Thupiakkikna 34 - Zo Bible

Moses Si-in Moab Gamah Kivui

¹ Tua ciengin Moab zangleite panin Jericho tawh kigalsai Nebo Muol, Pisgah dawnah Moses a peito hi. Topa in gam zosie, Gilead panin Dan cieng dong,

² Naphtali gam zosie, Ephraim gam le Manasseh gam, Judah gam zosie Nitumna lam Tuipi dong,

³ Negeb le lutu kung khuopi kuom a kici Jericho panin Zoar cieng dong ama lah hi.

⁴ Topa in ama kungah, “Tam gam, keima in Abraham, Isaac le Jacob tungah kiciemin, ‘Na suon na hlahte tungah kang pie ding hi,’ ka ci leitang ahi hi; keima in na mit tawh kang musah zo ta a, hizongle khum munah na galkai sih ding hi,” a ci hi.

⁵ Tua ciengin Topa’ thupieh bangin Moab gam sungah Topa’ nasem Moses a si hi.

⁶ Beth-peor tawh kigalsai Moab gam kuom khatah ama kivui a, hinanle koima in tuni dongin a kivuina mun thei lo hi.

⁷ Moses a si-in kum za le kum sawmni pha hi; a mit miel nai loin a tha zong kie nai lo hi.

⁸ Ni sawmthum sung Israel-te in Moab zanglei-ah Moses a kaa uhi; tua ciengin Moses zieha kaana le mauna teng a veng hi.

⁹ Moses in ama tungah a khut ngam zo ahi ziehin Nun’ tapa Joshua lungsim pilna tawh kidim hi; tuale Israel-te in ama’ thu a mang vua, Topa’ thupiehsa bangin a gamta uhi.

¹⁰ Israel mite sungah Moses banga Topa in kimaituo-a a thei kamsang dang koima om lo hi.

¹¹ Egypt gam sungah Topa in Pharaoh le a nasem zosie le a gam buppi tungah lim le na lamdangte bawl dinga a sawl ama a dem zo koima a om sih a,

¹² Moses in a thahat a nasepnate zosie le a zauhuoi a vanglietna a lahnate zosie, Israel mi zosie’ muna-a a bawl ahi hi.