1 THESSALONIKA 1 - Zo Bible

¹ Paul, Silvanus, le Timothy-te in, Pa Pasien le Topa Jesu Khris sunga a om Thessalonica khuo hlattuom pawlpite tungah: Note tungah hepina le lungmuonna thupha ang om taheh.

Thessalonica-te’ Upna le Hinkhuo

^2-3 I Topa Jesu Khris sungah upna tawh na nasepnate uh, itna tawh na hanciemnate ule lam-etna kip na neinate uh, i Pa Pasien mai-ah hing phawh denin, kote in ka thungetna sung vuah na min uh loin, note zosie adingin lungdamna ka ko zing uhi.

⁴ Bangzieh ahei cile Pasien in a it sanggamte aw, ama in note ang tel zo lam ka thei uhi.

⁵ Note lahah ka op laitahun note adingin bangci bang mi ka hi uh ahei, ci kang lah uh na thei ma bangun, ka gen uh lungdamna thu zong note tungah kam beh tawh hi loin, vanglietna sung le Hlagau siengtho sungah a bukim kithei cienna tawh ang tung ahi hi.

⁶ Note in bawlsietna na thuoh vangun Hlagau Siengtho ziehin kipahna tawh Pasien’ thu na sang vua, kote le Topa’ ette mite na suoh uhi.

⁷ Tuaci’n note pen Macedonia gam le Achaia gam sunga thu um mite zosie tungah limpha na suoh uhi.

⁸ Bangzieh ahei cile note kung panin Macedonia gam sung le Achaia gam sung teng ah Topa’ kammal a kiza hi beh loin, muncin tengah na Pasien upna uh kithei sieng zo ahi ziehin kang gen ding uh a kisam nawn sih hi.

⁹ Azieh pen tua gam sung tenga a om mite in note lahah ko bang ei kici zindo ci thu le, a hing zing le a man Pasien’ na a sem dingin milimte panin Pasien lamah note bangci kihei ci thute le,

¹⁰ ang tung ding thangpaina panin ei suohtasah ding pa Jesu, sina pana a thawsahkia, a Tapa vantung pana ang pei ding ngah a na op lam uh ang gen hi.