Phatna-late 96 - Zo Bible

Thukhen dinga ang Pei ding Pasien Phatna

¹ Leitung mi zosie aw, Topa tungah la tha khat sa un; Topa tungah phatna la sa un.

² Topa tungah lasa unlen, ama’ min phat un; ni khat zaw ni khat ama’ ei hutdamna thu gen un.

³ Minamte lahah ama’ minthanna tangko unlen, mi zosiete lahah a sil lamdang bawlte tangko un.

⁴ Azieh pen Topa lienin, nahpitah a phat ding ahi hi; ama pen pasien zosiete sanga zatah zawh ding ahi hi.

⁵ Bangzieh ahei cile mihingte’ pasien zosie milimte hi lel a, ahi vangin Topa in vantungte a bawl hi.

⁶ Ama mai-ah patawina le thupina a om hi; ama’ mun siengtho sungah thahatna le hoina a om hi.

⁷ Minamte’ innkuonte aw, Topa ahi ding bangin hisah unlen, Topa tungah a minthanna le a hatna bangin hisah un.

⁸ Topa tungah ama’ min zieha a nga dinga kilawm minthanna pie un; biehpiehnate tawi-in ama’ huong sungah hing lut un.

⁹ Puon siengtho tawh kizemin Topa bie un; leitung mi zosie aw, ama mai-ah citun un.

¹⁰ Minamte lahah, “Topa kumpi ahi hi! Leitung kiptahin kiphut zo hi; tua khu a kilawh ngai nawn sih ding hi. Ama in deidan nei loin mite thu khen ding hi,” ci-in gen un.

¹¹ Vantungte kipah uh hinlen, leitung lungdam heh; tuipi le a sunga om zosie awng vapo uheh;

¹² lo le a sunga om zosie nuomin kitom uheh. Tua ciengin gamlahah a po singkung zosie in

¹³ Topa mai-ah lungdamin la sa ding uhi; azieh pen leitung thukhen dingin ama ang pei ta hi. Ama in dihna tawh leitung thu khen ding a, ama in a thuman tawh mite thu a khen ding hi.