepʌ trato wa'ytyʌs ndzamjaytyamu pʌnda'm. Y ñe'cʌ'stʌj cojtu ja'nde' jayupʌ tiyʌpit sino que 'Yespiritupit. Porque te' jayupʌ tiyʌ yajca'opya, pero te' Espiritu's tzi'tambatʌ quenguy.

⁷ Te' tza'cʌsi nojtʌyajupʌ letra Moisejsis 'yaŋgui'mgu'yojmo yojšajpa inʌc wa'y yajca'oyu. Y yʌ' trato queju tzi'muŋgʌji'ŋ inʌc cosaque'cše'ŋoyj ja'n inʌc musi quiengʌpʌquiaju te' Israel-pʌ'nis te' Moisejsis wyinnaca te' chi'muŋgʌpit. Te'wʌ nʌte' inʌc 'yaŋboñaju.

⁸ Te' winbʌ trato tzi'muŋgʌji'ŋbʌte' inʌc, pero te' Espiritu's trato yospapʌpit te' pʌ'nista'm choco'yojmo más aŋba'tepʌ tzi'muŋgʌji'ŋbʌte'.

⁹ Porque juca tzi'muŋgʌji'ŋbʌte' inʌc te' trato yajnʌco'aŋgʌyupʌpittʌ, aŋba'tepʌ tzi'muŋgʌji'ŋbʌte' te' trato justococotpapʌpittʌ.

¹⁰ Te' winapʌ tzi'muŋgʌji'ŋbʌ inʌc, pero ja'n ñʌtu'mbajcajay yʌtijpʌ's chi'muŋgʌ', porque te' yʌtijpʌ más tzi'muŋgʌpacpa.

¹¹ Porque juca tzi'muŋba inʌc te' trato nʌ inʌc yajupʌ, más wʌwʌ maŋba chi'muŋgʌpajcu te' ja'n yayepʌ trato.

¹² Como muspatʌs que más oye yʌ' jomepʌ trato, jana na'chcuytyʌs ndzamba.

¹³ Y ja'ndʌs ndzʌqui chʌjcušej Moisejsis. Ñe'cʌ's quiotpa inʌc windoc wyinnacacʌsi uy quiengʌpʌquiaju Israel-pʌ'nista'm te' nʌ inʌc yajupʌ tzi'muŋgʌ'.

¹⁴ Pero nuyu'ajyaju ñʌctʌ'yoquiuy. Porque hasta yʌtijta'mbʌ jamo'oyj tyu'ñajpa'c te' pecapʌ trato te'šejmaj ñʌ'ijtyaju te'šejpʌ windoc, y ja'n ñʌctʌ'yay. Porque yʌ' windoc, jʌcʌ'upʌ tiyʌte' nwʌ'aŋjamba'ctʌ Cristo.

¹⁵ Y te'šejmaj hasta yʌtijta'mbʌ jamo'oyj, tyu'ñajpa'c Moisejsis tyotojaye ijtu jujcha' windoc ñe'ta'm chocoquiʌsi.

¹⁶ Pero cacpʌ'yajpa'c chocoy tʌ Ngomicotoya maŋba jyʌcʌ'u te' windoc wa'y ñʌctʌ'yaju.

¹⁷ Porque tʌ Ngomi, te'wʌte' te' Espíritu Santo. Y ijtu'c tʌ Ngomi's 'Yespiritu tʌ ndzoco'yojmo nʌ'ijtutʌ te' libre'ajcuy tzi'papʌtʌ Diojsis.

¹⁸ Te'cotoya jʌcʌ'pʌ'u'ca te' windoc, ŋguenjaytyambatʌ tʌ Ngomi's chi'muŋgʌ'. Y ñe'cʌ'stʌ cacpʌ'pa wa'ytyʌ nʌ'itjayu ñe' chocoy y itcuy, hasta que yajcota'nbatʌ te' ñe' chi'muŋgʌ'ojmo. Tʌ Ngomi'ste' 'Yespiritu's chʌcpa yʌ'šej.