1 Juan 4 - Zoque Copainalá New Testament

Ijtu Espíritu Santo'ʌyajupʌ pʌn y ijtu pʌn ñʌc'ijtʌyajupʌ yatzi-espiritu's

¹ Tʌwʌy, sundamba'ʌsmij. Uy wʌ'aŋjamdame ñempe'iwʌ pʌn nʌmbapʌ que Diojsis 'Yespiritupit aŋma'yopya. Tzʌjquistamʌ winac juca Diojsiste' 'Yespiritupit aŋma'yopya. Porque sone nʌ wyijtyaju sujchajpapʌ tza'maŋwa'oye yʌ' najsacopajcʌsi.

² Yʌ'wʌcʌsitʌ muspa iwʌ's ñʌ'itjayu Diojsis 'Yespiritu: Iwʌ tumʌtzocoy nʌmba que Jesuste' te' Cristo, Diojsis quiopiwi, y que minu pyʌ'naju jujcha' pʌn najsacopajcʌsi, te'šej quiowʌ'aŋjambapʌ's, te'wʌte' aŋma'yopyapʌ Diojsis 'Yespiritupit.

³ Y jujche'ŋ nʌmbapʌ que jaminʌ pyʌ'na jujcha' pʌn te' Jesucristo, Diojsis quiopiwi, te'šej nʌmbapʌ, ja'n 'yaŋma'yoy Diojsis 'Yespiritupit. Yʌ'šejpʌ pʌ'nis qui'nispa Cristo. Mustambamis que maŋba inʌc minu, y yʌtij yʌ'ya ijtu najsacopajcʌsi.

⁴ Tʌwʌy, Diojsismijyʌ' ñe'ta'm y te'cotoya nwʌytyamwa'mis yʌ' sujchajpapʌ. Porque te' Dios, te' ijtupʌ mista'm ndzoco'yojmo, maste' pʌmi'ʌyupʌ que ja'nde' yatziwʌ, aŋgui'mbapʌ najsacopajcʌsi.

⁵ Ʌ' sujchajpapʌ's quio'ŋyajpa yʌ' yatzita'mbʌ tiyʌ najsacopajcʌsi. Te'cotoya te'wʌ's yatzita'mbʌ tiyʌ chamyajpa, y te' jana wʌ'aŋja'moye's quiʌmato'ŋʌyajpa.

⁶ Tʌta'm Diojsistʌte' ñe'ta'm. Iwʌ's ispʌcpa Dios, cʌmato'ŋʌpyatʌ. Y iwʌ ja'n Diojsisñe', ja'ndʌ cʌmato'ŋʌy. Yʌ'šejta'mbʌ tiyʌcʌsitʌ muspa iwʌ's pyʌjcʌchoŋba te' wiyuŋbʌ tiyʌ y iwʌ's ja'n pyʌjcʌchowe.

Wiyuŋšej šunba Diojsis mumu pʌn

⁷ Tʌwʌy, sundamba'ʌsmij. Pyʌcpa wa'ytyʌ našunʌtʌjtamu ne'co'mo, porque Diojsiste' šajpa te' našunʌtʌjcuy. Mumu jujche'ŋdʌ ndumʌtzocoy našunʌtʌjtamba, Diojsisandʌte'ñe', y ispʌcpa Dios.

⁸ Iwʌta'm ja'n ñašunʌtʌjyay, ja'n ispʌquiay Dios, porque Diojsiste' šajpa su'noquiuy.

⁹ Yajquenutʌ Diojsis que ñe'cʌ's sundambatʌ, porque quiʌ'weju te' tʌŋdumʌpʌ 'Yune najsacopajcʌsi wa'ytyʌ mba'ttamu quenguy ñe'cʌpit.

¹⁰ Quendamʌ jutztʌ sundamba Diojsis. Ñempetʌ inʌc tʌ ja'n sundame ñe'cʌ, ñe'cʌ's wiyuŋšej sundambatʌ. Quiʌ'weju te' 'Yune wa'y chi'oquia'u wyin wa'y quioyojayu tʌta'm ŋgowa ca'u'c cruzcʌsi.

¹¹ Tʌwʌy, sundamba'ʌsmij. Juca te'šej tʌ sundamu Diojsis, te'šejtijque' pyʌcpa wa'ytyʌ našunʌtʌjtamu ne'co'mo.

¹² Yajujche'ctij jaquiena Dios ya'iwʌ's. Pero juca našunʌtʌjtambatʌ ne'co'mo, Dios itwa'a tʌta'm ndzoco'yojmo, y te'šejtʌ cota'nu'c sundamba Dios ndzoco'yojmo.

¹³ Mustambatʌ que ñe'cʌ Diojsis nʌ'itjojcʌtʌctambatʌ ñe' choco'yojmo, y ñe'cʌ itjojcʌtʌcpa tʌta'm ndzoco'yojmo. Mustambatʌ yʌ'šej porque ñe'cʌ'stʌ tzi'tamu te' ñe' 'Yespiritu Santo.

¹⁴ Y tʌs ŋguenutʌs te' Diojsis 'Yune, y ndzamgopuŋbatʌs que te' Tata Diojsis quiʌ'weju te' 'Yune wa'y minu yajcotzojcu te' najsacopajcʌsita'mbʌ.

¹⁵ Iwʌ tumʌtzocoy nʌmbapʌ que Jesús Diojsis te' 'Yune, ñe' choco'yojmo itjojcʌtʌcpa Dios y Diojsis ñʌ'itjojcʌtʌcpa te'šejpʌ pʌn choco'yojmo.

¹⁶ Y tʌta'm mustamba'ndʌ ndzoco'yojmo y nwʌ'aŋjamdamwa'ndʌ que jene tʌ sundamba Diojsis. Diojsis šajpa su'noquiuy. Y iwʌ's šunba Dios y eyata'mbʌ pʌn, Diojsis ñʌ'itjojcʌtʌcpa te'šejpʌ pʌn choco'yojmo, y te' pʌ'nis choco'yojmo itjojcʌtʌcpa Dios.

¹⁷ Juca te'še'andʌ, cota'nbʌ'wa'a Diojsis šu'noquiuy tʌta'm ndzoco'yojmo wa'ytyʌ jana na'tztamu te' cʌme'tzoquiuy jamo'oyj. Jujcha' ñe'cʌ su'nopya, te'šejtijtʌ su'noytyaŋgue'tpa yʌy najsacopajcʌsi.

¹⁸ Iwʌ na'tzpamaj, jaquiota'nbʌ'ʌmaj ñe' choco'yojmo Diojsis šu'noquiuy, porque juca inʌc cota'nbʌ'wa'ande' su'noquiuy ja'na ña'tze. Porque te' ña'tzipit nʌwa'nde' quio'aŋgʌyu. Te' ña'tzipit quejpa que jaquiota'nbʌ'ʌmaj ñe' choco'yojmo te' Diojsis šu'noquiuy.

¹⁹ Tʌta'm sundambatʌ Dios, porque ñe'cʌ'stʌ wina sundamu.

²⁰ Juca iwʌ nʌmba: Ʌs sunba'ʌs Dios. Y juca te'wʌ'stij qui'nispa 'yatzi, sutzpapʌte'. Porque iwʌ's ja'n šuni te' 'yatzi nʌ quienupʌ, ¿jutza' jeque muspa šunu Dios ja'n nʌ quienupʌ?

²¹ Y Diojsis yʌ'šejtʌ aŋgui'mdamu: Iwʌ'sʌj sunba ʌj, tiene que wa'y šungue'tu 'yatzi.