Thupiakkikna 26 - Zo Bible

Anpalte le Sawm-ah- khat

¹ Topa na Pasien un na luo ding vua ang pieh ding leitangah pei-in tua leitang luo-in khum munah na ten ciengun,

² Topa na Pasien un ang pieh ding leitanga pieng ga zosie panin a ga masa pawlkhat la-in law khat sungah na koi ding vua, Topa na Pasien un ama’ min om nadinga a teelna munah na pei ding uhi.

³ Tua huna na sem siempu pa kungah pei-in ama kungah, “Topa in ei pieh dinga ka pu ka pate uh tunga a ciemsa leitangah kang tung ta uhi, ci-in tuni-in Topa na Pasien kungah kang ko uhi,” na ci ding uhi.

⁴ Siempu pa in na khut sung panun law la-in Topa na Pasien uh’ maitam mai-ah tua law a koi ciengin,

⁵ Topa na Pasien uh’ mai-ah, “Ka pu uh pen mi vahvai Aram-te ahi hi; ama Egypt-ah a peisuh a, tua muna a pem lai-in mi tawmno khat ahi bo hi. Tua munah a vanglien, a thahat, le minam tampi ang hi ta hi.

⁶ Egypt-te in ei bawlsia-in na hamsa pipi ei semsahin ei gimsah vua,

⁷ tuaci’n kote zong ka pu ka pate uh’ Pasien Topa tungah ka kiko vua, Topa in ka aw uh ei za-in ama in ka thuohna uh, ka gimna uh, le ka gentheinate uh ei mu hi.

⁸ Topa in a thahat a khut, a kizah a banhat, a zauhuoi a vanglietna, lim le na lamdangte lahna tawh Egypt panin ei na peipi hi.

⁹ Ama in tami munah ei na tunpi-in, bawngnawi le khuoizu luonna tami leitang ei pie hi.

¹⁰ Tuaci’n Topa aw, nang in ko nei pieh leitanga a pieng gamasa pen tu-in kang peipi uhi,” na ci ding uhi. Topa na Pasien uh’ mai-ah tuate na koi ding vua, Topa na Pasien uh’ mai-ah na kun ding uhi.

¹¹ Tua ciengin Topa na Pasien un noma le na innkuonpite tunga ang pieh na hoi zosie ziehin, noma le Levi-te le note lahah a teng pemtate tawh na lungdamton ding uhi.

¹² Sawm-ah-khat pieh kum ahi a kum thumna kumin na hlawsa uh panin sawm-ah-khat zosie na pieh zaw ciengun, (tua khu sawm-ah-khat pieh kum ahi hi) amate in na khuopite sung vuah an ne-in a gilva thei nadingun Levi-te, pemtate, tagate, le meigong numeite tunga na pieh uh na hlawsa uh sawm-ah-khat na pieh zaw ciengun,

¹³ Topa na Pasien uh mai-ah tam bangin na gen ding uhi: “Ka inn sung panin a siengtho tanh teng ka tuomkoi zo a, kei nei sawlna bangin na thupiehna zosie dung zui-in Levi-te, pemtate, tagate, le meigong numeite tungah ka pie zo hi; keima in na thupiehnate palsat loin ka mangngil sih hi:

¹⁴ Ka da ka kaa sungin zong sawm-ah-khat ka ne sih hi; ka bua sungin zong tuate la loin misite tungah tuate ka pie sih hi. Topa ka Pasien’ thu ka mang zo a, kei nei thupieh bang lienin ka sem zo hi.

¹⁵ A siengtho nangma tenna vantung panin ei ensuh inlen, ka pu ka pate uh tungah bawngnawi le khuoizu luonna gam na ciemsa bangin, na mi Israel-te nei piehsa leitang thupha ei pie in,” na ci ding uhi.

Hanthot Thukhupna

¹⁶ Tuni mama-in na tung vuah Topa na Pasien un na zui ding uh tami thukhamte le ngaina kipte ang pie hi; tuaci’n na lungsim zosie ule na hinna zosie utawh tuate limtahin na zui ding uhi.

¹⁷ Tuni-in na Pasien uh ahi dingin Topa’ thukimna na nga zo ta uhi: tuale a lampite zui a, a thukhamte, a thupiehte, le a ngaina kipte kemcingin ama’ thu na man ding uh ahi hi.

¹⁸ Tuni-in Topa in na tung vua ang ciemsa bangin ama in ama’ nei ding mi le ama’ thukhamte a zui dingin na thukimna uh a nga zo ta hi;

¹⁹ ama in a bawlsa minam zosiete tungah a kiphatzaw, a minthangzaw, le a kipatawizaw-in ang koi ding hi; tuale ama’ ang ciemsa bangin Topa na Pasien uh adingin a siengtho mi na suoh ding uhi.