Galatia-te 5 - Zo Bible

¹ Azieh pen suotahna i nga nadingin Khris in eite ei suohtasah hi. Tua ahi ziehin suotahna sungah dingkipin saltanna hahkol kisuonkia nawn sih un.

TapidawSuotahna’ Pienzie

² Ngai un! Keima Paul in na kung vuah kang gen ding hi, tep na kitansah uleh Khris in note adingin kimanna a nei poma sih ding hi.

³ Tep a kitansah mi zosie tunga teci kang pan kiana-ah, tua mi pa in adang thukham vannuoi a zui lo a phamaw ahi hi.

⁴ Thukham zuina tawh dihtan a sawm note na hi ule Khris tawh kikhenin hepina panin a puamat na hi ta uhi.

⁵ Bangzieh ahei cile kote in upna tawh a kinga dihna pen Hlagau tungtawnin lametna tawh lawptahin ka nga uhi.

⁶ Azieh pen Khris sungah teptan mi hile, teptan lo mi hile bangma thupi lo hi; itna tungtawna nasep theina upna khat beh a thupi ahi hi.

⁷ Note na hi uleh taikidemna-ah hoitahin na tai uhi; note in thuman thutah na zui lo nadingun koi in ang kham ahei?

⁸ Tam bang kizawlna pen note ang hlanpa kung pan hi lo hi.

⁹ Tol themno khat in annel lom buppi a zel sieng hi.

¹⁰ Note in lungsim tuom nei sih va uteh, ci-in Topa sungah kang muong uhi. Ahi vangin koikoi hinanle note ang subuoi poma in dan a thuoh ding uhi.

¹¹ Hizongnanle sanggamte aw, teptanna thu a gen lai hi leng bang dinga ei kibawlsie lailai ding ahei? Tua banga hil hi leng singlamte zieha mawsahna a kihemkhie zo ahi ta hi.

¹² Note ang buoisah mite ama le ama kiget vet uleh ka nuom hi!

¹³ Bangzieh ahei cile sanggamte aw, no na hi ule a suohta dinga ang kihlante na hi vua, na suotahna uh noma’ dei banga gamtatna dingin zang loin, itna tungtawnin khatlekhat’ sila na suohzaw un.

¹⁴ Bangzieh ahei cile thupieh khat beh ahi, “Nangma na ki-it bangin na vengte na it ding hi,” a ci in thukham buppi a huomsieng ahi ta hi.

¹⁵ Ahi vangin note khatlekhat kipet kibalin na op ule zong khatlekhat na kisietsuo khah lo nadingun kidawm bo un.

Cilesa’ Nasepte

¹⁶ Hlagau tawh na nungta unlen cilesa lunggulnate na tangtungsah sih un, kang ci hi.

¹⁷ Bangzieh ahei cile cilesa lunggulnate in Hlagau deina tawh kiledo a, Hlagau deinate in zong cilesa lunggulna tawh kiledo hi; azieh pen tahsa deina pen Hlagau’ deina tawh a ki-elngat a, Hlagau’ deina zong khu tahsa’ deina tawh a ki-elngat hi; bangzieh ahei cile tam tegel pen khatlekhat a kiledo uh ahi hi.

¹⁸ Hinanle Hlagau in ang makai uleh thukham nei-ah na om sih uhi.

¹⁹ Tu-in cilesa nasepnate kician mama a, tuate in: numei-pasal pahtatna, siengtho lona, thangtatna,

²⁰ milim biehna, mibumna, mudana, kimat lona, thangsietna, lungthahna, kihauna, kilungtawh lona, kipawl khenna;

²¹ deigawna, zukhamna, a kalval guolnop pawi bawlnate le tua bang nam zosie ahi hi; nidanga kang genkholsa bangin kang genkhol ding hi: Tam bang sil a bawl mite in Pasien’ manggam a luo sih ding uhi.

Hlagau’ Ga

²² A kilebulin gen vai ci lei, Hlagau’ ga in ki-itna, lungdamna, kilemna, lungduoina, migitna, kiphalna, muonhuoina,

²³ nunnemna le pumpi uhzawhnate ahi hi. Tam thute tawh a kituoh lo thukham khat beh om lo hi.

²⁴ Khris Jesu-a’ ahi mite in a cilesa deinate ule a lunggulnate uh singlamte tungah a kilcip zo ta uhi.

²⁵ Hlagau vanga nungta i hi uleh eite zong Hlagau makaina bangin kalsuon vai.

²⁶ Eite kiphasah loin khatlekhat kidem loin, khatlekhat zong kithangsiet sih va vui.