Wenía 6 - Yové Koĩni Vana

Yora ichnávaĩti ivo yoã

¹ Yora revokaĩi maitioi peás ikí, aĩvakẽ vakeyávo.

² Askái Yové Koĩni vakevõ aĩvo roakachtavo oĩinã, atõ arí chinãnese ninivarãvarãvo.

³ Atõ askámaĩnõ, Yavé vanai. “Yoraro veí namisho, ẽ chinã vari aatíikai atonĩ niátĩpa. Ramaro 120 varise ato shokõnõ”, ikí.

⁴ Aatiã shavapa, aaivo maĩ, “nefilim”, atõ aká ivorasĩ aya. Aská txipo askásevioi. Awesáma, Yové Koĩni vakevõ shavorasĩ ninivarãvarãsho atõ vake iáa, yorã oĩtanáka kakatai shokovo.

⁵ Askái yora chinã ichnávaĩi, ichnái tapisvo ato oĩki Yavepa.

⁶ Atõ aská oĩinã ãwẽ shovimati yorarasĩ “ẽ awe ismtákĩ”, ikĩ ato oĩki. Askái ãwẽ chinã neneyai nii.

⁷ Askái vanai. “Ẽ shovimati yora, maĩ noyõ ikiya, maĩ meshoya, yoini peiyavo akárasĩ ato keyosnõ. Awesáma, eã ato shovimatisemẽkĩ, ‘ẽ awe ismtákĩ’, iinã ẽ ikírvi”, ikí.

⁸ Askámaĩnõ Noéro anõ mekíi.

Noepa rãtxa yoã ivo

⁹ Noepa revomarasĩ yoãnáro neskáti. Noéro chinã meki ivo yora, Yové Koĩnĩ tasánanãpaóa, avé shaváyaivorasĩ keskáma.

¹⁰ Askái vakerasĩ 3 revomakĩ, atõ anero “Sem, Cam, Jafé” aatíi.

¹¹ Askái aatiã yorarasĩ ichnávaĩi, askatase arímamẽ ranĩnanãi shokovo oĩki, Yové Koĩni.

¹² Askái yorarasĩ ichnái tavákepatõ ikí shokovo oĩinã,

¹³ Noé vana akĩ. “Ramaro naaivo mai shavapa shokoyavorasĩ ato ẽ keyokatsa, ashkã ranĩnanãi maí maí isvo oĩinã. Askái yorarasĩ, mai õsiki ato ẽ keyokatsa.

¹⁴ Askámaĩnõ, miãro, iwi cipreste ivo kavẽsho, rãtxa anipakĩ shovimavaikĩ, karovi pae txapi ashõ anõ vestotso, petxirisho nakirisho avévakĩtso. Aská avaikĩ naki paró akõvaĩtso.

¹⁵ Ãwẽ rãtxa keyá tanáshokĩro 133 metros, ãwẽ shotxi akĩro 22 metros, ãwẽ pespã ivoro 13 metros atso.

¹⁶ Aská akĩ matxi peno ashõ, aa teróchta ãwẽ kene shavá sawẽketakĩro 45 centímetros atso. Askáki amari ãwẽ pespãnero kepoti westíkase sawẽi, ãwẽ mai iinakaĩa 3 aoi, wetsaro teró, wetsaro naki kawãya, wetsaro matxika aatii atso.

¹⁷ Awesáma, ene ẽ yonokatsa, mai shavatióki enẽ ivo ainakĩ, ashkã chinã vii shokoya ave keyonõ iinã. Katsése keyókatsavo.

¹⁸ Askámaĩnõ miaro ẽ neská akatsai, tekísma ivo vana mia ẽ eneshoa. Mia, mĩ aĩ, mĩ vakerasĩ, atõ aĩvorasĩ aatii rãtxã weikatsavo.

¹⁹ Askámaĩnõ, yoinavorasĩ katsése, atõ aĩnĩ ashõ weimaótso, mivé ave pashanõvo.

²⁰ Yoini õsi õsipa katsése, peiyavo, venekavo, maĩ noyõ ikiyavo, maĩ meshoyavo atõ aĩnĩ ashõ mivé pashai vẽ vẽkatsavo.

²¹ Askámaĩnõ, mã piti, yoinavorasĩni piti aká kawii weimatso, mã piti chinãsho”, akĩ Yové Koĩni.

²² Askái Noepa katsése Yové Koĩni yonoa keskáse ashõti.