Wenía 9 - Yové Koĩni Vana

Yové Koini nawã vai ato ashõti ivo yoã

¹ Askái Yové Koĩni Noé, ãwẽ vakerasĩnĩ ashõ vana roapa ato netãi vanai neskái. “Revosho, maitioi peás itsoma.

² Maĩ yoinavo, peiyavo, maĩ noyõ ikiya, maĩ meshoya, enẽ yoini akárasĩ mato rakéshoi shokokatsavo. Katsése mato ẽ kashma ashõai.

³ Katsé yoinavorasĩ mã piá roase. Vevõ, piti vaná mato ẽ kashma ashõti keskásevi akĩ, katseki mato ẽ kashma ashõóai.

⁴ Askámaĩnõ, nami imiyakĩ pitsomaroa. Ãwẽ imiro ãwẽ chinãvere.

⁵ Askámaĩnõ yora avé yora imi ichná akãya ivo, yoini yora yamamaiya aká ivoro eã ato ẽ kopishokatsai.

⁶ Yora avé yora yamamakĩ imi ichná akãya ivo, aaivo yora kopiki avé yorãsevi yamamaókatsa. Awesáma, ẽ yora vimaki, ea keská akĩ ẽ shovimatisho ã ikí.

⁷ Askásho, revosho, maitioi peás itsoma, mai anõ atsoma”, ato akĩ.

⁸ Aská txipo ato tanamaóki.

⁹ “Ramaro mato tekísma ivo vana ẽ eneshokatsai, matomẽsho revokatsa ivorasĩ askásevi aká.

¹⁰ Askávaíse matonĩ shokoarasĩ askásevi, yoini peiyavorasĩ, yoini iná ati ivorasĩ, niitero ivorasĩ, ashkã rãtxã shokosho matonĩ poshókõvai ivorasĩ aká, yoinavorasĩ katsése ato ẽ ashõókatsa.

¹¹ Tekísma ivo vana mato ẽ eneshoavere. Txipokiri chinã viayavorasĩ enẽ txivãmakĩ ea ato makimaotĩpá. Naaivo mai enẽ txivãmakĩ ea keyootĩpá”, akĩ.

¹² Askávai vanaói. “Tekísma ivo vana mato, matomẽsho revokatsa ivorasĩ, katsése chinã viayavorasĩ aká ẽ eneshoa. Askáinã mato ẽ neská ashõkatsa, anõsho mã onãtakĩ oĩti.

¹³ Naí oshõ nawã vai ená ivo ẽ rakãkatsa, tekísma ivo vana anõsho onãtakĩ oĩnõvo iinã.

¹⁴ Askái naí osho mai matxi ẽ ronõkémaĩnõ, anõsho nawã vai rakákekatsa.

¹⁵ Askávai anõsho, yoinavorasĩnĩ ashõ mato, vana ẽ eneshoa ivo ẽ chinãkatsa. Txipokiríchta yoinavorasĩ enẽ ea keyootĩpá.

¹⁶ Nawã vai naí oshõ rakákémaĩnõ oĩki tekísma ivo vana mai shavapa chinã viayavorasĩ ato ẽ eneshoa ivo ẽ chinãkatsa”, akĩ.

¹⁷ Askái vanai mashtékaĩkatsiinã ato tanamaóki. “Naaivo nawã vai ẽ netãro anõsho tekísma ivo vana nõ chinãti”, akĩ Yové Koĩni.

Camne ãwẽ papa ati ati ivo yoã

¹⁸ Noepa vakerasĩ, rãtxãsho poshokõyavorasĩro Sem, Cam, Jafé aatíi. Camro Canaãne papa.

¹⁹ Naa 3 venevakerasĩro, anõsho yorarasĩ naaivo mai shavátioi shokotivo.

²⁰ Askámaĩnõ Noéro piti merámayashõ ãatõpari txitáki wai avaikĩ uva vanati.

²¹ Askái shavá wetsã, ã ene tanashoma avaí vetsakawãsho ãwẽ peshé naki pakésho, txĩto rakái.

²² Ãwẽ askámaĩnõ, Camne, txĩtopakésho ãwẽ rakáa oĩvaíki, kashõ ãwẽ takevo ato yoãshoi kakĩ.

²³ Aská nĩkãinã Sem, Jafé aatiisho õpo kevika ivo atõ peshõ poẽnivai voshõ, ãwẽ txĩto rakákiri oĩtanamasmẽkĩ txichtikiri ikõvaĩi voshõ, atõ papa õpõ iwapakévo.

²⁴ Atõ askámaĩnõ vetsa tãti avaí vesokaĩsho, ãwẽ vake txipoketõ avai ivo tanainã, vanainái.

²⁵ “Canaã askaĩkõtikĩ ẽ iki ãwẽ takevõ ati akĩ isĩpa akĩ mee imaki.

²⁶ Askámaĩnõ Yavé, Sem anõ txipoa ivo Yovéro roapa. Semro Canaã yonoa ave ninõ.

²⁷ Askámaĩnõ Jaféro Yové Koĩni revomaa ave peás inõ. Semnĩ ave ninõ. Askái Canaã ati akĩ mee ima ave ninõ”, ikí Noé.

²⁸ Askávai, enẽ txivãvai txipo, Noé 350 vari tavái nióti.

²⁹ Askái katsékasero 950 vari tavái nishõ vopiti.