Wenía 8 - Yové Koĩni Vana

Enẽ txivã nasháti ivo yoã

¹ Askái Noé, niitero yoinavorasĩ, yoini iná ati ivorasĩ aká katsése rãtxã avé kãtxía chinãsho, Yové Koĩni niwe yonomaĩnõ waka txitavíi nashápakéi.

² Askái maĩsho ene kayarasĩ tovíkaĩa ivo enéi, naí shavapashõ ene kaya vepẽnáa ivo enéi, oi ikí askásevioi aí.

³ Askávai 150 shavá tavái, chinã ashõchta ene nashá nashápakékaĩi.

⁴ Askái 7 oshe nokói, aaivo oshẽsevi 17 shavánamã rãtxa Ararate matopa rakápakei kaí.

⁵ Askái waka nashái isi 10 oshe nokói, naaivo oshe rakáa venapa, matórasĩ varíkéchtai.

⁶ Askávai 40 shavá tavákémaĩnõ Noepa rãtxã oro ãwẽ sawẽchna ivo kepẽki.

⁷ Askávaíki, “mai varíkéai”, ravãki, oka ãwẽ yonoa noya noyakawãi matsíkawãsi.

⁸ Askávaíki txipo noma yonoóki, “waka nashái mai varíkémara oĩóta”, iinã.

⁹ Aská akĩ noma ãwẽ yonoa, anõ tsaópakéti yama oĩketani okĩ rãtxa chinãvarãóki. Wakase rakáa, mai tachima oĩtani ãwẽ omaĩnõ, mevi ãwẽ weáshoá anõ ãwẽ tsaópakei omaĩnõ atxivaíki arimẽse rãtxã naneóki.

¹⁰ Aská anosho 7 shavákase manávaíki rãtxãsho arimẽse noma yonoóki.

¹¹ Ãwẽ aská aka itãi iokarãki yãtã oliveira mani pei venáka tokõsho tachikarãi. Ãwẽ askámaĩnõ, “waka nashái”, iinã tanaki.

¹² Aská oĩinã 7 shavákase manáóki. Askávaíki noma ãwẽ yonoóa iokarãóma.

¹³ Aatiãro 601 vari aya. Naaivo vari txitavía, oshe rakáa venapa, waka nashái, mai mãkõkaĩi. Askámaĩnõ ãwẽ rãtxa peshé txoyo avaikĩ, mai mãkõkaĩa meraki.

¹⁴ Askávai txipo, oshe ravévakĩ nokói 27 shavánamã mai katsése mãkõkaĩi.

¹⁵ Askánamãsho Yové Koĩni aa tanamakĩ.

¹⁶ “Rãtxãsho kayakaĩ, mĩ aĩ, mĩ vakerasĩ, mĩ vakẽ aĩvorasĩ aatíi.

¹⁷ Atonĩ mĩ kãtxía ivo yoinavorasĩ keyoki poshakõi arí. Yoini peiyavorasĩ, yoini venekavo, maĩ noyõ ikiyavorasĩ, maĩ meshoyavo aká, revovaĩi ave maitiónõvo”, akĩ.

¹⁸ Ãwẽ askámaĩnõ, Noé, ãwẽ aĩ, ãwẽ vakerasĩ, ãwẽ vakẽ aĩvorasĩ aatii poshókõvo.

¹⁹ Yoinavorasĩ atõ aĩnĩ askásevi aoi, katsése rãtxãsho poshókõóvo, peiyavorasĩ, yoini venepavorasĩ, maĩ noyõ ikiya, maĩ meshoya aatíi.

²⁰ Askávai txipo anõ maki ati tapo akĩ. Aská avaikĩ yoini anõ eséyatima, chai anõ eséyatima ivo aká ato atxivaíki, Yavé maki ashõki.

²¹ Yavé ãwẽ aská ashõa noékawã sheteinã arí vanai. “Txipokiri yoramẽsho mai ea veí netãotĩpá. Yora aaivoi kanii vakechtasho anõ ikírvi ichnáro. Txipokiri neskátõ chinã viayavorasĩ ato keyootĩpá.

²² Ramaro mai askái inoi rakámaĩnõ, piti merámaa enétĩpá. Askávai matsika, shanaka, varikarãi, oi txinĩ, shavákawãi, yamékawãi akí tapiskatsa”, ikí.