Ezekiel 41 - Zo Bible

¹ Tua ciengin ama in biehinn laikimah ei peipi a, a khuomte a te hi; a pang tuoh gela khuomte a vailam tong guh tuoh a pha hi.

² A lutna avai tong sawm ahi hi; a lutna pang tuoha om kawmte tong nga ahi hi. Ama in biehinn laikim a te leh adung tong sawmli pha a, avai tong sawmni pha hi.

³ Tua ciengin inndan sungnungah ama lutin a lutna khuomte te a, tong ni pha hi; tuale a lutna avai tong sagi pha hi; tuale a pang tuoha om kawmte tong sagi a pha hi.

⁴ Ama in a inndan te a, biehinn laikim teng kihal loin, adung avai tong sawmni tuoh a pha hi. Tuale ama in keima kungah tami siengtho pen mun ahi hi, ei ci hi.

⁵ Tua ciengin ama in biehinnpi kawm te a, tong guh sa hi; tuale biehinnpi kimvela om a panga inndante avai tong li pha hi.

⁶ A panga innkhante dawl thum pha a, khat tungah khat kikhangin dawl khatah innkhan neu sawmthum om hi. Biehinnpi kawm ah tua inndante a kingap lo nadingin biehinnpi kawm kimvel tengah a nanna zawlte om hi.

⁷ A panga inndan peina lampi pen dawl khat zaw dawl khat zai tehteh hi; bangzieh ahei cile tua inn pen biehinnpi kimvel tengah kalei kidawpieh ahi hi. Tami zieha dawl khat zaw dawl khat gol tehteh ahi hi. A dawl neinung pen panin a dawl tungnung pen dongah a laita pen dawl panin kikato hi.

⁸ Biehinnpi in a kimvel tengah mun kidawsang a nei ka mu hi; a panga inndante’ zungpi a te leh tong guh a sau cieng tan khat a pha hi.

⁹ A panga inndan kawm a sana tong nga pha hi; tuale inndante a pulam kawm pen tong nga sa hi; tuale biehinnpi’ inndante kikal mun-awng om a,

¹⁰ tuale biehinnpi kimvela a pang zosie-a om leituol inndante kikala a om mun-awng pen avai tong sawmni a pha hi.

¹¹ A panga inndante adingin mun-awng a tung zawnah peina lampi kihong a, khat leilu lam, khat leitaw lam kinga hi; a kimvela mun-awng teng avai tong nga pha hi.

¹² Nitumna lam panga biehinnpi huong lam a kinga innpi pen avai tong sawm sagi pha hi; tua innpi kimvela innpi kawm tong nga sa a, adung tong sawmkuo sau hi.

¹³ Tua ciengin ama in biehinnpi a te leh tong zakhat sau a, a innpi kawm pumin a innhuong sung tong zakhat ma sau hi;

¹⁴ nisuona lam panga biehinnpi le a huong zong avai tong zakhat a pha hi.

¹⁵ Tua ciengin ama in nitumna lama tuol lam a kinga innpi pen adung lam te a, a pang tuoha a lamneu pumin tong zakhat pha hi. Biehinnpi laikim inndan sungnung le talaap pulam teng

¹⁶ singpeh tawh kidap a, a kimvelah tawlet neu thum a om hi. Sangkil lam mai ngatin biehinnpi kimvelin tuong panin tawlet dongin (tu-in tawlette a kituom ahi hi) singpeh tawh kidap a,

¹⁷ kotpi tunga mun-awng dong, inndan sungnung le a pulam dong nangawnin kidap hi. Tuale inndan sung kimvela kawm zosie tung le tua sunga biehinn laikimte zong kizem ciet hi.

¹⁸ Tua pen Cherub-te le lutu kung lim tawh kikheng a, cherub khatlekhat kikalah lutu kung khat ki-omsah hi. Cherub khat in maitang ni nei hi:

¹⁹ Lang khat a mihing’ maitang pen lutu kung lam kinga a, alang khatah humpi a no’ maitang pen lutu kung lam ma kinga hi.

²⁰ Tuong tung panin a kot tungnung munte dongin kawm tungah cherub-te le lutu kungte kikheng suoh hi.

²¹ Biehinn laikima a om kotkhuomte in ning li nei uhi. Mun siengtho mai-ah

²² sing maitam tawh a kibang pien khat om a, a sanna tong thum, adung tong ni, avai tong ni pha hi. A ningte, a tunnate, le a kawmte sing tawh kibawl hi. Ama in keima kungah, “Tam pen Topa mai-a kipha sabuoi ahi hi,” ei ci hi.

²³ Biehinn laikim teng le mun siengtho in kotkhah thuop ni tuoh nei hi.

²⁴ Kotpite singpeh ni kisutuo hi a, kotpi khatah a kivei thei singpeh ni ta kithuo hi.

²⁵ Kawm tung tengah cherub-te le lutu kungte a kikhuoh bangin a kawmte tungah zong kikhuoh hi; tuale a pulam talaap mai-ah sing tawh a kibawl a tungkhu khat a om hi.

²⁶ Tuale talaap kawmpangte tungah tawlet neute le lutu kungte a om hi.