2 Corintios 2 - Zoque Copainalá New Testament

¹ Yʌ'še'ʌs jeque ŋguipsu ne'cʌ, u'ya'mʌsmij tuyu'yoyu'c ŋgʌ'minwʌtzʌctamu.

² Porque juca ʌsmij nʌtuyu'yoytyamba, misʌj ja'n mawe nyajtzi'ŋbʌ'u. Misʌj inʌc maŋba nyajtzi'ŋbʌ'u, pero nʌtuyu'yoytyamwa'mʌsmij.

³ Te'še'ʌsmij njayjaytyamu u'yʌj yajtuyu'yoyaju te' mi'ojmota'm pyʌcpapʌ's inʌc wa'yʌj yajtzi'ŋbʌ'yaju nu'cpa'ca'mʌj. Nijamba'ʌs que juca tzi'ŋbʌ'pa'ʌj ʌj, maŋbamij ñchi'ŋbʌ'tamu ʌji'ŋ.

⁴ Jene isu ʌs toya y tuyu'yoquiuy ndzoco'yojmo. Te'cotoya'ʌsmij nwitʌm nʌ'ʌcʌ'mʌ njayjaytyamu, ja'nde' wa'yʌsmij nyajtriste'ajtamu, pero wa'miste' mustamu jujche'ŋʌsmij sundamba.

Yajcotocopya Pablo's te' jojtʌjcʌ'opyapʌ

⁵ Pero iwʌ'sʌj yajtriste'aju ja'nde' ʌjtij yajtriste'aju, ŋgomʌ'pya'ʌs que mumumij nyajtriste'ajtamu uša'ŋ. Te'še'ʌs ndzamba u'yʌs nicotza'mʌyu ne'cʌ más que pyʌcpašej.

⁶ Oya' te'še'ŋ 'yotoŋjayajuše'ŋ yʌ' pʌn wʌwʌta'mbʌ's.

⁷ Te'cotoya más oye wa'mis nyajcotocoytyamu y ndzamdzocopyactamu, uytya' maŋu quia'u aŋba'tepʌ triste'ajcu'yis.

⁸ Te'wʌcotoya nwa'cjaytyamba'ʌsmij wa'mis nyajquendamu que sundambamajmis ñe'cʌ.

⁹ Nimeque ʌsmijte' yʌ'šej njayjaytyamu, wa'yʌsmij ndzʌjquistamu y wa'yʌs mujsu juca myato'ŋoytyambamij mumutiyʌcʌsi, y myato'ŋoytyamumij.

¹⁰ Y iwʌ mis nyajcotocoytyamba, te'šejtijque' ʌs. Porque te'še'ʌs nyajcotocoquie'tu mijcotoyata'm Cristo's wyi'naŋdʌjqui, juca ijtu tiyʌ'iwʌ wa'yʌs nyajcotocoyu.

¹¹ Yʌ'še'ʌs ndzʌcpa uytyʌj aŋgoma'cʌytyamu'ŋmʌjcʌ yajtiyʌcʌsi Satanajsis. Mustamba'ndʌ jeque tiyʌta'm quipsaŋgospo'ʌpya ñe'cʌ's.

Tiyʌ quiʌñʌñu Pablo's Troas-cumgu'yojmo

¹² Nu'cu'ʌj Troas-cumgu'yojmo wa'yʌs ndzamgopuŋu te' evangelio chambapʌ's te' Cristo, y ya'aŋwajayu'ʌj tʌjcʌquiuy wa'yʌs ndzamgopuŋu tʌ Ngomi's.

¹³ Pero jašʌ'mgʌne'ca ʌs ndzocoy porque jambya'tʌ'ʌs tey te' ʌs atzi Tito. Oto'ŋʌchaquiaju'ʌs, y tzu'cumu'ʌj wa'yʌj maŋu Macedonia.

Diojsistʌ yajnʌwʌ'ajpa mumutiyʌ Cristopit

¹⁴ Nʌjapya'ʌs Dios yʌscotoya, porque ñe'cʌ wi'najojcʌtʌcpa wa'ytyʌj yajnʌwʌ'aju Cristo Jesuspit. Tʌjpit yajquejpa mumujutʌ que omombapʌ tiyʌšejte' wa'y ñʌctʌ'yaju pʌ'nis tiyʌta'm Diojsisñe'.

¹⁵ Porque Cristo'stʌjyʌ' 'yomombapʌ tiyʌšej Dioscotoya te' nʌ quiotzoquiajupo'mo y nʌ tyocoyajupo'mo.

¹⁶ Wiyuŋšej te' nʌ tyocoyajupʌcotoya, yajca'opyapʌ omomašejtʌj wa'y quia'yaju. Te' nʌ quiotzoquiajupʌcotoya, yajcotzojcopyapʌ omomašejtʌj wa'y pya'tyaju quenguy. ¿Iwa' cosuju wa'y chamgopuŋu yʌ'šejta'mbʌ tiyʌ?

¹⁷ Tʌj, porque ja'ndʌjyʌ' soneta'mbʌ aŋma'yoyešej myotjayajpapʌ's sutzipit Diojsis chame wa'y mya'ʌyaju. Ndumʌtzocoytyʌs ndzamba Cristopit te' Diojsis wyi'naŋdʌjqui, porque ñe'cʌ'stʌj cʌ'weju.