Isaiah 7 - Zo Bible

Isaiah in Kumpi Ahaz Hlamuongsahkia

¹ Uzziah’ tapa Jotham, Jotham’ tapa Judah kumpipa Ahaz hun lai-in Jerusalem sim dingin Aram kumpipa Rezin le Remaliah’ tapa Pekah a kuonto vua, hinanle ama gel in a zo sih uhi.

² Ephraim-te tawh Aram-te kipawlton hi, ci thu David’ innkuonte in a zah ciengin, huipi in a sem gamlah singkungte bangin Ahaz le a mipite’ lungsim a kiling hi.

³ Tua ciengin Topa in Isaiah kungah, “Puonsawppa Lo lampi-a buol tungnung tuilahna monga a om Ahaz tawh kimu dingin na tapa Shear-jashub tawh pei unlen

⁴ ama kungah, “Kidawm in, sip dide inlen, zau vateh sin. A khu lemlem singkhuo tawng ni tawh a kibang lel Aram kumpipa Rezin le Remaliah’ tapa’ lungthahna ziehin kilunggimsah sin.

⁵ Bangzieh ahei cile Remaliah’ tapa tawh Aram pangtonin na tungah sietna a bawl sawm vua,

⁶ “Judah gam sim dingin va kuonto ta vai-in, tuale Jerusalem sumaimangin eimahaw dingin va zo thop ta vai; tua gam sungah kumpi dingin Tabeel’ tapa koi vai,” a ci uhi;

⁷ tua ahi tah ziehin Topa Pasien in tam bangin a gen hi: Tua thu kip lo ding a, zong tangtung lo ding hi.

⁸ Azieh pen Aram’ lutang khu Damascus ahi a, Damascus’ lutang khu Rezin ahi hi. (Kum sawmguh le kum nga sungin minam khat ahi thei nawn lo ding za-in Ephraim kivatmai ding hi.)

⁹ Ephraim’ lutang khu Samaria ahi a, Samaria’ lutang khu Remaliah’ tapa ahi hi. Upna sungah na dinkip sih leh na kip vawt sih ding hi.

Isaiah in Ahaz Immanuel’ Lim Pie

¹⁰ Topa in Ahaz hopikia a,

¹¹ Topa na Pasien’ lim khat ngen in; tua lim pen Misikhuo bangin thuh hinlen ahi sihle vantung bangin sang heh, a ci hi.

¹² Hinanle Ahaz in, “Ka ngen sih ding hi; Topa ka zelah sih ding hi,” a ci hi.

¹³ Tua ciengin Isaiah in, “David’ innkuonte aw, ngai un! Mi na gimsah uh pen no adingin thuneuno khatin na ngaisun vua, ka Pasien zong gimsah lai ding na hi uh amah?

¹⁴ Tua ahi ziehin Topa mama in note tungah lim khat ang pie ding hi. En un, ngahnu khat gai-in tapa khat nei ding a, a min Immanuel kici ding hi.

¹⁵ Ama in sil hoi lo nuolin sil hoi a teel thei hun ciengin bawngnawi thaukhal le khuoizu ne ding hi.

¹⁶ Azieh pen naupang in sil hoi lote nuolin sil hoite bangci teel ding ci thu a thei masangin na giin uh kumpi nite’ gam a kinuasie ta ding hi.

¹⁷ Judah panin Ephraim-te a peikhiet ni-a kipanin Topa in ni danga a pieng ngai nai lo tua bang nite, nangma, na mite, le na pupa’ innkuon tungah a tungsah ding hi- tua khu Assyria kumpipa tung pan hi ding hi.

¹⁸ Topa in tua ni ciengin Egypt tuinahte-a om thote le Assyria gam sunga om khuoite a saisip tumin a hlan ding hi.

¹⁹ Tuale amate zong a unpi-in hing pei-in kenkawm lah, suongpi kehte kikal lah, ling le khau lah cinteng le ganhing tatna muncin tengah a tu ding uhi.

²⁰ Khum ni ciengin Topa in Gungal pana kikawm mulmetna nam ahi- Assyria kumpipa tawh- lu le kengmulte heulieu-in tua ma tawh khamulte zong a heu ding hi.

²¹ Khum ni ciengin mi khat in bawnglaa khat le tuu ni bang beh suotahpi zo ding a,

²² tuate in nawitui kicing tahin a pieh zo ziehin ama in bawngnawi thaukhal a ne zo ding h; azieh pen tua gama a omlaite zosie in bawngnawi thaukhal le khuoizu a ne ciet ding uhi.

²³ Khum ni ciengin ngun shekel tulkhat a man lenggui tulkhat a op ngaina mun zosie ling lah khau lah a suoh ding hi.

²⁴ Gam zosie khaugui le lingbawhte tawh kidim ta ding ahi ziehin, mite thal le thaltang tawh gam a vah ding uhi;

²⁵ tuale nangma in ling le khaute na giin ziehin tupeh tawh a kihlo ngai muoltangte-ah na pei ngam sih ding hi; hizongle tuate bawng hlana le tuute’ gamtatna mun a suoh ta ding uhi.