Phatna-late 9 - Zo Bible

Pasien’ Vanglietna le Thutanna

La makaipa kunga Muth-labben dung zui-a sah ding David’ laphuo.

¹ Ka lungsim zosie tawh Topa tungah lungdamna kang ko ding hi; a lamdang na nasepna zosie a unpi-in ka gen ding hi.

² Nangma sungah lungdamin ka kipah ding hi; Sangpen Pa aw, keima in na min phatna la ka sa ding hi.

³ Ka galte a nuakia ciengin, na mai-ah amate pua-in kisie uhi.

⁴ Bangzieh ahei cile nangma in ka thu a tangin na lenkip hi; topha tungah nang na to a, a manin thu na khen hi.

⁵ Minamte na phawhsie a, migilote na susie hi; kumtawnin a maimang dingin a min uh na phietmang hi.

⁶ Tawntung sietna sungah galte a mangthai uhi; a khuopite uh na phungkal hi; a kiphawna mama uh kisie hi.

⁷ Ahi vangin Topa khu kumpi-in a to zing a, ama in thukhenna dingin a topha phutdet zo hi.

⁸ Ama in thuman tawh leitung mite thu khen a, a kilawm a kituohin mite thu a khen hi.

⁹ A kibawlsie mite adingin Topa khu mun muonhuoi ahi a, hamsat hun ciengin kibuhna munkip ahi hi.

¹⁰ Topa aw, nang ang suite na nuasie lo ziehin, nangma’ min a theite in nang ang muong uhi.

¹¹ Zion-a teng Topa phatna la sa un. Mite lahah ama’ nasepnate pulah un.

¹² Azieh pen sisan phula pa in amate a phawh kha hi; ama in gimna a thuoh mite’ kikona a mangngil sih hi.

¹³ Topa aw, keima ei hepi inlen, kei ei muda mite tung pana ka thuoh gimna ei mu in; nangma khu sina tunkot pana keima ei domto pa na hi a,

¹⁴ tuaci’n keima in Zion tanu’ kotpite-ah ang kiphatna la kisa zosie phawhkia-in, nangma’ hotkhietna sungah ka lung a dam ding hi.

¹⁵ Amau’ bawl dum sungah minamte a kiesuh vua, a lenthang siena vuah amau’ keng ma a awh hi.

¹⁶ Topa amama ang kipulah a, ama in thu a khen hi; amau’ khut tawh a sepna sung vuah migilote a awh uhi. [Higgaion. Selah]

¹⁷ Misikhuo-ah Pasien a mangngil minam zosie le migilote a pei ding uhi.

¹⁸ Bangzieh ahei cile tasamte kimangngil zing lo ding a, mizawngte’ kinepna zong a kisie zing sih ding hi.

¹⁹ Hing thoto in, Topa aw! Mihingte kizosah sin; nangma mai-ah minamte thu kikhen taheh.

²⁰ Topa aw, amate zausah inlen, mihing maimai a hina uh minamte theisah in. Selah