1 Corintios 9 - Zoque Copainalá New Testament

Tiyʌcʌsita'm aŋgui'mba cʌ'wej

¹ ¿Ja'nsʌ'ŋʌjyʌ' cʌ'wej? ¿Ja'nsʌ'ŋʌj libre? ¿Jaŋguienasʌ'ŋʌs tʌta'm Ngomi Jesús? ¿Ja'nsʌ'ŋde' mijta'm ʌs ŋgoyojsaŋ tʌ Ngomipit?

² Juca eyata'mbʌ nʌmyajpa que ja'nʌjyʌ' cʌ'wej, wiyuŋšej mista'm mustambamis que cʌ'we'ʌjyʌ', porque mijpitta'm quejpa que cʌ'we'ʌjyʌ' tʌ Ngomi'sñe'.

³ Te'še'ʌs aŋdzoŋyajpa te' cʌ'aŋwa'cme'chajpapʌ'sʌj.

⁴ Tiya'a ¿ja'nsʌ'ŋ 'yoye wa'mistʌj ndzi'tamu ŋgu'tcuy y ujcuy?

⁵ ¿Ja'nsʌ'ŋdʌs musi nʌ'ijtu tʌs nyomo wʌ'aŋja'mopyapʌ wa'ytyʌs mujsu nʌwijtyaju jujcha' eyata'mbʌ cʌ'we'ista'm, y jujcha' tʌ Ngomi's pyotzo'sta'm y te' Cefajsis?

⁶ ¿Na' ʌjtij y Bernabe'is pyʌcpa wa'ytyʌs ŋgʌ'pit nyosqueju ŋgu'tcuy?

⁷ ¿Iwa'sʌ'ŋ soldado'ajpa y ñe'cʌ's quioyojpa wyin? ¿Iwʌ'sasʌ'ŋ chʌcpa uva-nipi y ja'n quiu'tjay tyʌm? ¿Iwʌ'sasʌ'ŋ pyʌ'nʌpya te' wyacasta'm y ja'n 'yucjay leche?

⁸ ¿Ndzambasʌ'ŋʌs yʌ'šej pʌ'nis 'yaŋgui'mgupyit? ¿Ja'nja te'šej chamgue'te aŋgui'mgu'yis?

⁹ Porque yʌ'šej ja'yʌyu te' Moisejsis 'yaŋgui'mgu'yojmo: Uy aŋsi'ni te' cabrestu nʌ'c tyʌmbucopu'ŋoyu. ¿Cabrestusʌ'ŋde' quioquenba Diojsis?

¹⁰ ¿Ja'nsʌ'ŋde' tʌcotoyata'm ja'yʌyu te'šej? Jʌ'ʌ, tʌcotoyata'mde' ja'yʌyu, wa'y iwʌ's tyajcu'mba nas, jyo'cpa wa'y quioyojyaju tiyʌ'iwʌpit. Y iwʌ copu'ŋopya te'šejtijque' jyo'que'tpa.

¹¹ Juca tʌs nipcojtu mista'm ndzoco'yojmo oyepʌ tiyʌ mijcotoyata'm, ¿ja'n jeque pyʌqui wa'ytyʌs minu mbʌjcʌchoŋjayu yajtya' uša'ŋ mista'm ŋgoyojsaŋ?

¹² Juca eyata'mbʌ's muspa pyʌjcʌchoŋyaju yʌ'šejta'mbʌ tiyʌ mijpitta'm, ¿ja'nsʌ'ŋde' más oye wa'ytyʌs tʌs mbʌjcʌchoŋu tiyʌ'iwʌ? Pero janwya'cjaytyamʌtʌsmij yajtiyʌ, sino que mumu tʌs mbʌ'mgopajcʌpya uytyʌs nyajwindujcu'ŋmʌjcʌ te' Cristo's 'yevangelio.

¹³ ¿Ja'nja mustame que te' yojšajpapʌ templo'ojmo, templo-cu'tcupyit pyʌ'nʌyajpa wyin? ¿Y iwʌ yojšajpa alta'raŋi te' altarcʌsi yajca'yajpapʌ tzi'oquiupyit pyʌjcʌchoŋyajpa quiowindzʌmyajpaše'ŋ?

¹⁴ Te'šejtij aŋgui'mgue'tu tʌ Ngomi's wa'y jyamacʌtʌquiaju te' evangeliopit iwʌ'sta'mis chamgopuŋyajpa te' evangelio.

¹⁵ Pero ʌs janwya'cjaytya'ndʌ'ma'ʌsmij yajtiyʌ, jujcha' muspa'ʌs inʌc, ni ja'nʌs nʌ nja'yʌyu yʌ'šej wa'misʌj ndzi'tamu. Más oye wa'yʌj ŋga'u y ja'nʌj wa'y yajwinduquiaju wa'yʌs mʌja'ŋgomʌ'yu nwin yʌ'wʌpit.

¹⁶ Ndzamgopuŋba'ʌs, jeque, te' evangelio porque te'šejte' pyʌcpa wa'yʌs ndzʌjcu, pero ja'n te'wʌpit muspa'ʌs mʌja'ŋgotzamu nwin. Pero tocopya'ʌj juca ja'nʌs ndzamgopuwi te' evangelio.

¹⁷ Pero juca ne' su'noquiupyit ʌs ndzamgopuŋba, mbʌjcʌchoŋba'ʌs ŋgoyowa. Pero juca ja'nʌs ndzamgopuwi ne' su'noquiupyit, cotjayajwa'mʌjte' y pyʌcpa wa'yʌs ndzamgopuŋu.

¹⁸ ¿Tiya'sʌ'ŋde' jeque ʌs ŋgoyowa juca ja'nde' wa'yʌs coyowataca ndzamgopuŋu te' Cristo's 'yevangelio? Y te'šej ja'ʌsmij nwa'cjaytyame yajtiyʌ te' evangeliopit, ñempe'ʌs inʌc muspa nwa'cu.

¹⁹ Pero librepʌ pʌ'nʌjyʌ' mumu pʌ'nis wyi'naŋdʌjqui. Pero coyosaše'ʌs ndzʌjcu nwin mumu pʌngotoya, wa'yʌs sone pʌn nyajwʌ'aŋja'moyaju.

²⁰ Te' judio'sta'm wyi'naŋdʌjqui wijtu'ʌj jujcha' judío, wa'yʌs nyajwʌ'aŋjamyaju judiota'm. Y ñempe ʌj ja'nʌj nʌ ijtu aŋgui'mguquiʌ'mʌ, wijtu'ʌj jujcha' aŋgui'mguquiʌ'mʌta'mbʌ te' aŋgui'mguquiʌ'mʌta'mbʌ's wyi'naŋdʌjqui, wa'ytyi'ʌs nyajwʌ'aŋjamyaju aŋgui'mguquiʌ'mʌta'mbʌ.

²¹ Y jujcha'nde' jamyatoŋdʌ'ʌpʌ'smaj te' aŋgui'mguy wijtu'ʌj pʌ'nista'm wyi'naŋdʌjqui, te' jamyatoŋdʌ'ʌpʌ'smaj aŋgui'mguy. (Ja'nde' porque ja'nʌs matowe te' Diojsis 'yaŋgui'mguy sino que Cristo's 'yaŋgui'mguquiʌ'mʌ'ʌj ijtu.) Yʌ'še'ʌj wijtu wa'ytyi'ʌs nyajwʌ'aŋjamyaju te' jamyatoŋdʌ'ʌpʌ'smaj aŋgui'mguy.

²² Y wijtu'ʌj jujcha' mochipʌ te' mochita'mbʌ's wyi'naŋdʌjqui, wa'ytyi'ʌs nyajwʌ'aŋjamyaju mochita'mbʌ. Wijtyajpašej tumduma'ŋbʌn, te'še'ʌj witque'tu ʌj, wa'yʌs ndzʌcme'tzu jutz ʌs wa'y nyajcotzoquiaju iwʌjutiwʌta'm.

²³ Y yʌ'še'ʌs ndzʌcpa evangeliocotoya wa'yʌs mbʌjcʌchoŋu eyata'mbʌji'ŋ te' ŋgowindzʌmbaše'ŋʌs evangeliopit.

²⁴ ¿Jana mustame que te' poquiʌsquipscu'yojmo, myuma'ŋgʌ'y poyeyajpa, pero tuma'ŋbʌ'nis pyoquiʌspa'tpa tiyʌte' maŋba chi'yaju? Te'šej poyetamʌ wa'mis mbʌjcʌchoŋdamu.

²⁵ Y wiyuŋšej iwʌ's chʌcme'tzpa wa'y pyoquiʌspa'tu, 'yaŋgui'mba wyin mumutiyʌcʌsi. Yʌ'šej chʌquiajpa te'ta'mbʌ's wa'y pyʌjcʌchoŋyaju yajpapʌ corona, pero tʌta'm wa'ytyʌ mbʌjcʌchoŋdamu ja'n yayepʌ corona.

²⁶ Te'cotoya ʌj te'še'ʌj poyepa, y ja'n jujcha' ja'ndʌ musipʌ tiyʌ'ojmo. Quijpa'ʌj, pero ja'n jujcha' sawa pyu'ŋjo'cpapʌ's, porque muspa'ʌs tiyʌcotoya'ʌj poyepa.

²⁷ Y nyajnu'ŋʌpya'ʌs ŋgüerpo toya'ojmo y njʌ'ctzʌ'pya'ʌs nwin, uytya'mʌj tiyʌ'iwʌcotoya ne'cʌ yajʌcʌ'yaju ñempe ndzamgopuŋjayajwa'mʌs eyata'mbʌ pʌn.