2 Khangthute 19 - Zo Bible

¹ Judah kumpipa Jehoshaphat dam le bihin Jerusalem a inn ah a kilekia hi.

² Ama dawn dingin Hanani’ tapa, thumu pa Jehu pusuoh a, Kumpi Jehoshaphat kungah, “Mi gilote panpi-in Topa a muda mite it ding na hi amah? Tami thu ziehin nang ang do dingin Topa kung panin ama’ lungthahna a pusuoh zo hi.

³ Hizongle na sungah hoina pawlkhat kimu hi. Azieh pen nangma in gam sung panin khuom siengthote na susie a, na lungsim sungah na Pasien sui ding na ngaisun hi,” a ci hi.

Jehoshaphat’ Puophatnate

⁴ Jerusalem ah Jehoshaphat a teng hi; tua ciengin Beer-sheba panin Ephraim muoltung gam cieng dong mite lahah zinkia a, a pu a pate uh’ Pasien, Topa kungah amate tunpikia hi.

⁵ Ama in Judah gam sunga kul a nei khuopite zosie, a khuopi a khuopi-ah thukhente koi a,

⁶ tuami thukhente kungah, “Mihingte tanga thukhen na hi sih vua, Topa tanga thu khen na hi zawh ziehun na nasep uh limtahin ngaisun un; ama in na thukhenna vuah note ang ompi hi.

⁷ Tu-in na tung vuah Topa zatahna om taheh; na sepna vuah pilvang un, azieh pen Topa i Pasien tawh thutang leheina, mi deidanna, guhgol lahnate a omton thei sih hi,” a ci hi.

⁸ Tua banah Topa adinga thukhenna pie ding le thukineite a khenpieh dingin Jehoshaphat in Jerusalem ah Levi-te pawlkhat, siempute pawlkhat, le Israel innkuon lutang pawlkhat a se hi. Amate in Jerusalem ah panmun a nei ciet uhi.

⁹ Ama in tam bangin amate thu hil hi: Topa zatahna, citahna, le na lungsim zosie utawh na sem ding uhi;

¹⁰ amau’ khuopi sunga teng na sanggamte uh tung panin sisan kisuona, thukham ahi sihle thupiehna, upadi ahi sihle biehna ngaina kipte tawh kisai-in na tung vuah thu khat popo ang tun ciengin Topa mai-ah mawna a piensah lo nading ule note tung le na sanggamte tungah lungthahna a tun lo nadingin amate thu na hil ding uhi. Tam bangin bawl un, tua hile mawna na piengsah sih ding uhi.

¹¹ En un, Topa’ thu tawh kisai thu zosie-ah note tunga vaihawm dingin siempupi pa Amariah om hi; tuale Judah Kumpipa tawh kisai thu zosie-ah Judah innkuon uhpa Ishmael’ tapa Zebadiah om hi; tuale Levi-te in note tungah ulien sem ding uhi. Hang tahin gamta in, mi hoite tawh Topa ang omton taheh!” a ci hi.