Phatna-late 116 - Zo Bible

Natna pana Damkiana Zieha Lungdamkona

¹ Topa ka it hi, azieh pen ama in ka aw le ka thumnate ei za zo hi.

² Kei lamah a bil ei ngat ziehin, ka hin laisie-in ama ka hlan ding hi.

³ Sina thangte in kei ei kimkot hi; Misikhuo natnate in kei ei tucip hi; keima in lungkham mangbahnate ka thuoh hi.

⁴ Tua ciengin keima in Topa’ min ka hlan a: “Topa aw, ka hinna ei hun in,” ci-in thu ka ngen hi.

⁵ Topa pen hepi siemin thuman hi; i Pasien in mi a khuotuo hi.

⁶ Topa in thu thei lote kem hi; ei kinetniem ciengin ama in keima ei hunkhie hi.

⁷ Ka hlagau aw, Topa in nangma tungah a kicingin hing bawl zo ahi ziehin na toidamna munah hing kilekia in.

⁸ Bangzieh ahei cile nangma in sina panin ka hlagau na hunkhie a, hlituite panin ka mit hunkhie-in, kipaina panin ka keng na hunkhie zo hi.

⁹ A hingte’ gam sung Topa mai-ah kei ka vah kawikawi hi.

¹⁰ “Keima in nahpi-in gimna ka thuoh hi,” ka ci hun nangawnin keima in ka upna ma ka tu lenlon hi.

¹¹ Ka cimaw ziehin, “Mi zosie zuou gen vive hi,” ka ci hi.

¹² Keima tunga ama’ hoina zosie ziehin Topa tungah bang tawh thuhkia ding ka hei?

¹³ Keima in hutdamna hai ka domsang ding a, Topa’ min ka hlan ding hi.

¹⁴ A mite zosie’ opna mai-ah Topa tungah ka thuciemna, ka pie ding hi.

¹⁵ Topa muna-ah ama’ thuman mite sina pen manpha mama hi.

¹⁶ Topa aw, keima na nasempa ka hi hi; nangma’ nasem ka hi a, na nasem nu’ ta ka hi hi. Nangma in kei ei kikhinate nei sutpieh zo ta hi.

¹⁷ Keima in nangma tungah lungdamko biehpiehna lui-in, Topa’ min ka hlan ding hi.

^18-19 Jerusalem aw, ama’ mite zosie mai, Topa’ inn huong sung, nangma’ laizangah Topa tunga ka kiciemnate ka pie ding hi. Topa phat un!