2 Khangthute 33 - Zo Bible

Manasseh’ Uhna

¹ Manasseh a maan ding a kipatin kum sawm le ni pha hi; ama Jerusalem ah kum sawmnga le nga sung maang hi.

² Israel mite’ mai-ah Topa in a nawmang minamte in a zah a kidahhuoi gamtatnate ma bangin, Topa muna-ah ama a siet gamtat hi.

³ Azieh pen a pa Hezekiah’ na suhsietsa ahi munsangte lamkia-in, Baal-te adingin maitamte phut a, khuom siengthote bawlin, vantung na zosie bie a, tuate’ na a sem hi.

⁴ Topa in, “Jerusalem-ah ka min om zing ding hi,” a cina Topa’ biehinn sungah ama in maitamte a lam hi.

⁵ Ama in Topa’ biehinn tuol nite-ah vantung na zosie adingin maitamte a bawl hi.

⁶ Ama in Hinnom tapa’ kuomah mei tawh a tapa hal a, mailam thugenkholna, khutlametna-te zang a, mi bum theite, dawilawm neite, le bumtawite thu a dong hi. Topa muna-ah ama in sietna tampi bawlin ama a lungthahsah hi.

⁷ Pasien in David le a tapa Solomon kungah, “Israel minamte zosie sung panin ka teelsa tam biehinn sung le Jerusalem sungah keima’ min ka koi zing ding hi, a cina mun Pasien’ biehinn sungah ama in a khensa milim koi hi.

⁸ Keima in amate ka thupieh zosie, thukham zosie, thupiehte, le Moses tungtawna a kipie biehna ngaina kipte limtaha a zui uleh, na pu na pate vua dinga ka sesa gam panin Israel-te’ keng ka khin ngai nawn sih ding hi,” a ci hi.

⁹ Amate in Israel mite mai-ah Topa in a na suhsietsa minamte sangin sietna a tam bawl zawh nadingun Manasseh in Judah le Jerusalem-a tengte a lelamin a pui hi.

A Kisiazaw-in Manasseh a Ngai Bangkia

¹⁰ Topa in Manasseh le ama’ mite kungah thu gen a, ahi vangin amate in a thuse sih uhi.

¹¹ Tua ahi ziehin amate sim dingin Topa in Assyria galkapmangte puoh a, amate in hatkilih tawh Manasseh manin siakhau tawh kanbawmin Babylon ah a peipi uhi.

¹² A lungkham laitahin Topa a Pasien’ angvanna a sui a, a pu a pate’ Pasien mai-ah nahpi-in a kiniemkhieh hi.

¹³ Ama in Pasien kungah thum a, tuale ama in ama’ kutna sangin a ngetna za a, Jerusalem ah a kumpi gam a piekia hi. Tua bepin Topa pen Pasien tahtah ahi lam Manasseh in a thei hi.

¹⁴ Tua zaw ciengin kuom sung, Gihon nitumna lam, Nga Tunkot lutna dong David khuopi adingin ama in kulbang pulam khat a cieng hi; ama in Ophel kimkotah kul sang mama khat cieng to hi. Ama in Judah gam sung kulnei khuopi zosie-ah zong galkapmangte koi hi.

¹⁵ Ama in Topa’ biehinn panin gamdang pasien-te le a milim, le Topa’ biehinn muol tung le Jerusalem-a ama’ na lamsa maitam zosie ladawhin khuo pulamah tuate a paaimang hi.

¹⁶ Ama in Topa’ maitam zong a ngai bangin koikia a, tua tungah thunuoma biehpiehna le lungdamkona a pie hi; tuale ama in Israel Pasien Topa’ na a sep nadingun Judah thu a pie hi.

¹⁷ Hinanle munsangte-ah mite in biehpiehna a pie lai vua, ahi vangin Topa a Pasien uh kung beh ma-a a pieh uh ahi hi.

Manasseh’ Sina

¹⁸ Tu-in Manasseh’ gamtatna a omlaite, le a Pasien’ tunga a thungetna, le Israel Pasien, Topa’ min tawh ama tunga thu a gen thumute’ thugente, Israel Kumpite’ Khang Tangthu sungah a om hi.

¹⁹ Pasien in ama’ thungetna, le ama’ thumna a sanna, le ama’ mawna le a muonhuoi lona zosie, le ama a kiniemkhieh masangin munsangte bawlin khuom siengthote a koina munte thu, Thumute’ Khang Tangthu sungah kigiel hi.

²⁰ Tuaci’n a pu a pate tawh Manasseh lumton a, amate in a inn sungah ama a vui uhi. A tapa Amon in ama’ za luo hi.

Amon’ Uhna le A Sina

²¹ Amon a maan ding kipatin kum sawmni le ni pha hi; ama Jerusalem ah kum ni sung maang hi.

²² A pa Manasseh’ gamtatsa bangin Topa muna-ah a siet gamtat hi. Amon in a pa Manasseh’ bawlsa milim zosie tungah biehpiehnate pie-in tuate’ na a sem hi.

²³ A pa Manasseh bangin Topa’ mai-ah ama le ama a kiniemkhieh sih a, tam Amon in khielna tampi a piengsah semsem zawsop hi.

²⁴ A nasemte in tha dingin ama a sawmdap vua, a inn sungah a that uhi.

²⁵ Ahi vangin tua gam mite in Kumpi Amon a sawmdap mi zosie that leuleu uhi; tuale gam mite in ama’ za a luo dingin a tapa Josiah kumpi-in koi uhi.