1 Samuel 10 - Zo Bible

¹ Samuel in sathau thawl khat la a, a lu tungah buohin ama nam hi; ama in, “Topa in ama’ mi Israel-te tunga uhpa dingin nang sathau ang nu zo hi. Topa’ mite tungah uhpa na hi ding a, a kimvel vua om a galte uh khut sung panin amate na hunkhie ding hi. Tu-in Topa in ama’ gouluote tungah uhpa dinga sathau ang nu zo a hina lim tam bang hi ding hi:

² Tuni-in kei kung panin na pei ciengin Benjamin-te gam Rachel’ han gei-a Zelzah ah mi ni tawh na kituoh ding hi; ama gel in na kungah, ‘Na sui sui uh laate kimu zo a, tu-in ahile na pa in tuate lunghimawpi nawn loin nang ang lunghimawpi zaw ta a, “Ka tapa bang ka law ta diei?” a ci hi,’ ang ci ding uhi.

³ Tua ciengin khum mun panin na pei lai ding a, Tabor-a gangpi lahah na tung ding hi; tua munnah Bethel-a Pasien kung a peito, kelno thum a kai mi khat, anlum thum a puo adang khat, le savun tuithawl dimtah lengga tui a puo mi khat, mi thum in nang ang dawn ding uhi.

⁴ Amate in nang hing muohin anlum ni ang pie ding vua, tua khu amate tung pana na san ding ahi hi.

⁵ Tua zaw ciengin Philistia khuocingte opna mun Gibeath-elohim na tung ding hi; tua khuopi sung na tun ciengin a mai vuah harp, tawm, theile, le lyre lasahna tawh lamin awngin biehbuhno pana ang kumsuh kamsang honkhat tawh na kituoh ding hi.

⁶ Tua ciengin Topa’ hlagau in nang hing manin amate tawh lamin awngin kam na sang ding a, mi tuomdang khatin na kikhel ding hi.

⁷ Tu-in tam limte na tuo khah ciengin sep dinga hoi na sah popo sem in. Azieh pen Pasien in nang ang ompi hi.

⁸ Tuale ka masanga Gigal ah na peisuh ding hi; tua ciengin meihal biehna le thunuom biehna pie dingin na kungah kang peisuh ding hi. Na kungah hing pei-in na bawl ding teng kang lah masang, ni sagi sung nei na ngah ding hi,” a ci hi.

Saul in Kamsang

⁹ Samuel nuasie dingin a kinua hei leh Pasien in ama tungah lungtang dang khat a pie hi; khum ni-in tam lim teng zosie a unpi-in a tangtung hi.

¹⁰ Khum mun panin Gibeah lam a pei laitahun kamsang honkhat in ama a na lamdot uhi. Tuale Pasien’ hlagau in ama man a, amate tawh lamin awngin kam a sang hi.

¹¹ Ama a thei ngai mi zosie in kamsangte tawh a kamsante a mu ciengun, khatlekhat a kiho vua, “Kish’ tapa tungah bang tung adiei? Saul zong kamsangte khat ahi ta amah?” a kici uhi.

¹² Khum muna om pasal khat in dawng a, “A pa uh koi ahi diei?” a ci hi. Tua ziehin, “Saul zong kamsangte khat ahi ta amah?” ci paunah khat a pieng hi.

¹³ Ama lamin awngin kam a san zaw ciengin inn ah a pei hi.

¹⁴ Saul’ pano in ama le naupangpa kungah, “Hei sunga va pei na hi vuoi?” a ci hi. Ama in dawngin, “Laate sui ka hi uhi; kimu zo nawn sih va ci-a ka thei bepun Samuel kungah ka va hawta uhi,” a ci hi.

¹⁵ Saul’ pano in, “Samuel in na kunga ang gen teng kei kungah ei gen in,” a ci hi.

¹⁶ Saul in a pano kungah, “Ama in ka kung vuah laate kimu ta hi, ci-in ei gen hi,” a ci hi. Ahi vangin Samuel’ gen a kumpi suo nading thu ama tungah bangma gen lo hi.

Saul Kumpi-in Kiphuongzah

¹⁷ Samuel in Mizpah-a Topa kungah mite khawm a,

¹⁸ a kung vuah, “Israel-te’ Pasien, Topa in tam bangin a gen hi: ‘Egypt panin Israel-te ka peipi a, Egypt-te’ khut sung le note ang bawlsie kumpi gamte zosie’ khut sung panin kang hunkhie hi,’ a ci hi.

¹⁹ Hinanle na gentheina ule na cimawnate pan vua note ang hunkhie na Pasien uh tuni-in nuolin, ‘Hi sih! ko tungah kumpi khat koi in,’ na ci uhi. Tua ahi ziehin tu-in na minam zui ule na be uh zui-in Topa mai-ah kilah un,” a ci hi.

²⁰ Tua ciengin Samuel in Israel minam zosie a nai-ah a zawpi a, aisanna tawh Benjamin minam kila hi.

²¹ Ama in Benjamin minamte a innkuon kuonin peipi a, aisanna tawh Matri innkuon kila hi. A tawpna-ah Matri innkuon a mi malin peipi a, aisanna tawh Kish’ tapa Saul kila hi. Hinanle ama a sui ciengun ama kimu zo lo hi.

²² Tuaci’n amate in, “Tua mipa tam sungah ang pei amah?” ci-in Topa a dongkia uhi. Tuale Topa in, “En un, ama vanlom lahah kiphuol hi,” a ci hi.

²³ Tua ciengin amate tai-in khum panin ama a zawpi uhi. Ama’ mite lahah a din ciengin adangte zosie a liengko cieng beh a pha uhi.

²⁴ Samuel in mi zosie kungah, “Topa in a teelsa mipa na mu vuoi mah? Mite zosie lahah ama tawh kibang koima om lo hi,” a ci hi. Tuale mi zosie in, “Kumpipa khansau taheh!” ci-in a awng uhi.

²⁵ Samuel in kumpipa’ thuneina le a nasep dingte mite kungah gen hi; tuale amate in zong laibu khatah gielin, Topa mai-ah a koi uhi. Tua ciengin Samuel in a inn ciet vuah mite a peisah hi.

²⁶ Gibeah-a a inn ah Saul pei a, Pasien in a lungsim a khoikhah mi thahatte zong ama tawh zawhton uhi.

²⁷ Hizongle kimanna a nei lo mi pawlkhat in, “Tam pa in ei bangci hut zo ding ahei?” a ci uhi. Amate in ama a simmaw vua, ama kungah letsong a tawi sih uhi. Hinanle ama a sip dide hi. Tu-in ahile Ammon-te’ kumpipa Nahash in Gad-te le Reuben-te nasie tahin a bawlsie hi. Ama in a zietlam mit ciet uh kheipieh a, Israel hun ding mi pie lo hi. Ammon-te’ kumpipa Nahash in Israel-te a zietlam mit a kheipieh lo Jordan kuom tengah koima a om sih hi. Ahi vangin Ammon-te’ kung panin pasal tul sagi a suohta vua, Jabesh-gilead ah a lut uhi.