Nehemiah 1 - Zo Bible

A Mite Adingin Nehemiah in Thungen

¹ Hacaliah’ tapa Nehemiah’ thugen tam bang ahi hi. A kum sawmnina Chislev hla sungin kumpi khuopi Susa-a ka op lai tahin,

² Judah pana pasal pawlkhat tawh ka sanggamte khat ahi Hananiah ang tung a, tuale keima in amate kungah sala kiman lo a hinglai Judah mite thu le Jerusalem thu ka dong hi.

³ Amate in, “Sala kiman lo tua gam sunga a omsuohte in gentheina lienpi le maizumna a thuoh uhi; Jerusalem kulpi kicim gawp a, a tunkotte zong mei in katum zo hi, “ci-in ang gen uhi.

⁴ Tua thu ka zah ciengin tosuhin ka kap a, ni tampi sung kap le mau-in vantung Pasien kungah antangin thu ka ngen hi.

⁵ Keima in, “Aw Topa, Vantung Pasien, nang ang it a, na thupiehnate a zui mite tungah thuciemna limtaha a zui, a lien le a giinhuoi Pasien aw;

⁶ sun le zanin na nasem Israel mite adinga kang thungetna a ngai dingin na bil ei ngat inlen, na mit hing hahsah in. Keima le ka innkuonpite-a kipan ko Israel mite in na tunga kang bawlsa uh mawnate kang pulah hi.

⁷ Nangma tungah nahpitahin kang khiel kha ta vua, na nasempa Moses tunga na thupiehnate, thukhamte, le ngaina kipte ka zui ta sih uhi

⁸ Na nasempa Moses tungah, ‘Nohaw na muonhuoi sih uleh mite lahah kang thezah ding hi;

⁹ hizongle ka kunga nang kilekia vua, ka thupiehnate na zui uleh, a gamla pen leimong dongah nawdawhin om nan locin, keima in khum panin kang kaikhawmkia ding a, ka min om nadinga ka teelsa munah note kang zawpi ding hi,’ ci-a na thugen hing phawhkia bo in.

¹⁰ Amate pen nangma’ vanglietna le a thahat nangma’ khut tawh na tatkhietsa nangma’ nasemte le nangma’ mite ahi uhi.

¹¹ Topa aw, na nasempa’ ang thumna le na min a zatah nuom na nasemte’ thumna na bil hing daw in. Tuni-in na nasempa tungah guolzawna ei pie inlen, tam mipa muna-ah hepina ei pie bo in!” ci-in thu ka ngen hi. Khum hunin kei pen kumpipa’ hai tawipa ka hi hi.