1 Juan 3 - Zoque Copainalá New Testament

Jutita'mbʌte' te' Diojsis 'yuneta'm

¹ Coquendamʌ cuenta jutztʌ aŋba'te sundamba tʌ Ndata Diojsis wa'y ñʌmu: Yʌtij ʌsamijyʌ' uneta'm. Te'cotoya te' ja'n wyʌ'aŋjamyapyʌ's ñe'cʌ ja'ndʌ ispʌquiay tʌta'm, porque ja'n ispʌquiay ñe'cʌ.

² Tʌwʌy sundamba'ʌsmij. Yʌtij jeque, Diojsisandʌyʌ' 'yuneta'm, pero ja'nmaj quieye jutztʌ maŋba nductamu. Pero mustambatʌ que ñe'cʌšejtʌ maŋba nductamu minba'ca. Porque maŋbatʌ ŋguendamu ñe'cʌ mero jutzpʌte'.

³ Mumu jujche'ŋ ñe'cʌšej sunba tyuquiajupʌ's, quioqueñajpa cuenta uy quiowapa'tyaju jujcha' Cristo jaquiowapa'tʌ.

⁴ Mumu jujche'ŋ cowapa'tyajpapʌ's myaŋgocʌtʌquiajpa te' Diojsis 'yaŋgui'mguy, porque jujche'ŋ myaŋgocʌtʌquiajpapʌ's Diojsis 'yaŋgui'mguy cowapa'tyajpa.

⁵ Y mustambamis que Cristo minu najsacopajcʌsi wa'y yajʌcʌ'jayu tʌta'm ŋgowa, y ñe'cʌ jaquiowapa'tʌ.

⁶ Y mumu jujche'ŋ quio'ŋjojcʌtʌcpapʌ's Cristo ja'n quiowapa'tjojcʌtʌqui. Y jujche'ŋ cowapa'tjojcʌtʌcpapʌ's ni jaquiendʌ'ʌmaj ni ja'nmaj ispʌqui Cristo.

⁷ Coquendamʌ cuenta, tʌwʌy, umij ya'iwʌ's 'yaŋgoma'cʌytyamu. Iwʌ's chʌcjojcʌtʌcpa justopʌ tiyʌ justopʌ pʌ'nande', jujcha' Cristo justopʌte'.

⁸ Iwʌ cowapa'tjojcʌtʌcpa, Satanajsiste'ñe', porque Satanás cowapa'tjojcʌtʌcpa desde tzo'tzcu'yojmo. Y te' Diojsis 'Yune's minu wa'y yajayu te' Satanajsis yojsaŋ.

⁹ Mumu jujche'ŋ Diojsisa 'yuneta'm, ja'n quiowapa'tjojcʌtʌquiay, porque Diojsis quiotjayajwa'a choco'yojmo jomepʌ quenguy. Te'ta'mbʌ ja'na musi quiowapa'tyaju porque Diojsisande' 'yuneta'm.

¹⁰ Jujche'ŋ ja'n chʌquiapyʌ's justopʌ tiyʌ y ja'n šuñay 'yatzi, ŋgue'nʌpyatʌ que ja'nde' Diojsista'm 'yune, sino que Satanajsista'mde' 'yune.

Našunʌtʌjta'mitʌy

¹¹ Porque matoŋdamumis que chamyaju desde cho'tzcu'yojmo que pyʌcpapʌte' wa'ytyʌ našunʌtʌjtamu ne'co'mo.

¹² Uytyʌ ndzʌctamu Cai'ŋis chʌjcušej. Satanajsiste' inʌc ñe', y yajca'u te' pyotzo. ¿Y tiyʌcotoyasʌ'ŋde' yajca'u? Porque te' ñe' chʌqui yatzita'mbʌte' inʌc, y te' pyotzo's chʌqui wʌta'mbʌte' inʌc.

¹³ Atzita'm, uy nʌmaya'tame juca ŋgui'nistambamij te' ja'n wyʌ'aŋja'moyapyʌ's.

¹⁴ Ca'uwʌše'andʌte' inʌc cowa'ojmo, pero mba'twa'ndʌ te' iscuy-quenguy. Mustambatʌ que yʌ'šejte' porque suñajpatʌ te' atzita'm. Iwʌ's ja'n šuni 'yatzi ca'uwʌšejmaj ijtu choco'yojmo.

¹⁵ Jujche'ŋ qui'nišajpapʌ's 'yatzi, yajca'opyapʌte'. Y mustambamis que te' yajca'opyawʌ's jañʌ'itʌ ñe' choco'yojmo te' ja'n yayepʌ quenguy.

¹⁶ Jesucristo'stʌte' yajquenu jutz pyʌcpa wa'ytyʌ su'noytyamu. Ñe'cʌ's chi'oquia'u wyin tʌcotoyata'm. Te'šejtijque' pyʌcpa wa'ytyʌ ndzi'oquia'tamu ne' nwin atzicotoyata'm ñempetʌ yajca'ya pʌ'nis.

¹⁷ Pero iwʌ's pya'tpatij jyamacʌtʌjcuy, y quienba 'yatzi nʌ quienupʌ's toya y ja'n quiotzowe tiyʌ'iwʌpit, ¿jutza yajquejpa juca ijtu ñe' choco'yojmo te' Diojsis šu'noquiuy?

¹⁸ Tʌwʌy, uy na' aŋnaca su'noquiuytyijtʌ nʌ'ittame, sino que yajquejta'mitʌy ndzʌquipit que wiyuŋšejtʌte' našunʌtʌjpa.

Uytyʌ nʌcna'tzʌyu nwin Diojsis wyi'naŋdʌjqui

¹⁹ Yʌ'wʌpit muspatʌ que nwʌ'aŋjambatʌ te' wiyuŋbʌ tiyʌ Diojsis wyi'naŋdʌjqui, y te'šej sʌ'mnayu'c tʌ ittamba ñe' wyi'naŋdʌjqui.

²⁰ Pero juca aŋjambatʌ ndzoco'yojmo que ja'ndʌ nwʌ'aŋjamdame te' wiyuŋbʌ tiyʌ, más oye wa'ytyʌ nwʌ'aŋjamdamu Dios que ja'n tʌta'm ndzocoy, porque ñe'cʌ's myuspa mumutiyʌ.

²¹ Tʌwʌy, sundamba'ʌsmij. Juca aŋjamdambatʌ ndzoco'yojmo que nwʌ'aŋjamdambatʌ te' wiyuŋbʌ tiyʌ jana na'chcuytyʌ muspa oto'ŋʌytyamu Dios.

²² Y tiyʌta'mdʌ nwa'ctamba ñe'cʌcʌsi, ñe'cʌ's maŋbatʌ tzi'tamu, porque ŋgojamjaytyambatʌ ñe' 'yaŋgui'mguy y ndzʌctambatʌ tiyʌcʌsitʌ ñe'cʌ nyajtzocopyacpa.

²³ Y yʌ'wʌte' te' ñe' 'yaŋgui'mguy: Wa'ytyʌ nwʌ'aŋjamjaytyamu te' 'Yune Jesucristo, y wa'ytyʌ našunʌtʌjtamu ne'co'mo, ñe'cʌ'stʌ aŋgui'mdamušej.

²⁴ Y iwʌ's quiojamjapya Diojsis 'yaŋgui'mguy, choco'yojmo ñʌ'itjojcʌtʌcpa Diojsis. Y Dios itjojcʌtʌcpa te'šejpʌ pʌ'nis choco'yojmo. Mustambatʌ que ñe'cʌ itjojcʌtʌcpa tʌta'm ndzoco'yojmo porque tzi'tamwa'ndʌ te' Espíritu Santo.