Phatna-late 138 - Zo Bible

Lungdamkona le Phatna

David’ laphuo.

¹ Topa aw, ka lungsim zosie tawh nangma tungah lungdam kang ko hi; keima in pasien-te mai-ah nangma phatna la-in ka sa hi;

² na biehinn siengtho lam nga-in ka kun a, tuale nangma’ itna kip le na muonhuoina ziehin, na min kang phat hi; azieh pen nang in sil bangkim na min le na thu na tawisang zo hi.

³ Kang hlat ni-in nei dawng a, ka hlagau thahatna na khangsah hi.

⁴ Topa aw, leitung kumpi zosie in nangma ang phat ding uhi, azieh pen amate in na kam tawh na thugente a za zo uhi.

⁵ Topa’ minthanna lien mama ahi ziehin amate in Topa’ nasepna ziete la-in a sa ding uhi.

⁶ Azieh pen Topa a sangpi hinanle, ama in tuolngiem mite don a, gamlapi panin a kiphasah mite a mu veve hi.

⁷ Hahsatna kawmkalah ka pei vangin ka galte’ lungthahna panin nei kem hi; Nangma in na khut na zah a, na zietlam khut in ei hunkhie hi.

⁸ Topa in kei dinga a tupna a tangtun ding hi; Topa aw, na itna kip tawntung hi. Na khuta na sepsate nuasie sin.