1 Corintios 4 - Zoque Copainalá New Testament

Te' cʌ'we'ista'm yoscuy

¹ Oye wa'y myujšaju pʌ'nista'm que Cristo'stʌjyʌ' quioyosata'm, y que ŋgoquenjapyatʌs te' wiyuŋšejpʌ tiyʌta'm te' jayajqueyapʌ Diojsis winata'mbʌ tiempo'ojmo.

² Pero pyʌcpa jujche'ŋ coque'noye's wa'y chi'nda'nu chocoy.

³ Ʌs ja'ʌs mbʌcjay maya'cuy wa'misʌj ŋgʌme'tztamu mista'm, o wa'yʌj cʌme'tzu pʌ'nista'm, ni ja'ʌs ŋgʌme'tze nwin.

⁴ Ñempe ʌs ndzoco'yis ja'nʌj ni'aŋba'te, ja'nʌs te'wʌcotoya nwʌcomʌ'i nwin. Te' cʌme'tzpapʌ'sʌj tʌ te' Ngomi's.

⁵ Te'šej jeque uy cʌme'tztame windij yajtiyʌ. Uy cʌme'tztame hasta que minba tʌ Ngomi. Te'wʌ's maŋba cha'maŋwajpʌ'u pi'tza'ŋajcu'yojmo cʌwʌ'ñajupʌ tiyʌ, y maŋba yajqueju mumu tzoco'yis quipsaŋgospo'ʌyušej. Pijche'ca maŋba wyʌcotzamu Diojsis tumduma'ŋbʌn myerecetzʌcpaše'ŋ.

⁶ Ndzamjaytyamba'ʌsmij mumu yʌ'šejta'mbʌ tiyʌ porque sundamba'ʌsmij atzita'm. Muspamis ŋguengʌspʌctamu ʌjcʌsi y Apoloscʌsi. Te'šej wa'mis aŋmaytyamu tʌjcʌsi wa'mij nwyittamu solo te' ja'yʌyupʌ tiyo'mo, y eyapʌ pʌnbit umis mʌja'ŋgomʌ'ytyamu nwin wa'mij ñʌmdamu: Yʌ'wʌ oye y te'wʌ ja'n 'yoye.

⁷ Porque ¿iwa' nʌmba que masmij myʌja'ŋ mij? y ¿tiya' nʌ'ijtu jañchi'yapʌmij? Y juca ñchi'yajumij tiyʌ'iwʌ, ¿tiyajca'nde' mʌja'ŋgomʌ'pya nwin juca nʌtijmijte' ñchi'yaju?

⁸ Ngomʌ'ytyambamis que ñdyastamwa'mij y que rico'ajtamwa'mij. 'Yaŋgui'mdambamij jujcha' rey, pero ja'n tʌji'ŋ. Y oye inʌc juca 'yaŋgui'mdambamij wa'ytyʌ ndumʌ'aŋgui'mu tʌj miji'ŋda'm.

⁹ Cʌ'wejtʌjyʌ'. Y ŋguipspa'ʌs que Diojsistʌj cojtu jujcha' ucaŋgʌ'mʌcta'mbʌ, y jujcha' ñi'aŋba'tyajpapʌ wa'y yajca'yatʌju. Nguipspa'ʌs yʌ'šej porque quengʌpʌquiajpatʌj te' ja'n wyʌ'aŋja'moyapyʌ's, y angelejsista'm y te' pʌ'nista'm.

¹⁰ Quiomʌ'yajpa juca jowipʌtʌjyʌ' porque sunbatʌs Cristo, y mijta'm mujsoyešej, tʌj jujcha' mochipʌ y mijta'm jujcha' pʌmi'ʌyajupʌ. Mijta'm nwyʌcotzamʌtʌjtambamij y tʌj je'ŋjayajpatʌj.

¹¹ Hasta como yʌtij yu'jo'pyatʌj, yoctʌtzpatʌj, ja'ndiyʌ tʌs mbama, y pu'ŋjetjetwʌyajpatʌj y ja'ndiyʌ ni tʌs ndʌc.

¹² Ngʌ'pittʌj yospa ne'cʌ. Yatzicotzamyajpatʌj y tʌs oyecotzamyajpatʌs. Yacsnutzʌquiajpatʌj y mbʌ'mgopajcʌpyatʌs.

¹³ Yatzicotzamyajpatʌj y tʌs ndzamsujcʌyajpatʌs wa'y ñʌctʌ'yaju. Hasta como yʌtij najsacopajcʌsipʌ putzišejtʌj comʌ'yajpa y tyʌŋbʌ'yajupʌ tiyʌšej.

¹⁴ Ja'ʌsmij njayjaytyamu yʌ'šej wa'yʌsmij nyajtza'ajtamu, sino que suñajpapʌ uneše'ʌsmij ndzamnʌctʌ'ytyamba.

¹⁵ Porque ñempe itʌ majca'y mil 'yaŋmaytyambapʌ'smij Cristo'sñe', ja'n maŋu ijtu sone mista'm ndataj. Y Cristo Jesuspi'tʌjyʌ' mista'm ndatajšej, porque ndzamgopuŋjaytyamu'ʌsmij te' evangelio.

¹⁶ Te'cotoya nwa'cjaytyamba'ʌsmij wa'mis ndzʌctamu ndzʌcpaše'ʌs.

¹⁷ Te'wʌcotoya'ʌsmij ŋgʌ'wejaytyamu Timoteo, te' ʌs sunbapʌ jujcha' ʌsne' une, y tzi'nda'nupʌ's wyʌ'aŋjamguy tʌ Ngomicʌsi. Yʌ'wʌ's maŋbamij nyajamwʌtzʌctamu jutzʌj tu'ŋajpa Cristoji'ŋ, y jutzʌj aŋma'yopya mumujutʌ y mumu tu'mʌquiu'yojmo.

¹⁸ Pero ijtyaju nʌ tye'ngui'myajupʌ mi'ojmota'm. Quiomʌ'yajpa juca yajujche'cʌj ja'n maŋu minu mi'aŋʌta'm.

¹⁹ Pero prontotij maŋba'ʌj mi'aŋʌta'm juca tʌ Ngomi's šunba. Te'yʌs maŋba mujsu ja'nde' te' chame sino que juca ijtu pyʌmi te' nʌ tye'ngui'myajupʌ's.

²⁰ Porque jowita'mbʌ tzamepit ja'n 'yaŋgui'mi Dios, sino que pyʌmipit.

²¹ ¿Tiya' sundamba? ¿Sundamba wa'yʌj minu mi'aŋʌta'm nacsoquiuyji'ŋ, o su'noquiuyji'ŋ y yo'capʌ tzocopyit?