Piancilna 25 - Zo Bible

Abraham in Keturah Kinunpi

¹ Abraham in zi dang khat la a, a min Keturah ahi hi.

² Tua nu in ama tawh Zimran, Jokshan, Medan, Midian, Ishbak, le Shuah nei hi

³ Jokshan pen Sheba le Dedan’ pa ahi hi. Dedan tate pen Asshurim, Lethusim, le Leummim ahi hi.

⁴ Midian’ tate pen Ephah, Epher, Hanoch, Abida, le Eldaah ahi hi. Tam teng zosie, Keturah’ suonlehlahte ahi hi.

⁵ Abraham in a neisa zosie Isaac tungah a pie hi.

⁶ Ahi vangin a zi dang tawh a nei a tate zong ama dam sungin letsongte pie a, a tapa Isaac kung panin nisuona lam manaw-in nisuona gamah amate a sawlmang hi.

Abraham’ Sina

⁷ Tam pen Abraham khankum ahi a, kum za le kum sawmsagi le nga ahi hi.

⁸ Abraham in a nukhia pen a hu sang a, a vuoi, kum tampi a pha, a khanghamin si a, a mite tawh kigawm hi.

⁹ A tapa Isaac le Ishmael in Mamre nisuona lam Hit mi Zohar’ tapa Ephron’ logam Machpelah leihawm sungah ama a vui vua,

¹⁰ tua mun pen Abraham in Hit-te kung pana a lei ahi hi.

¹¹ Abraham si nua-in Pasien in a tapa Isaac thupha a pie hi. Tuale Beer-lahai-roi ah Isaac a teng hi.

Ishmael’ Suonlehlahte

¹² Tam teng pen Abraham in Sarah’ sila numei, Egypt mi Hagar tawh a nei Abraham’ tapa Ishmael’ suonlehlahte ahi hi.

¹³ Tam teng pen a suona dungzui-in a kiminvaw Ishmael tate’ min ahi hi: A suoh masapen Nebaioth ahi hi; tuale Kedar, Adbeel, Mibsam,

¹⁴ Mishma, Dumah, Massa,

¹⁵ Hadad, Tema, Jetur, Naphish, le Kedemah ahi uhi.

¹⁶ Tam teng pen Ishmael’ tate ahi vua, a khuo, a giephuol, le a be utawh kizui-in ulien sawm le nite ahi uhi.

¹⁷ (Tam pen Ishmael’ khankum ahi a, kum za le kum sawmthum le sagi ahi hi; ama in a hu tawpna sangin si a, a mite tawh kigawm hi.)

¹⁸ Amate, Havilah panin Assyria lam zotna Egypt tawh kigalsai Shur khuo-ah a teng uhi; ama’ mite zosie gei-ah ama a teng hi.

Esau le Jacob Suona le a Khangno Hun

¹⁹ Tam teng pen Abraham tapa Isaac’ suonlehlahte ahi uhi: Abraham pen Isaac’ pa hi a,

²⁰ Isaac kum sawmli a phahin Paddan-aram gama Aram mi Bethuel’ tanu Laban’ sanggamnu Rebekah tawh kinung hi.

²¹ Isaac in a zi adingin Topa kungah thu ngen hi, azieh pen ama in ta nei lo hi; Topa in a thungetna dawngin a zi Rebekah a gai hi.

²² A sunga nausen gel kibuonbuon uhi. Tuale ama in, “Tam bang ahi mawh leh bang dinga nungta bep ka diei?” a ci hi. Tuaci’n Topa dong dingin ama a pei hi.

²³ Topa in ama kungah, “Na gil sungah minam ni om a, na sunga pieng mihing nite a kikhen ding hi; khat pen a khat sangin hatzaw ding a, a uzaw in a nauzaw’ na sem ding hi,” a ci hi.

²⁴ A suo hun a tun ciengin a gil sungah takop a om hi.

²⁵ A suoh masa pen a cisan sa-in suoh a, a pum tung zosie mul nei tawh kibang hi; tuaci’n amate in a min Esau phuo uhi.

²⁶ Tua ciengin a khutin Esau’ ketul tu kawmin a sanggampa a suoh hi; tuaci’n ama pen a min Jacob kiphuo hi. Ama in tuate a nei hunin Isaac kum sawmguh a pha hi.

²⁷ Naupangte a khangliet ciengun Esau pen gamsung mi sabeng siem khat hi a, Jacob pen mi kamtawm, puonbuh sunga teng mi ahi hi.

²⁸ Isaac in a samat a neh ziehin Esau a it hi; ahi vangin Rebekah in Jacob a it hi.

Esau in A Innluoza Zua

²⁹ Khatvei Jacob in ancim a huon laitahin Esau a gamvana pan a gilkielsa-in a tung hi.

³⁰ Esau in Jacob kungah, “Ka gil nah kiel seng ahi ziehin tua na ancim san halkhat ei nesah in!” a ci hi. (Tua ahi ziehin ama’ min Edom kici hi.)

³¹ Jacob in, “Na innluoza ei zua masa in,” a ci hi.

³² Esau in, “A si ding ka hi ta hi; innluoza banga ka man ding ahei?” a ci hi.

³³ Jacob in, “Amasa-in ka mai-ah hing kiciem in,” a ci hi. Tuaci’n a kungah ama kiciem a, Jacob kungah a innluoza a zua hi.

³⁴ Tua ciengin Jacob in Esau an le beme pie a, ama in ne-in dawn a, tuale dingin a lampi-ah a pei hi. Hi ci bangin Esau in a innluoza a simmaw bawl hi.