1 Peter 1 - Zo Bible

Hopina

¹ Jesu Khris’ sawltahpi keima Peter in, Pontius gam, Galatia gam, Cappadocia gam, Asia gam, le Bithynia gamte-ah galtai-a a Kithethang Mite kungah lai kang hlah hi.

² Pa Pasien in a sekholsa le a teelsa mite, Jesu Khris’ thu a mang ding le a sisan tawh a kithe dinga Hlagau Siengtho in a siensuosa mite tungah: Hepina le kilemna a kicingin hing om taheh.

Ahing Lametna

³ I Topa Jesu Khris’ Pa le Pasien in thupha nga taheh! Ama’ ei khuotuona lienpi ziehin sina panin Jesu Khris’ thawkiana tungtawnin ahing lametna a nei dingin eite a tha-in ei suohsah zo a,

⁴ note adingin vantungah a kisie thei lo, a buabang lo, le a vul thei lo na gouluo ding uh ang kikoipieh zo hi.

⁵ Note pen upna tungtawnin hun nukhia ciengin a kilang dinga a baisa-a a om hutdamna a nga dingin Pasien’ vanglietna tawh ang kikemcingte na hi uhi.

⁶ Tu-in note in bakhat sung hahsatna tuomtuomte na thuoh pah zongun, tami thu-ah lungdam un,

⁷ tua in mei tawh a kisittel zaw cienga a kisie thei kham sanga a manphazaw na upna tahtah uh hing kilangsahin, Jesu Khris ang kilaa ciengin phatna, minthanna le patawina na nga thei nading uh ahi hi.

⁸ Ama mu ngai lo napi na it uhi; tu-in ama mu sih nan locin na um vua gen zawh lo za dongin kipahin nahpi tahin na lungdam uhi,

⁹ azieh pen na upna uh’ tupna bulpi ahi na hlagau uh’ kihutdamna a nga na hi uhi.

¹⁰ Tami hutdamna tawh kisai-in note nga ding hepina thu a genkhol kamsangte in limtahin sui-in a kantel vua,

¹¹ amate sunga om Khris’ Hlagau in Khris’ thuoh dinga a kisesa teng le tua zaw cienga a nga ding minthanna thu teci a pankhol lai-in, koi a cina ahi a, bang hun ding ahei ci-in a kan hi.

¹² Vantung pana ang kisawl Hlagau Siengtho tawh note tunga lungdamna thu ang hil mite in na kung vuah tu-a ang kigensa thute ang hil lai-un, amau’ na sem hi loin note’ na sem ahi lam amate tungah a kilah zo hi, tam thute pen vantung mite nangawn in a mu nop uh thu ahi hi!

Hindan Siengtho dinga Hlatna

¹³ Tua ahi ziehin nasem dingin na lungsim uh a kigingsa-in om un; no le no pilvang unlen, Jesu Khris ang kilah hun cienga ang kipie ding hepina tungah na lametna uh nga un.

¹⁴ Thumang tate ma bangin bangma na thei lo uh hun lai-a na lunggulnate vuah buol nawn sih un.

¹⁵ Note ang hlan pa a siengtho ahi ma bangin no zong na gamtatna zosie vuah na siengtho un.

¹⁶ Azieh pen, “Kei a siengtho ka hi ziehin note zong na siengtho ding uhi,” ci-in kigiel hi.

¹⁷ A gamtatnate utawh kizui-in mi zosie tungah deidat nei lo-a thu a khen pa tungah Pa bangin thu na nget uleh, na galtai uh hun sungin ama giingin gamta un.

¹⁸ Na pu na pate uh tung pana na luosuh uh a ginalo gamtatna panin a kisie thei nate ahi ngun le khamte tawh ang kitan ahi sih a,

¹⁹ mapawn nei lo le nuolbang lo tuuno tawh a kibang a manpha Khris’ sisan tawh ang kitan ahi lam na thei uhi.

²⁰ Ama pen leitung pien masangin a kisekholsa hi a, ahi vangin note adingin hun nukhia cienga ang kilahsah pan ahi hi.

²¹ Pasien tungah na upna ule na lametna uh a kingah thei nadingin, ama tungtawnin sina panin ama a thosah le minthanna a pie pa Pasien sungah muonna a nei na hi uhi.

²² Tu-in note itna tahtah tawh khatlekhat na ki-it thei nading ule na lungtang tawng panun khatlekhat na ki-it thei nadingun thuman thutah zuina tawh na hlagau uh na siensuo zo uhi.

²³ A kisie thei khaici tawh hi loin, a kisie thei lo khaici ahi, a hing le a kip a kho Pasien’ thu tawh a tha-a a suohkia na hi ta uhi.

²⁴ Azieh pen, “Mihing zosie lopa tawh kibang a, ama’ minthanna zosie zong lopa paa tawh kibang hi. Lopate vulin paate pul a,

²⁵ ahi vangin Topa’ thu ahile a tawntungin kip hi,” a ci hi. Tami thu in na kung vua ang kigensa lungdamna thu ahi hi.