1 Corintios 2 - Zoque Copainalá New Testament

Chamgopuŋba inʌc Pablo's te' Cristo yajca'yajupʌ cruzcʌsi

¹ Te'cotoya, atzita'm, minu'cʌj mi'aŋʌta'm wa'yʌsmij ndzamgopuŋjaytyamu te' Diojsis chamupʌ tiyʌ, jañchamgopuŋjaytyamʌ'ʌsmij na' mʌja'ŋda'mbʌ tzamepit ni pʌ'nista'm myujsoquiupyit.

² Porque nʌmu'ʌj ndzoco'yojmo: Ja'ʌs maŋu ndzamu eyapʌ tiyʌ mi'ojmota'm sino que te' Jesucristo mya'myajupʌ cruzcʌsi.

³ Mocha'cu'yojmo y na'tzina'tzi y sʌtʌjtu'cʌj tiju ijtu mi'ojmota'm.

⁴ Te' ndzamuše'ʌs te' evangelio y ndzamgopuŋuše'ʌs, ja'nde' pʌ'nis jʌ'cpʌjcoyajpapʌ chamepit, ni pʌ'nis myujsoquiupyit, sino que nyajquendamu'ʌsmij te' Espiritu's chʌqui y te' Diojsis pyʌmi.

⁵ Uy cho'tzu mista'm nwʌ'aŋjamʌtʌjcuy pʌ'nista'm myujsoquiupyit, sino que Diojsis myʌja'ŋbʌmipit.

Diojsis 'Yespiritu'stʌ yajquendamupʌ tiyʌ

⁶ Pero ndzambatʌs mujsoquiuy te' cota'ñajupo'ma'a, pero ja'n yʌ' najsacopajcʌsita'mbʌ's myujsoquiuy ni ja'n yʌ' najsacopajcʌsita'mbʌ's quiowi'na'sñe', porque te'ta'mbʌ maŋba yajyaju.

⁷ Pero ndzambatʌs mujsoquiuy Diojsisñe', te' jayajqueyapʌ Diojsis winata'mbʌ aŋsʌ'ŋojmo. Y yʌ' mujsoquiuy cʌwʌ'nupʌyʌ' inʌc, y jyojmejcu Diojsis tʌs mʌja'ŋajcuquiotoya maŋba'cmaj cho'tzu te' aŋsʌŋda'm.

⁸ Nijutipʌ najsacopac aŋgui'moye's jañʌctʌ'ya. Juca inʌc ñʌctʌ'yaju, jamya'mya inʌc te' cruzcʌsi tʌ mʌja'ŋbʌ Comi.

⁹ Pero yʌ'šej ja'yʌyu: Jaquieñatij pʌ'nista'm te' wyitʌmbit ni jamyatoŋya quiowipit, Ni jaquipša choco'yojmo jujche'ŋda'mbʌ tiyʌ ñimejcʌyjayaju Diojsis iwʌ's šunba ñe'cʌ.

¹⁰ Pero Diojsis yajquenutʌj tʌj jeque yʌ'šejta'mbʌ tiyʌ ñe' 'Yespiritu Santopit. Porque mumu ñʌctʌ'pya te' Espiritu's, ñempe tʌ ja'n nʌctʌ'ipʌ tiyʌ Diojsisñe'.

¹¹ ¿Iwʌpʌ pʌ'nisa myusjapya tyʌwʌ's quipsoquiuy sino que ñe' 'yespiritu's ñʌc'ijtʌyupʌ's? Te'šejtijque' ya'iwʌ's ja'n myusjay Diojsis quipsoquiuy sino que te' Diojsis 'Yespiritu's.

¹² Pero tʌs jambyʌjcʌchoŋjatʌs pʌ'nista'm myujsoquiuy, sino que mbʌjcʌchoŋutʌs te' Espíritu Santo, te' tzi'upʌtʌj Diojsis wa'ytyʌ mustamu tiyʌtʌ tzi'u ñe'cʌ's.

¹³ Te'wʌ jequetʌste' ndzamba. Pero ja'ndʌs ndzame mujsoyajpapʌ pʌ'nista'm aŋmayušej, sino que ndzambatʌs aŋmayušejtʌj te' Espíritu Santo's. Y nyajnʌctʌ'yajpatʌs Espíritu Santo'ʌyajupʌ pʌn tiyʌta'm Espiritu'sñe'.

¹⁴ Y te' pʌn ja'ndiyʌpo'mo Espíritu Santo ja'n ñʌctʌ'i tiyʌta'm chamjapya Diojsis 'Yespiritu's, porque co'sawa'cuytye' ñe'cʌcotoya. Y ja'n musi ñʌctʌ'yu, porque pyʌcpa wa'y tyacscʌme'tzpʌ'u Espíritu Santopit.

¹⁵ Pero te' Espíritu Santo'ʌyupʌ pʌ'nis quiʌme'tzpa mumutiyʌ, y ñe'cʌ ya'iwʌ's ja'n quiʌme'tze.

¹⁶ ¿Iwʌ'sasʌ'ŋ myusjayu tʌ Ngomi's quipsoquiuy wa'y te'wʌ's 'yaŋmayu ñe'cʌ? Pero tʌta'm nʌ'itjaytyamwa'ndʌ Cristo's quipsoquiuy.