2 Khangthute 36 - Zo Bible

Jehoahaz’ Maanna

¹ Tua gam mite in Josiah’ tapa Jehoahaz kicipa Jerusalem ah a pa’ zaluo-in kumpi-in a koi uhi.

² Jehoahaz a maan ding a kipatin kum sawmni le thum pha hi; ama Jerusalem ah hla thum sung maang hi.

³ Tua ciengin Egypt kumpipa in Jerusalem ah ama zakiesah a, ngun talent zakhat le kham talent khat, tua gam sieh le kaihin kipiesah hi.

⁴ Egypt kumpipa in Judah le Jerusalem tungah kumpi-in a sanggampa Eliakim koi a, ama’ min pen Jehoiakim-in a kheelpieh hi; ahi vangin Neco in a sanggampa Jehoahaz manin Egypt gamah a peipi hi.

Jehoiakim’ Uhna le Saltanna

⁵ Jehoiakim a maan ding a kipatin kum sawmni le nga pha hi; ama Jerusalem ah kum sawm le khat sung maang hi. Topa a Pasien’ muna-ah ama a sie-in a gamta hi.

⁶ Ama a sim dingin Babylon kumpipa Nebuchadnezzar kuonto a, Babylon-a peipi dingin ama siakol bul hi.

⁷ Nebuchadnezzar in Topa’ biehinn sunga vanzahte pawlkhat zong Babylon ah puo a, Babylon-a ama kumpi inn sungah tuate koi hi.

⁸ Tu-in Jehoiakim’ gamtatna a omlaite, le ama bawl a kidahhuoite, le ama a hoi lona a kimute, Israel le Judah Kumpite’ Tangthu Laibu sungah kigiel hi; tuale a tapa Jehoiakhin in ama’ za luo hi.

Jehoiachin’ Uhna le Saltanna

⁹ Jehoiachin a maan ding a kipatin kum giet pha hi; ama Jerusalem ah hla thum le ni sawm sung maang hi. Topa muna-ah ama a sie-in gamta hi.

¹⁰ Tua kum khuokhal sungin Nebuchadnezzar Kumpipa in mi sawlin, Topa’ biehinn sunga vanzah mantam teng tawh Babylon ah ama vaihlah a, tuale ama’ sanggampa Zedekiah kumpi-in koi hi.

Zedekiah’ Uhna

¹¹ Zedekiah a maan ding a kipatin kum sawmni le khat pha hi; ama Jerusalem ah kum sawm le khat sung maang hi.

¹² Topa a Pasien’ muna-ah ama siet gamtat hi. Topa’ kammal gensawn ahi kamsang Jeremiah mai-ah ama a kiniemkhieh sih hi.

¹³ Pasien tawh ama a kiciemsah Nebuchadnezzar zong a ledo hi; ama in a ngawng khauhsahin a lungtang zong khausah a, Israel Pasien Topa lamah a kihei nuom sih hi.

¹⁴ Siempu makai teng le mipi zosie in zong minamte’ kidahhuoi nate zosie a zui vua, a muonhuoi sih uhi; tuale ama in Jerusalem-a a siensuosa Topa’ biehinn pen amate in a buasah uhi.

Jerusalem a Kisietna

¹⁵ Ama in a mite le a tenna mun tungah lainatna a nei ziehin a pu a pate uh’ Pasien, Topa in amate kungah a kamtaite a sawlkia ngitnget hi;

¹⁶ hizongle mite tungah Topa’ lungthahna tungin a kidamsah zo lo ding za dongin Pasien’ kamtaite nuisatin, amau’ kammalte a na simmaw vua, amate in kamsangte zong a na zapi den uhi.

¹⁷ Tua ahi ziehin amate sim dingin Topa in amau’ biehinn munsiengtho sunga namsau tawh a tangvalte a that, le ngahnu tangval, khanghamte le a zawngkhal mite tungah lainatna a nei lo Chaldea-te’ kumpipa a puoh hi; ama in a unpi-in ama’ khut sungah amate a pie hi.

¹⁸ Ama in Pasien’ inn sunga vanzah a gol a neu, Topa’ inn sunga goute le kumpipa le a uliente’ gou zosie a unpi-in Babylon ah a puo hi.

¹⁹ Amate in Pasien’ inn a haltum vua, Jerusalem kulpi kawm satkehin, mei tawh kumpipa’ inn zosie a haltum vua, vanzah manpha zosie a susie uhi.

²⁰ Ama in Babylon ah namsau pana a suohta mite salin kai a, Persia kumpi gam a kiphu ni cieng dongin amate, ama le a tapate’ sal a suoh uhi.

²¹ A sabbath-te adingin tua leitang a kibawl dong cieng, Jeremiah kam tungtawnin Topa’ thugen a tangtun nading ahi hi. Kum sawm sagi a cin nadingin leitang a kinuasie hun sung teng zosie leitang in sabbath a tang hi.

Cyrus in Gambelte ading Suotahna Tangko

²² Persia kumpipa Cyrus’ kum khatna kumin, Jeremiah’ kam pana Topa’ thu a tangtun thei nadingin, Persia kumpipa Cyrus in tangko khat sawl a, lai-a kigiel kumpi thupieh zong ama’ kumpi gam zosie-ah a tangko nadingin Topa in Persia kumpipa Cyrus’ lungsim a thampieh hi:

²³ “Persia kumpipa Cyrus in tam bangin a gen hi: Vantung Pasien, Topa in leitung kumpi gam zosie ei pie zo a, Judah gam sunga Jerusalem ah ama ading biehinn khat a lampieh dingin keima ei sawl zo hi. Note lahah ama’ mi a om poma, Topa a Pasien in ompi taheh! Ama kuontosah heh,” a ci hi.