Phatna-late 127 - Zo Bible

Inn Sunga Pasien’ Thuphate

Solomon’ phuo Katona La.

¹ Topa in inn lam sih leh, a lamte’ gimna a mawhna ahi hi. Topa in khuopi cing sih leh, a cingte’ cinna a mawhna ahi hi.

² Zingmawng thobai-in zanlai-in na lup ha a, - nangma’ thalawsa an gim le tawl a na neh zong a mawhna ahi hi; azieh pen ama in a it mite tungah kimut hun a pie hi.

³ A tahtahin tate pen Topa tung pan gougil ahi a, gil sung pana pieng a ga zong khu ama’ ei pieh thaman ahi hi.

⁴ Mi khat in a khangdawn lai-a a nei tate pen galhang pa’ khut sunga om thaltangte tawh kibang hi.

⁵ A thallawng dima thaltang a nei mipa khu thupha nga ahi hi. Kulkotpi-ah a galte tawh a kiholim ciengin ama a kimaizumsah sih ding hi.