1 Juan 2 - Zoque Copainalá New Testament

Cristote' tʌta'm ndzamdʌjcʌ'opyapʌ

¹ Tʌwʌy, yʌ'šejta'mbʌ tiyʌ'ʌsmij nʌ njayjaytyamu wa'mij jana ŋguiowapa'ttamu. Y juca iwʌjutiwʌ cowapa'tpa, te' justopʌ Jesucristo'stʌ maŋba co'otoŋu Diojsis wyi'naŋdʌjqui.

² Y yʌ' Cristo's chi'oquia'u wyin wa'y quioyojayu tʌta'm ŋgowa, ca'u'c cruzcʌsi. Y ja'n na' tʌta'mne' ŋgowata'm wa'y quioyojayu, sino que mumu najsacopajcʌsita'mbʌ'sñe'.

³ Juca ŋgojamjapyatʌ te' Diojsis 'yaŋgui'mguy, te'šejtʌ muspa que ispʌctambatʌ ñe'cʌ.

⁴ Juca iwʌ nʌmba: Ʌs ispʌcpa'ʌs Dios, y ja'n quiojamjay ñe' 'yaŋgui'mguy, sutzpapʌte' y Diojsis chame ja'ndiyʌmaj ñe' choco'yojmo.

⁵ Pero iwʌ's quiojamjapya te' Diojsis chame, yʌ'šejpʌ pʌ'nis choco'yojmo Diojsis quiotwa'a wiyuŋšejpʌ y cota'nupʌ su'noquiuy. Yʌ'šejtʌ mustamba que Diojsis choco'yojmotʌ ittamu.

⁶ Juca iwʌjutiwʌ nʌmba: Ʌj Cristo's choco'yojmo'ʌj itjojcʌtʌcpa, pyʌcpa wa'y wyijtu Cristo wijtušej.

Te' jomepʌ aŋgui'mguy

⁷ Atzita'm, ja'ʌsmij nʌ njayjaytyamu jomepʌ aŋgui'mguy, sino que te' wina tʌjcʌyupʌ, te' nʌ'ittamupʌmis desde cho'tzcu'yojmo. Te' wina tʌjcʌyupʌ aŋgui'mguy, te'wʌtijte'que' te' tzame mbʌjcʌchoŋdamupʌmis nwʌ'aŋjamdamu'cmis Cristo.

⁸ Pero nʌ'ʌsmij njayjaytyaŋgue'tu como que jomepʌ aŋgui'mguyʌ'. Itcupyit yajqueju Cristo's que wiyuŋbʌ tiyʌte', y te'šejmis nʌ nyajquejtaŋgue'tu mista'm. Porque yʌtij nʌwa'nde' quiʌtʌjcu tʌta'm ndzoco'yojmopʌ pi'tza'ŋajcuy, y nʌwa'ndʌ sʌ'ŋgʌtzʌcjaytyamu te' wiyuŋšejpʌ sʌ'ŋgʌ's.

⁹ Iwʌ nʌmba: Diojsis šʌ'ŋgʌtzʌcjapya ʌs ndzocoy, y qui'nispa 'yatzi, te'šejpʌ pʌ'nis japyʌjcʌchoŋjamaj Diojsis šʌ'ŋgʌ' ñe' choco'yojmo.

¹⁰ Iwʌ's šunba 'yatzi, Diojsis šʌ'ŋgʌtzʌcjawya'a chocoy, y choco'yojmopʌ tiyʌ's ja'na yajcowapa'te.

¹¹ Pero iwʌ's qui'nispamaj 'yatzi, japyʌjcʌchoŋjamaj Diojsis šʌ'ŋgʌ' ñe' choco'yojmo, y witpa tocoquiu'yojmo. Ja'n myusi jutʌte' nʌ myaŋu porque jašʌ'ŋgʌtzʌcja chocoy sʌ'ŋgʌ's y ja'n musi quienu te' wiyuŋbʌ tiyʌ.

¹² Nʌ'ʌsmij njayjaytyamu tʌwʌy, porque Diojsis yajcotocoyjaytyamwa'a mista'm ŋgowa tʌ Ngomi Jesucristo's ñʌquiʌsi.

¹³ Y mijta'm, tatajta'm, nʌ'ʌsmij njayjaytyaŋgue'tu, porque ispʌctambamis Cristo, te' ijtupʌytya' inʌc maŋba'cmaj tyujcu mumutiyʌ. Y mijta'm, unepʌnda'm, nʌ'ʌsmij njayjaytyaŋgue'tu, porque nwʌytyamwa'mis te' yatziwʌ. Y mij, uneta'm, nʌ'ʌsmij njayjaytyaŋgue'tu, porque ispʌctamba'mis tʌ Ndata Dios.

¹⁴ Y mijta'm, tatajta'm, njayjaytyamu'ʌsmij, porque ispʌctambamis Cristo, te' ijtupʌytya' inʌc maŋba'cmaj tyujcu mumutiyʌ. Y mijta'm, unepʌnda'm, njayjaytyaŋgue'tu'ʌsmij, porque mbyaquipaquita'm mij, y Diojsis chame ijtu mista'm ndzoco'yojmo y nwʌytyamwa'mis te' yatziwʌ.

¹⁵ Uy tzi'tame ndzocoy te' yatzipʌ najsacopac, ni uy cʌñʌñdyame najsacopajcʌsita'mbʌ tiyʌ. Juca iwʌ's chi'pa chocoy najsacopac, tʌ Ndata Diojsis šu'noquiuy ja'ndiyʌmaj yʌ' pʌ'nis choco'yojmo.

¹⁶ Porque tʌ Ndata Diojsis ja'n šuni wa'ytyʌ ŋgʌñʌñdyamu tiyʌta'm quiʌñʌñajpa te' ja'n wyʌ'aŋjamyapyʌ's ñe'cʌ. Porque ñe'cʌ'sta'm yatzi wi'nis šu'noquiuy chʌquiajpa, y tiyʌ quieñajpa wyitʌmbit, te'wʌ quio'ŋyajpa, y itʌpa'tcupyit myʌja'ŋdzʌquiajpa wyin.

¹⁷ Pero maŋba yaju yʌ' najsacopac y tiyʌta'm pʌ'nis quiʌñʌñajpa, pero iwʌ's chʌcpa Diojsis šunbašej maŋba pya'tu ja'n yayepʌ quenguy.

Te' wiyuŋbʌ tiyʌ y te' sutzi

¹⁸ Tʌwʌy, co'yajcu'yojmotya'ndʌyʌ' nʌ ittamu. Matoŋdamwa'mis que maŋba inʌc quieju te' qui'nispapʌ's te' Cristo. Y yʌtij yʌmʌc teymʌjca nʌ quiejyaju qui'nišajpapʌ's Cristo. Yʌ'šejta'mbʌ tiyʌ'stʌ yajnʌctʌ'pya que co'yajcu'yojmotya'ndʌyʌ' nʌ ittamu.

¹⁹ Yʌ'ta'mbʌ tʌste' ndu'mʌquiu'yojmoc tzu'cumyaju pero ja'nde' wiyuŋšejta'mbʌ wʌ'aŋja'moye. Juca inʌc tumo'oyj wʌ'aŋja'moyajpa tʌji'ŋ, tzʌ'yjojcʌtʌquiaju inʌc tʌji'ŋ. Pero tzu'cumyaju wa'y quieju que ja'n mumu wyʌ'aŋja'moyay jujcha' tʌta'm.

²⁰ Pero mijta'm njyo'ʌytyamwa'mij Espíritu Santopit te' Cristo's, y mustamba'mis mumutiyʌ.

²¹ Nʌ'ʌsmij njayjaytyamu ja'nde' porque ja'nmis mustame wiyuŋbʌ tiyʌ, sino porque mustamba'mis. Porque sutzi ñʌtu'ŋajyajpapʌ's ja'n wyiyuŋdzamyay.

²² Jujche'ŋ iwʌ's ja'n pyʌjcʌchowe que Jesuste' te' Cristo te' Diojsis quiopiwi, yʌ'wʌte' te' sutzpapʌ. Y jujche'ŋ iwʌ's ja'n pyʌjcʌchowe que te' Dios, Cristo's te' Tyataj, y te' Cristo que Diojsis te' 'Yune, yʌ'wʌte' te' qui'nispapʌ's Cristo.

²³ Porque mumu'iwʌ'sta'mis ja'n pyʌjcʌchoŋyay te' Diojsis 'Yune, Tata Dioste' ja'n pyʌjcʌchoŋyay. Y iwʌ'sta'mis pyʌjcʌchoŋjayajpa te' Diojsis 'Yune, pyʌjcʌchoŋyajpa te' Tata Dios.

²⁴ Tiyʌmis matoŋdamu nwyʌ'aŋja'moytyamu'cmij, te'šej wʌ'aŋjamjojcʌtʌctamʌ. Juca nwʌ'aŋjamjojcʌtʌctambamis tiyʌmis matoŋdamu nwyʌ'aŋja'moytyamu'cmij, choco'yojmomij maŋba ñʌ'itjojcʌtʌctamu Diojsis, y te'šejtijque' 'Yune's.

²⁵ Y Jesucristo'stʌte' tzamdzi'tamu te' ja'n yayepʌ quenguy.

²⁶ Yʌ' nʌše'ʌsmij njayjaytyamu wa'yʌsmijte' nyajmustamu te' sunbapʌ'smij 'yaŋgoma'cʌtʌjtamu.

²⁷ Pero mijta'm njyo'ʌytyamwa'mij Cristo's te' Espíritu Santopit, te' nʌ'ittamupa'mis mista'm ndzoco'yojmo. Te'cotoya ja'ndiyʌ pyena eyawʌ'smij wa'y 'yaŋmaytyamu, porque ñe'cʌ'smij 'yaŋmaytyamu mumutiyʌcʌsi. Y aŋma'yopya wiyuŋbʌ tiyʌpit y ja'n šutzi. Te'šej jeque co'ŋjojcʌtʌctamʌ Cristo te' Espíritu Santo'smij 'yaŋmaytyamušej.

²⁸ Yʌtij jeque, tʌwʌy, co'ŋjojcʌtʌctamʌ ñe'cʌ, uytyʌ maŋu na'tztamu ndzoco'yojmo ni ndza'ajtamu ñe' wyi'naŋdʌjqui tzajpojmo'ca nʌ wyanajcu'c nʌ'ca minu.

²⁹ Juca mustambamis que yʌ' Cristo justopʌte', mustaŋgue'ta que iwʌ'sta'mis chʌquiajpa justota'mbʌ tiyʌ Diojsisande' 'yuneta'm.