Ezekiel 47 - Zo Bible

Biehinnpi Pana Luong Tui

¹ Tua ciengin ama in biehinnpi lutna ah ei peipi hi; khum munah biehinnpi kotpi sangkil nei panin nisuona lam manaw-in tui a luong hi (biehinnpi pen nisuona lam a kingat zieh ahi hi); tuale maitam leitaw lam, biehinnpi kotpi sangkil leitaw lam tawpna a nei panin tua tui luongsuh hi.

² Tua ciengin leilu lam tunkot tawnin ei peipi a, a pulam kimvel tengah ei pui-in, nisuona lam a kinga tunkot pulam dong ei vapi kawikawi hi; tuale leitaw lam panin tui ang luong hi.

³ Tua pa in a khuta a tawi khau khat tawh nisuona lam manaw-in pei a, tong tulkhat dong te-in, tua ciengin tui ei tansah hi; tuami tui pen sietmit ciengah a gei hi.

⁴ Ama in tong tulkhat ma te leuleu a, tui ei tanpi hi; tua tui khup ciengah a gei hi. Ama in tong tulkhat te be leuleu a, tui eitanpi hi; tua tui kawng ciengah a gei hi.

⁵ Ama in tong tulkhat te be leuleu a, tuale tua tui pen gunpi khat na hi a, tua tui a khan ziehin ka galkai zo ta sih hi; tua gun a thuh sengin ngap zawh ding le galkai zawh ding gun ahi sih hi.

⁶ Ama in ka kungah, “Mihing aw, tam na mu zo tai mah?” ei ci hi. Tua ciengin ama in gun pangah ei peipikia hi.

⁷ Ka peikia ciengin gun pang tuoha a po singkung gol tampitah ka mu hi.

⁸ Ama in keima kungah, “Tam tui pen nisuona gam lam manaw-in luong a, Arabah gamah a lutsuh hi; a vei den tuipi sungah ang lutsuh ciengin tua tui ang cim ding hi.

⁹ Tua gun luonna mun poma-ah ganhing namcin a teng ding vua, tuale khum munah tami tuite ang tun ciengin nga tampi a om ding hi. Tua pen tuicim a suoh ding hi; tua gun a luonna popo-ah ganhing vannuoi a hing ding uhi.

¹⁰ Tuipi gei En-gedi panin En-eglaim dong mite dingin nga a beng ding uhi; tua mun pen len khuna mun hi ding hi; tua ngate Tuipi Lien sunga ngate bangin a nam tampitah hi ding hi.

¹¹ Ahi vangin nawnglah le buon tuite a cim thei tuom sih ding hi; tuate pen ci suoh dinga kinuasie ding ahi hi.

¹² Gunpi pang tuohah neh thei singkung namcin a po ding hi. A nate vul loin a ga zong hut lo ding a, mun siengtho panin amate adingin tui ang luon ziehin hlasielin ga a tha ga ding uhi. A gate an-in kinei ding a, a nate damna zatui-in kizang ding hi.

Gamgi Thate

¹³ Topa Pasien in tam bangin gen hi: Tamte pen Israel minam sawm le nite lahah amau’ gouluo dinga na hawmpieh gamgite ahi hi. Joseph in tanh ni nga ding hi.

¹⁴ Note in a kikimin na hawm ding uhi; na pu na pate uh tungah tuate pieh dinga ka kiciemsa ahi a, na gouluo dingun tam leitang na luo ding uhi.

¹⁵ Tam pen leitang kigi hi ding hi: Leilu lam pangah Tuipi Lien panin Hethlon lampi zui-in Lebo-hamath ah Zedad dong,

¹⁶ Berothah, Sibraim (tua pen Damascus le Hamth gamgi kikalah om), Hauran gamgi-a a om Hazer-hatticon dong ban ding hi.

¹⁷ Tuaci’n tuipi panin Damascus leilu lam gamgi-a om Hazar-enon dongah kihlungin leilu lama om Hamath tawh kigamgi ahi hi. Tam pen leilu lam pang hi ding hi.

¹⁸ Nisuona lam pangah Hauran le Damascus kikal hi ding hi; Jordan gun dung zuisuhin Gilead le Israel gam kikalah suoh ding hi; nisuona tuipi ah Tamar dongin kihlung ding hi. Tam pen nisuona lam pang hi ding hi.

¹⁹ Leitaw lam pangah Tamar panin Meribath-kadesh tuite dongah kihlung ding a, khum panin Tuipi Lien dongin Egypt Lui zui ding hi. Tam pen leitaw lam pang hi ding hi.

²⁰ Ni tumna lam pangah Tuipi Lien gamgi hi pai-in Lebo-hamath tawh kigalsai cieng lien hi ding hi. Tam pen ni tumna lam pang hi ding hi.

²¹ Tuaci’n Israel minam zui-in note lahah tam gam teng na hawmkhen ding uhi.

²² Tua gam pen noma’ gouluo ding le note lahah ang teng ta le nau a neisa namdangte adingin na hawm ding uhi. Note adingin amate pen Israel mi a suoh ding uhi; amate pen note tawh Israel minamte lahah gou kihawmpieh ding hi.

²³ Koikoi nam sungah tua gamdangte om tanan ule zong, khum munah a gouluo ding uh na pie ding uhi, Topa Pasien in ci hi.