Wenía 7 - Yové Koĩni Vana

Enẽ txivãti ivo yoã

¹ Askávai txipo Yavepa Noé tanamakĩ, “mia, mĩ aĩ, mĩ vakerasĩ, atõ aĩvorasĩ aatii rãtxã weina. Mia westíse chinã meki yora ẽ oĩvaĩvaĩa.

² Askái yoini koĩ, anõ eséyatima ivoro 7 tanáti akĩ ãwẽ aĩnĩ ashõ ato weimatso. Askámaĩnõ yoini koĩma, anõ eséya ivoro vene ãwẽ aĩ aká ravé ashõ ato weimatso.

³ Yoini peiyavorasĩ ato askásevi aotso, 7 tanátíisevi ãwẽ vene, ãwẽ aĩ aká ato weimaótso, keyói makimísivo.

⁴ Nenosho 7 shavá nokókaĩmaĩnõ oi ẽ pakekatsa, 40 shavá tavái oi ikí, ii ii varikawãi, ii ii yamékawãi aká ikatsai. Naaivo mai shavapa ato ẽ shovimati ivo, chinã viayavorasĩ katseki ato ẽ keyokatsa”, akĩ.

⁵ Yavepa aská akatõsho, Noepa ãwẽ yonoa keská akĩ katseki ashõki.

⁶ Aatiã 600 vari aya, enẽ ato txivãtitiã.

⁷ Aská akĩ enẽ ato txivãkatsa vevo, aa, ãwẽ aĩ, ãwẽ vakerasĩ, atõ aĩvorasĩ aatii rãtxã weivo.

⁸ Atõ askámaĩnõ, yoini venepavo, yoini koĩ ivo, yoini koĩma ivo, maĩ noyõ ikiya, maĩ meshoya, peiyavo akárasĩ,

⁹ atõ aĩyai rãtxã Noénĩ weivo, Yové Koĩni yonoa keská akĩ.

¹⁰ Askávai txipo, 7 shavá tavákémaĩnõ, enẽ mai ivo ainakĩ.

¹¹ Aatiã Noé 600 vari nokóvaí, oshe westíkase tavákei, oshe wetsa nokóoi, 17 shavá aya. Aaivo shavapásevi, maĩsho ene kayarasĩ tovíkaĩi, naí shavapashõ ene kayarasĩ vepẽnaói akí veyánanãvakĩi.

¹² Askái oi askáseviói, 40 shavá oi ikí, ii ii varikawãi, ii ii yamékawãi aí.

¹³ Aaivo shavapasevi Noé, ãwẽ aĩ, ãwẽ vakerasĩ, Sem, Cam, Jafé, atõ aĩvorasĩ aatii rãtxã weivo.

¹⁴ Askámaĩnõ yoini õsi õsipavo, atõ aĩvorasĩnĩ ato õsíi weivo, niitero ivo, iná aká ivo, maĩ noyõ ikiyavo, maĩ meshoyavo, peiyavo, akárasĩ õsíi weivo.

¹⁵ Atõ aĩnĩ rãtxã Noénĩ weii, wetsa ravévakĩ, wetsa ravévakĩ akávo.

¹⁶ Katsése chinã viayavorasĩ atõ aĩvorasĩnĩ weivo, Noé ãwẽ tanamavai keskáki. Askámaĩnõ Yavepa ato kepoki.

¹⁷ Askái 40 shavá ene ãtsa isi, nasháma. Rãtxa mai enenimashõ nonõki.

¹⁸ Enẽ ãtsaki mai ãwẽ ivo ainámaĩnõ rãtxa nonóinái.

¹⁹ Ene inóimaise ãtsa ãtsa isi. Askáki mató keyápavorasĩ ato ivo ainakĩ.

²⁰ Enẽ mató tokopamavorasĩ ivo tavaníki. 7 metros tanáti nokoki.

²¹ Ãwẽ askámaĩnõ, naa mai shavapa shokoyavorasĩ, katsése chinã viayavorasĩ keyói, yoini peiyavorasĩ, iná atirasĩ, yoini rawemarasĩ, maĩ yoini potochtarasĩ, yorarasĩ aká õsiki ato keyoki.

²² Mai mãkõne shokoyavo, chinã viayavorasĩ aká keyóti.

²³ Askái keyótivo, naaivo mai shavapa shokoyavorasĩ, yora, yoini, maĩ noyõ ikiya, maĩ meshoya, peiyavo, akárasĩ keyótivo. Askámaĩnõ Noénĩ rãtxã pashayavorasĩchtase teshékétivo.

²⁴ Askái ene inoi. 150 shavá tavái rakáti.