Yook 114 - Yomgkom

¹ Israeldan Idyip aombed angkane winiwen yaron, Yekob ye awoya ari kuu yikaadban ye weng maa dakmimaibdan yaambed yaro winiwen yaron kui,

² kuyaron kuu Yudadan kuu ye karadmodan keriiwe, Israeldan kuu ye nimakarub keriwen.

³ Karamok kuu wedmekoru kombere wuneen, kwane ok Yooden kuu yinmone ika daaneen,

⁴ kwane aangko aangko kuu sibi ambi areb korongbere nadmiwen, kwane koodbon koodbon kuu sibi mana areb korongbere nadmiwen.

⁵ O karamok, komoyiibkob kombere weneeb? O Yooden, komoyiibkob yinmone ika daaneeb?

⁶ O aangko aangko, komoyiibkob sibi ambi areb korongbere nadmiib? O koodbon koodbon, komoyiibkob sibi mana areb korongbere nadmiib?

⁷ O okad kumundin, Yariman ye arinambo arimbed kiringme, Yekob ye God ye arinambo arimbed kui.

⁸ Yembed dumnadbon kuu amonomboone ok bumbon kereen, kwane dumnad kamkonombon kuu amonomboone ok kirubdem yemoon ye okad kereen.