Hebrews 11 - Zo Bible

Upna a Khietna

¹ Tu-in upna i ci in i lametnate-ah lungmuonna hi a, i mu nai lo thute theicien na ahi hi.

² A tahtahin upna ziehin i pu i pate in patahna a na nga uhi.

³ Eite in i mu thei nate pen i mu thei lo nate pana kibawl hi lo a, Pasien’ kammal tawh leitungte a kisiem ahi hi, ci thu upna tawh i theithei hi.

Ette ding Abel, Enoch, le Noah

⁴ Upna ziehin Abel in Pasien kungah Cain-a’ sangin a sanhuoi zaw biehpiehna a pie hi. Tam tungtawnin ama midih ahi hi, ci patatna nga a, Pasien mama in ama’ silpiehte a thukimpi hi; ama a si zo vangin ama’ upna tungtawnin thu ei gengen lai hi.

⁵ Enoch in sina a thuoh lo nadingin upna tawh ama kilato hi; tuale, “Pasien in ama lato zo ahi ziehin ama a kimu nawn sih hi. Ama a kilahto masangin, “Ama in Pasien lungkimsah zo hi, ci-in teci kipang hi.

⁶ Upna lo tawh Pasien kilungkimsah zo lo hi, azieh pen Pasien a nai poma in ama om tahpi hi, ci thu le ama a suite thaman pie hi, ci thu pen a up ding ahi hi.

⁷ Upna ziehin a kimu nai lo thupiengte tawh Noah in Pasien’ thuhilna na mang a, a innkuonpite a hotkhiet thei nadingin tembawpi khat na bawl hi; tuami tawh ama in leitung mawsah a, tuale upna dung zui-a kinga dihna’ gou luopa a suoh hi.

Abraham’ Upna

⁸ Upna tawh a gouluo nga nadinga a kiciemna mun pei dingin Abraham a kihlat lai-in, a pei nading mun nangawn thei lo napi, thumangin upna tawh a pei hi.

⁹ A kikamciemna gamah upna tawh bakhat sung teng a, ama tawh kibanga kamciem a luopi ding Isaac le Jacob-te tawh pemta bangin gamdang puonbuh sungah a teng hi.

¹⁰ Bangzieh ahei cile ama in a gelpa le a lampa Pasien ahi bulkip nei khuopi a lamen hi.

¹¹ Ama vuoi mama tale upna tawh nau nei theina thu nga hi, Sarah mama zong a ciing hi tama le upna tawh kamciem a pie pa muonhuoi sa ahi ziehin nau nei theina thu nga hi.

¹² Tua ahi ziehin a si tawh a kibang mi khat panin vana aasi za-a a tam, simzawh lo-a a tam tuipi pieu-a senel bangin suonlehlahte a pieng hi.

¹³ Tam mite zosie in a kikamciemsa gam nga lo-in, upna sungah a na si vua, hizongle a gamlapi panin amate galmu-in a na hopi uhi. Leitungah gamdang mi le peemta ahi lam uh a kithei uhi,

¹⁴ azieh pen tua banga thu gen mite in a ten nading uh gam khat sui ahi lam uh a kilangsah uhi.

¹⁵ A nuasiesa uh gam a ngaisun kia uh hi leh a kilekia nading uh hun lemtang nei zo tham ding uhi.

¹⁶ Hinanle amate in a hoizaw gam ahi tua vantung gam a na lunggul uhi. Tua ahi ziehin Pasien in amau’ Pasien a kici ding a na maizumpi vawt sih hi; a tahtahin ama in amate adingin khuopi khat bawl kholpieh zo hi.

¹⁷ Ze-etna a thuoh ciengin Abraham in upna tawh Isaac a pie hi. Kamciem a nga pa in a tapa neisun pie dingin kithawi a,

¹⁸ ama tung ma-ah, “Isaac tungtawnin nang adingin na suonlehlahte’ min kivaw ding hi,” ci-in kigen zo hi.

¹⁹ Pasien in misite lah pan nangawnin mi khatpo thokiasah thei hi, ci-in ama in ngaisun a, tekahna-in gen leih ama in Isaac a ngakia hi.

²⁰ Upna ziehin Isaac in mailam hun adingin Jacob le Esau tungah thupha pie hi.

²¹ Upna ziehin Jacob in a si kuonin Joseph’ tate tungah thupha pie a, a ciengkhut dawnah kunin a na bie hi.

²² Joseph in upna tawh a si kuonin Egypt gam panin Israel-te peikhiet ding thu na gen a, ama in ama’ kivui ding thu zong na vaihlah hi.

Moses’ Upna

²³ Upna ziehin a nu le a pate in Moses hla thum sung phuol uhi. Bangzieh ahei cile amate in tua nausen a mel hoi lam a mu vua, kumpipa’ thupiehna giing loin upna tawh hla thum sung a phuol uhi.

²⁴ Moses a gol ciengin Pharoah tanu’ tapa a kici ding nuom loin,

²⁵ mawna sungah bakhat sung nopsah ding sangin Pasien’ mite tawh bawlsietna thuohton ding a teelzaw hi.

²⁶ Ama in mailam huna ama’ thaman ding mituhin a nei ziehin ama in Egypt’ neilelam teng sangin Khris adingin simmaw zako a thuohna pen a thupi zaw-in ngaisun hi.

²⁷ Ama in upna hang tawh kumpipa’ lungthah ding giing loin, Egypt gam na nuasie hi; azieh pen mu thei lo pa a mu bang danin ama in a thuoh kenkon hi.

²⁸ Ta masa a susie pa in Israel-te’ tapa ta pen a suhkhah lo nadingin ama in upna tawh Peisan Pawi bawlin sisan a the hi.

Adang Israel Galhangte’ Upna

²⁹ Mite in upna tawh leigaw tunga lampei bangin San Tuipi a kantan uhi, ahi vangin Egypt-te in tua bang a bawl sawm ciengun tui in amate a taimang sieng hi.

³⁰ Amate in ni sagi sung upna tawh a kimvel zaw uh ciengin Jericho kulpi cimmang hi.

³¹ Numei pahtat nu Rahab in upna tawh thukante hoi tahin zin a na do ziehin, thumang lo mite tawh ama kisieton lo hi.

³² Tua ahile bang i genbe lai ding vuoi? Azieh pen Gideon, Barak, Samson, Zephthah, David, Samuel-te a kipanin kamsangte tungtang thu gen nading hun kicing lo hi.

³³ Upna tungtawnin amate in kumpi gamte na zo gawpin, thutang tawh gam a na uh vua, kamciemte nga-in humpinelkai’ kam na hucip uhi.

³⁴ Meikuongpi mit sahin, namsau’ ma panin na suohta vua, thanemna panin thakhauna nga kia-in, galdona-ah vang a na nei vua, gamdang galkapte a na delmang uhi.

³⁵ Nupite in thawkiana tawh a misite a ngakia uhi. Adangte in a hoizaw thawkiana a nga thei nadingun a kihla ding nuom loin bawlsietna a thuoh uhi.

³⁶ Adangte in ahile simmawna le satna a thuoh vua, siakhau tawh kikhi-in thongkiehna nangawn a thuoh uhi.

³⁷ Suong tawh amate kisepin, sing-at tawh kituntan a, namsau tawh kithat hi; amate in tuuvun po le keelvun po silin, bangma nei loin a na vahvai vua, bawlsietna le khelbawlna na thuoh uhi.

³⁸ Amate adingin leitung a kilawm nawn sih a, senel gam muoltung lah, leihawm lah le suonghawm sung lah po-ah a vah kawikawi uhi.

³⁹ Tam mite zosie in a upna ziehun phatna a na nga vangun a kikamciemsa thute a nga tuom sih uhi.

⁴⁰ Pasien in eite adingin a hoizaw na khat ei pie zo ahi ciengin eite lo tawh amate a bukim thei tuon sih uhi.