1 Juan 1 - Zoque Copainalá New Testament

Nʌtʌ yajmujšaju te' ja'n yayepʌ quenguy

¹ Nyajmustambatʌsmij te' ijtupʌytya' inʌc maŋba'cmaj tyujcu mumutiyʌ, ne' ŋgowipittʌs ŋgʌmato'ŋʌyupʌ, y ne' nwitʌmbittʌs ŋguenupʌ. Y yʌ' ŋguenupʌ tiyʌtʌs, y mbi'quisupʌ tiyʌtʌs, ñe'cʌte' te' Tzame tzi'tambapʌ'stʌ quenguy.

² Diojsis yajquenutʌj quenequene yʌ' tzi'papʌ'stʌj quenguy. Y ŋguenutʌs, y ñe'cʌtʌs ŋgotzamba. Y nyajmustambatʌsmij que yʌ'wʌte' te' ja'n yayepʌ quenguy ijtupʌytya' inʌc tʌ Ndata Diosji'ŋ, y minutʌj yajquenu wyin.

³ Yʌ'wʌ ŋguenutʌs y ne'cʌtʌste' ŋgʌmato'ŋʌyu. Y yʌtij nyajmustambatʌsmij wa'ytyʌ ndumʌquipstamu ne'co'mo, jujcha' tʌj ndumʌquipspa Diosji'ŋ y 'Yune Jesucristoji'ŋ.

⁴ Y yʌ'šejta'mbʌ tiyʌtʌsmij njayjaytyamba wa'ytyʌ omdzocopyactamu.

Myasa'najcupyit Dios sʌ'ŋgʌte'

⁵ Matoŋutʌs tiyʌ chamu tʌ Ngomi Jesucristo's, y nyajmustambatʌsmij. Yʌ'šej nʌmu: Dios sʌ'ŋgʌte', y ñe' choco'yojmo ja'ndiyʌ nijutzpʌ pi'tza'ŋajcuy, porque nijujche'c ja'n quiowapa'te.

⁶ Juca nʌmdambatʌ que tumʌquipstambatʌ Diosji'ŋ, y witpatʌ tocoquiu'yojmo, nʌtʌte' ŋga'ŋdzactamu, te' wiyuŋbʌ tiyʌ y sutztambatʌ.

⁷ Juca Diojsis šʌ'ŋgʌ' tʌ nʌtu'ŋajapya, sʌ'ŋjapyašejtʌ ñe'cʌ's, wiyuŋšejtʌ tumʌquipspa Diosji'ŋ, y Diojsis 'Yune's, Jesucristo's ñʌ'pi'nis yajcowajapya mumu tʌ ŋgowa.

⁸ Juca nʌmdambatʌ que ja'ndiyʌ tʌ ŋgowa, aŋgoma'cʌpyatʌ ne' nwin y ja'ndiyʌ wiyuŋbʌ tiyʌ tʌ ndzoco'yojmo.

⁹ Juca ŋgowʌ'aŋjamdambatʌ tʌta'm ŋgowa Dioscʌsi, ñe'cʌ justopʌte' y nijamdambatʌ que maŋba yajcotocoyjayu tʌta'm ŋgowa, y yajcowajayu mumu tʌta'm nyacha'cuy.

¹⁰ Pero juca nʌmbatʌ que jaquiowapa'tʌtʌ, sutzpapʌ pʌnšejtʌ nʌ ŋgojtu Dios. Juca te'šejtʌ nʌmba ja'ndiyʌmaj ñe' chame tʌta'm ndzoco'yojmo.